笋崗, 我來也

我終於上左笋崗買結婚要用既雜貨喇,呢個項目一直拖左好耐, 由最早打算十一月去買的, 買到現在才終於完成。
其實早都遲都無所謂既, 最緊要趕得切唧, 嘻嘻^.^
星期六, 我同河馬大師打算一早出發, 點知佢公司電話不停打黎, 點解放假果時, 佢既電話特別多呢, 但係無辦法, 工作要緊嘛。
我地上到深圳, 首先坐地鐵去到大劇院站, 再行去笋崗, 本來以為好近, 聽人講行十五分鐘就到喇。
因為我少做運動, 所以河馬大師想我做下運動行多d,我地先決定行過去的。
不過, 我地被騙喇, 十五分鐘是不可能行到過去的。
又或者因為我地係散步的步伐, 中途還去便利店買野飲, 所以我地差不多半小時才行到笋崗。
我地有去好多 blog 友所說的立興, 不知道是不是多人介紹, 所以立興都幾多人。
咁多人嘛, 我地就上左去睇下絲花先, 有兩間絲花店, 問左手花襟花8蚊人仔一個, 咁即係差不多十蚊港幣喇, 我都唔知貴唔貴, 印象中, 有人同我講過, 香港買最平都要20蚊, 咁即係比香港平喇。
最後, 我都係無買到, 因為我印象中, 人地既blog話立興都有得賣, 好似4蚊唧。
以我咁知慳識儉黎講, 無理由要比多一倍價錢架嘛。
好, 都係再落立興睇睇。
去到立興, 問左佢既手花同襟花, 真係4蚊一個,不過, 好老實講, 好唔得, 而佢只得一款, 我同河馬大師都好唔鐘意。
諗住屈服上去買8蚊果隻架喇, 所以就想走返上去喇。
但係, 有驚喜。
我係電梯既轉角, 見到一間野叫做 "飛雁"

見到佢掛住好多野, 而且比立興大間, 因為佢有兩個鋪位打對面。
不過唔算多人, 我心諗, 唔知係咪無咩香港人提, 所以少香港人黎買呢。
點知佢個老闆娘好叻, 一見到我行埋去就問我買左野未呀?要唔要買上頭用品, 8蚊一副唧。
我一聽, 8蚊!! 咪比好多 blog 友講既至低價9蚊平囉,而且, 呢度大d, 又無咁多人, 不如係呢度買算喇, 我估間間價錢都差不多架唧, 還掂我都search左blog友既價錢, 如果佢開價太貴, 咁我咪唔買囉。
咁我地就執執執, 點知佢仲有手花同襟花賣喎。
佢既手花同上面8蚊果種差不多唧, 佢只係賣6蚊唧, 咁即係平左平左, 我加埋要買成20個架嘛, 咁即係total平左40蚊喇。
即刻覺得抵呀, 哈哈。
所以, 最後我就係呢間叫 "飛雁婚慶" 既鋪頭, 買左好多我應該要買既野喇。
總共, 我用左差不多五百大元, 返黎其實我有偷偷地再對比下d價錢,唔計手花襟花, 同花球, 我都比係立興買得平, 雖然平得唔多, 只係廿蚊人仔, 咁樣都好過無丫, 至少我唔駛辛苦咁等佢得閒先招呼我, 而我又可以係個鋪頭行一轉, 再選下喎。
其實佢真係好多野賣, 結婚証書套, 羽毛筆, 褂鞋果d都有, 只不過我唔需要之嘛。