中頭獎

我....我....我竟然中左頭獎呀。

激死我喇。

今次出門口返工, 行經樹下, 突然聽到 "督" 一聲, 再感覺到頭頂好似有D野跌左落黎。

心諗: 無理由咁快有果子跌落黎架, 

哎呀~~會唔會係我最唔想發生既事呢。

跟住就用手輕輕一摸.....

嘩!!!!  真係唔摸由至可, 一摸巴鬼火。

到底邊隻雀仔咁無公德心, 竟然周街柯便便, 仲要柯左落我頭頂到, 

真係激死人激死人喇。

我同河馬大師講, 河馬大師叫我今晚收工去買張六合彩喎。

不過可以預計到, 我今日一定絕對黑仔, 

由以下兩件事可以証明喇。

1 ) 我係馬路對面, 見到我返工既巴士岩岩埋站, 我一過完馬路, 架巴士竟然係無客既情況下開走左, 果架巴士係吉車, 平時至少停留三分鐘先開走的。

2) 返到公司打卡, 遲到了, 竟然係遲到一秒, OH >.<

胎神祝福的豬腳薑

其實我好想生bb,

結婚已經差不多兩年, 

但我一直都未有bb,

每次望到blog友既bb, 

又或者身邊其他朋友既bb,

我都好羨慕。

報紙成日都有d細路有左, 然後唔要d bb, 

我就會諗, 點解好想有bb既人, 偏偏只係得個想字....

其實我屋企人又或者身邊既朋友, 

唔多唔少都知我想要bb, 

佢地成日叫我唔好比自己咁大壓力, 

其實, 我真係唔係好識控制, 點唔比自己咁大壓力。

我同自由講, 平常心喇。但係越講咪越係呃自己。

我已經唔再去 bk 既想生bb版睇任何關於生bb既野, 

不過身邊既人都會無意中提起, 咁又叫我點唔去諗呢?!?!

好似今年新年, 我聽得最多既就係, 祝你早生貴子。

又或者, 你快d生喇, 我都想派返比你個bb呀。

唉~~~其實我都真係好想生架 >.<

家姐麻雀腳既女剛生完bb, 話比d薑醋我家姐食, 

我家姐就即刻講, 哎呀~~我個妹都好想生bb呀。

個麻雀腳就話, 咁我拎d薑醋比你個妹喇, 

每樣拎一對, 係有胎神既祝福架。

所以, 就有兩舊薑, 兩舊豬腳同兩隻蛋 (我食左一隻先記得影相。) 

然後我回返封利是比家姐既麻雀腳。

利利是是....咁先好喎。

不過d薑好辣, 我唔想食。

但我家姐話, 一定要食晒架, 咁唯有忍下喇。

肥著過新年

呢個新年, 放左好少假,
平時我星期六同星期日都係放假既,
所以, 感覺上只係放左兩日唧, 星期五同星期一囉。

年初一同年初三都要返奶奶度過。
因為我有一個習慣, 就係大年初一一定要自己醒, 如果唔係自然醒, 我一定全年都唔夠訓。
所以, 河馬大師自己返奶奶度玩啤牌, 而我就訓醒先返去。

但今年, 我好早就自己醒左, 回想往年, 我至少可以訓到三點唧, 唔知點解今年咁早就醒左。
醒左肚仔餓, 就自己煎左d芋頭糕同蘿蔔糕黎食。
我竟然可以食晒, 真係離晒譜。
之後返奶奶度, 梗係又食喇, 我奶奶既年盒放左好多朱古力,
因為我唔鐘意賭錢既關係, 我就起勢係度食朱古力, 開心果, 薯片.......



年初二, 回娘家。
食飯既時候, 就會講好多八掛笑料, 但今次慘喇, 變左鬧我呀, 嗚嗚>.<
我家姐突然話 : 喂, 你依家真係肥得太過份喇, 大表姐上次返黎, 同我講, 你十年前係澳洲好瘦, 做咩依家咁鬼肥。然後又話, 原來食鬼咁多肉, 就梗係肥喇。
家姐再話 :  Emily (佢朋友) 話早兩日見到你, 圓碌碌, 好似個波咁喇。
家姐再再話 : 阿邊個邊個 (我既舊同學)依家都瘦過你喇。不過佢講完呢句, 我媽咪即刻講, 唔係, 阿邊個阿邊肥d, 我尋日先叫到佢唧嘛。
家姐再再再話 : 咁依家唔係同人鬥肥嘛, 你睇佢, 只得塊面係呃到人架唧, 但佢依家連塊面都幾肥喇。

然後, 我細佬女友即刻講, 二家姐, 你學我丫, 我一個月瘦左十三磅喇。你食咩咩咩 + 咩咩咩, 然後再做咩咩咩就得喇。

激死我呀, 我都唔想變肥架嘛。
不過其實我都知我家姐鍚我唧, 我家姐成日覺得, 結婚前要靚, 結婚之後要更靚。
佢覺得我咁樣hea落去係糟塌自己, 所以佢先咁樣鞭策我知。
我咪唯有答佢, 係喇係喇, 我會食少d, 減肥架喇。

之後, 我地就打麻雀。我一年只會賭一次錢, 通常都係年初二, 陪我屋企人打麻雀。
我家姐成日話, 要陪爸爸打多d麻雀, 等佢唔駛老人痴呆。
其實我覺得我爸爸都唔知幾精靈。
點知打麻雀既時候, 我輕輕咁咳左兩聲, 我家姐又即刻話, 你一定係食好多薯片, 所以咳喇 >.<

年初三, 奶奶家
又係去奶奶度, 今次係奶奶d親戚都會黎, 所以又一家十幾人出去食飯, 平時都係打邊爐多既,
但今次改食圍飯喎, 食圍飯好d喇, 因為食圍飯通常都唔飽唔夠食架。
所以今日算食少左喇。

年初四, 本來奶奶話今日要去我媽咪度拜年的,
但因為河馬大師唔想今日, 就改左初九先, 可以順便一次過去埋阿叔度拜年喎。
咁今日就應該好輕鬆喇。
同河馬大師去左大家樂食左個tea, 然後河馬大師突然話想食大雞大既雞味薯條。
我話你食喇, 不過我唔食呀。
河馬大師唔信我真係唔食, 佢就不停係我隔離講, 好好味架喎, 好香架喎。
然後我話, 得喇得喇, 買喇買喇。

買完之後, 河馬大師以為我會食, 我話我唔食呀, 你食喇。
佢都係唔死心咁, 不停再講, 好好食架, 又吉一條遞過黎。
我就話唔食喇, 激死呀, 家姐話我太肥喇, 再食又比佢鬧喇。

哎呀~~~其實我又點減肥唧,
河馬大師成日都驚我唔夠飽, 成日都叫我食野喎。
又成日買野返黎, 話比我食, 激死人呀。

題外話 : 河馬大師話, 大雞大既薯條唔同左, 以前係紐紋的, 依家係直紋。
我話唔係一樣咩?
然後我就搵返我之前既薯條 blog, 原來以前真係紐紋架。我問佢點解咁都記得。

河馬大師話 : 嘻嘻...呢d又點難到我為食人呢!!!

河馬大師的生日

12月29日

河馬大師的生日, 不過河馬大師病左, 病左好多日, 好慘。

成個聖誕節都無咩點出過去慶祝, 只係其中一日返左我媽咪度燒野食唧。

佢病呢幾日, 我只係煲左肉碎粥比佢食, 佢真係食左好多日粥, 

如果換左係我, 我估我一早死左, 因為我唔鐘意食粥的, 

間中一次粥我就ok, 如果好似佢咁, 食左幾日, 我真係人都顛呀, 哈哈。

咁岩今年河馬大師生日係星期日, 本來想同佢出去慶祝架, 

不過病既關係, 佢都唔想郁, 所以算喇算喇, 只要佢唔介意, 我咪陪佢係屋企睇碟囉。

咁我問河馬大師, 今晚想食d咩?  係咪又食粥?

河馬大師話 : 今日佢生日, 大晒喎, 所以要食我煮既星州炒米。

咁好喇, 唯有就炒比佢食喇。

其實我既星州炒米同出門既唔一樣既, 

我唔鐘意食洋蔥, 所以我係唔會落架。

又因為我鐘意食青椒, 所以我又會落好多喎。

其他既材料好簡單, 只係蛋叉燒, 如果屋企咁岩有火腿就落埋, 

如果無既話, 就只係青椒, 蛋, 叉燒就搞掂架喇。

我唔係好明點解河馬大師咁鐘意食呢個星州炒米, 

如果出街食, 又唔見佢叫, 但又成日要我煮喎, 真係奇怪。

不過唔緊要喇, 最緊要河馬大師開心唧。

中西情人節

嘩~~~
呢幾日真係好凍,
凍到痴線喇。
就算依家係屋企, 我d手拍都係薑硬晒, 真係唔想伸出黎打字呀。

--------------------------------------------------------------------------------

2月14日

雖然今日係19年一遇既中西情人節, 但係我心目中, 都唔算係d咩重要日子。
因為, 我真係唔鐘意要比貴幾倍, 然後再食返平時既 set dinner, 又或者比平時難食既 set dinner。
其實剛開始拍拖既時候, 我地都試過好似依家既情侶一樣, 去食果d情侶套餐架。
我記得果次, 個餐廳有送左每個女仕一枝玫瑰花添。
但係, 間餐廳好迫, 平時都唔覺得d位咁迫, 唔知點解果日既位特別的窄, 而且d餐都好似好凍, 同埋d人好趕, 好想你地快d走, 可以比佢下轉客坐。

所以, 我一直都對今日無咩特別大既期望。
河馬大師同12號果晚已經同我講, 好多間餐廳都好 full, 問我如果book唔到位點算。
我話, 有咩所謂, 最好就book唔到添, 因為我真係唔想有個感覺係比個老闆笑我白痴咁送錢比佢駛呀。
其實我食咩都無所謂架, 食麥當勞都得架。
最衰太凍, 如果唔係我煮都得, 但係太凍, 我隻手真係唔想掂水洗菜呀。

尋日, 我同事問我, 聽日係19年一遇既情人節喎, 你老公有無約你呀?
我覺得好奇怪, 但我答我同事, 下!!唔駛約呀?? 正常佢都係要同我過架喇, 唔通仲要專登約我架咩?!??!
我同事又問 : 咁知唔知你老公打算同你食咩呀?
我 : 唔知呀, 食咩都無所謂喇, 最緊要係同佢一齊唧。
我同事又再問 : 咁你有無買禮物? 又或者你老公有無準備咩禮物呀? 會唔會聽日有花收呀???
我 : 無買禮物呀, 無專登預備呀。我估我老公應該都無買禮物架喇, 仲更加唔會送花喇, 因為送花一定會比我鬧爆。
我同事好奇的問 : 點解會鬧爆呀?
我 : 依家我同佢結左婚, 佢d錢就一早已經變左我d錢架喇, 如果佢用我d錢買幾千蚊花黎送比我, 你話係咪比我鬧爆喇, 如果係要送花, 佢就應該拎果千幾蚊換晒廿蚊紙, 然後用廿蚊紙摺花比我, 咁先唔會比我鬧而我又開心喎。

今日, 我見我d同事好多都化晒妝, 我仲係度諗, 唔知今日有無人有花收呢?
因為我記得上年同前年都有同事有花收架。點知今日等左一日, 都唔見有同事有花收喎。

到左五點, 我內線響, 同事叫我出去收野。
yeah!!!  估唔到我既紅米咁早送黎呀。
係呀, 係我自己上網訂既紅米呀, 唔係有花收呀, 哈哈。

因為年初二果日, 同細佬講開話成日見到d人話咩米咩米, 唔知係咩。
我細佬話係手機黎既, 一千蚊就有一部 smart phone, 粗粗地黎玩都唔錯, 但佢黑仔, 都搶唔到喎。 所以我細佬知道有得搶, 就即刻同我講, 今次我搶到, 我細佬搶唔到。

出去拎既時候, 我同事問我咩黎, 我話今日送黎就當係情人節禮物喇。
個速遞員聽到就搭訕咁講 : 下!! 咁 cheap, 一千蚊唧喎。
我話 : 其實係我自己訂架, 諗住到時叫老公比錢唧, 哈哈。不過一千蚊一部手機, 買黎玩下都好呀, 夠平呀。

我心諗 : 其實送禮點解要用價錢去衝量呢, 不過一千蚊都話cheap, 咁到底佢要送幾多錢既禮物比佢女朋友先唔 cheap 呢?
我又心諗, 如果要送幾千蚊既野比你女朋友, 你女朋友先覺得係岩既, 你就真係應該考慮下呢個女朋友值唔值得你同佢過人世喇。

收工, 出荃灣搵河馬大師。
河馬大師見到我既時候, 就比個紙袋叫我拎住, 我對眼望入去見到有盒草餅。
然後佢講左一句, 比你架。

我心諗 : 係咪奶奶收到盒禮係草餅, 然後叫河馬大師拎比我食呢?

我正想問既時候, 河馬大師再係紙袋裡面拎左一束紫色好細束既花比我。
我望一望, 原來係金莎花黎架。

我就開口話 : 做咩晒錢買花比我呀。
河馬大師 : 靚唔靚呀?
我 : 靚, 買左幾錢呀?
河馬大師 : 我自己整架, 尋晚整到三點幾呀。 (尋晚河馬大師打籃球, 通常佢打籃球果晚都唔會返黎訓的。)
我 : 下。

我既心情即刻唔同晒喇, 嘩!!!!!我完全地驚喜, 我真係諗都無諗過佢會比驚喜我, 因為佢真係好多年無自己整呢d手作仔比我喇。我真係感動到有d眼濕濕呀。

我問佢, 邊有時間整比我。
佢話, 就係襯平時無返黎訓既時候偷偷地整囉, 佢話佢試左好多方法, 跟埋網上面既教學, 不過都唔 work, 一樣撐唔起d金莎。尋晚仲要整到三點幾, 佢好驚整唔切呀, 所以依家好眼訓呀。

咁我問佢盒草餅呢?
佢話怕自己真係整唔到, 所以買定盒草餅先, 如果真係整唔掂, 都至少有盒草餅喎, 真係比佢激死。

我地行去食飯既時候, 佢講解比我知佢點整, 佢一路講, 我一路聽, 聽到我聽唔住流左兩滴眼淚, 因為我真係好感動。

對我黎講, 呢一束好細束既金莎花靚過成萬蚊既真花, 收到呢一束金莎花開心過收到成萬蚊既LV手袋。原來, 我真係好易氹, 嘻嘻 :p

一風堂

前排, 我偷懶無返工, 出左去搵河馬大師食lunch。

佢話, 不如同我去一風堂食拉麵。

唔知點解, 最近佢都好鐘意食拉麵, 咁好耐, 我地就去一風堂試下喇。

因為我到先, 所以我入去住低等。

我隔離台既兩個外藉人仕, 完全發揮相機食先既行為,

佢地每黎一個就先影相,

不過我其實懷疑佢地係果d寫雜誌既記者。

因為佢地兩個都係帶住長鏡頭既相機, 

碟野黎左之後, 佢地都係唔同既角度黎影碟野,

而且, 佢地仲要係一碟一碟咁叫, 

黎完, 影完, 食完先再 order 第二個。

不過, 我估佢地兩個應該係歐洲人, 因為兩個都係金髮, 佢地兩個自己對話唔係用英文, 嘻嘻。

講左好多八掛野, 可想而知其實我係幾咁八掛仔呢。

叫左個餃子  (我覺得好普通)

仲有炸雞, 真係好脆, 不過我覺得有d油。

我同河馬大師都係叫左呢款拉麵。

其實我食完, 都係覺得不外如是唧, 點解d人會咁讚既呢??
係咪.......其實我真係唔識食呢?!?!?!