過大禮的預備 -- 生果籃

係呀,
早前都說到我要提早過大禮,
咁我當然要預備過大禮既野,
就好似果籃咁。

我問左我媽咪, 過大禮有d咩要, 佢話是旦喇, 仲話家姐果時都無過大禮咪又係咁。
okok, 咁即係利是可以代替一切。

而我既擇日師傅之前都有專登提我, 話如果我地咩都唔做, 利是代替既話,
都一定要帶兩個生果籃去。

咁即係我只需要生果禮喇。
問左價, 原來生果籃都幾貴下, 唔知係真係咁貴, 定佢地呃我。
所以, 最後我決定買吉籃然後自己pack生果入去。
再上網 search 下, 過大禮要咩生果,
知道, 梨同橙一定唔得。
最好有柚子 (有子), 有核提子 (有子), 柑 (金), 然後話要火龍果, 蘋果, 富有柿, 水密桃, 楊桃。
其實我都唔知點解要後面果d, 見人咁講, 我咪照諗囉。

不過, 我星期五放工去買, 有d搵唔到喎。
唔知係唔係季節唔岩呢。有四樣好易搵到, 其他都唔係咁易搵到。
咁四又唔係好好意頭, 所以我買六樣算喇。
最後我買左柚子, 有核提子, 柑, 火龍果, 蘋果,同仙桃。
搵唔到楊桃, 我估仙桃都差不多,
搵唔到富有柿, 但我見到柿餅, 曾經有諗過好唔好買柿餅, 但係柿餅係乾既, 又好似唔係幾好。
所以六樣就六樣喇。

到左夜晚, 我同河馬大師就自己 pack 左兩個果籃。
我地專登用唔同既包裝,
因為我媽咪到時要回返一個比男家,
如果一樣既話, 我媽咪就唔識分囉。
唔一樣既, 咁佢就知道邊個要回比男家喇。