要改期.....

本來一直打算快快趣寫埋 In Wedding 既試衫 blog 既,
點知係公司一直都好忙,
無咩時間寫埋佢,
返到屋企又唔想寫喎,
所以拖下拖下,
拖到依家都仲未開始寫, 唉!!

寫住其他突發野先。

我間中睇 blog, 都會見到有人話過大禮要改期。
我果時心諗, 好慘呀,
安排好晒既野, 突然間又要改期。

點知, 呢d咁慘既野,
都終於發生係我身上喇。

都係我媽咪囉, 我早幾日返去問佢拎名單既時候
佢突然同我講, 係喎, 你要早少少比d帖我, 等我可以派呀。
我話, 過大禮果日會比埋d帖你架喇。
我媽咪 : 下! 唔得, 太遲喇, 你早d比我, 等我可以早d派。
我話: 點得架, 人地係過完大禮先派帖架嘛。
我媽咪 : 我邊夠時間派呀, 我4月要去兩個星期旅行呀。而且, 派左先又有咩所謂喎。你家姐當年結婚都無過大禮喇。

我心諗: 當年家姐結婚果時, 都無入門同出門喇, 咁我家姐既老爺奶奶一早就已經仙遊左嘛, 姐夫只得一個阿哥係香港, 佢地兩個男人又邊識喎。
我再心諗, 你當年夠買兩對龍鳳鐲同一條大金鏈比佢喇, 到依家我都未見你有買比我呀, 哼, 呢d野邊有得比較架。

我諗左兩日, 都係唔想未過大禮就派帖。所以尋晚返媽咪屋企食飯,
順便拎本通勝睇下。
見到3月17日星期六宜納采喎。
即刻問爸爸, 納采係咪過大禮既意思呀?
爸爸話係呀。
咁我又問爸爸, 係咪正常黎講, 過完大禮先派帖架?
爸爸話係呀。

咁我就打比河馬大師, 問佢, 不如改3月17日過大禮喇, 咁岩9點至13點都係吉時, 又係星期六。
河馬大師話, 突然間改好煩喎。都已經約好晒朋友, 而且咁急, 邊預備得切。

但係, 事在人為架唧。我話我真係唔想未過大禮就派帖呀。
咁河馬大師咁鍚我, 當然明知道好麻煩, 佢都會遷就我。

所以, 我同媽咪講, 咁改3月17日過大禮喇。
我媽咪話, 唔駛改喇, 你比我早d派咪得囉。
我話唔得, 一係就改3月17日, 一係就你4月先開始派帖, 是旦你選喇。

咁結果好明顯, 過大禮日期要改為3月17日。