十種注定嫁不出的女人

岩岩食飯果時無聊, 睇見 yahoo 有呢篇野, 咁我就禁入去睇下喇。
睇下到底有邊十種注定嫁不出嘛。又睇下自己到底有無中都好呀。


年過三十又未嫁得出既女人越來越多，點解香港女人會「滯銷」？身為單身港女，絕對有必要了解市況，以下10種女人男人最怕，如果你或身邊朋友屬於呢幾類，就一定要小心了！

1. 靚過頭的女人：無男人想「戴綠帽」，太靚的女人「啱睇唔啱食」，做花瓶係唔錯，但身邊總會惹來一大堆狂蜂浪蝶，所以都係娶個普通女人安樂啲。 (李嘉欣公認係靚女喇, 佢咪一樣嫁得出。)
2. 太有學問的女人：女人太聰明，男人風頭全部被搶，做男人仲有咩意思？女人就算幾醒，都要扮下蠢扮下傻，俾身邊的男人威返下。(好多已經係博士既女人都一樣結左婚呀。)
3. 事業太成功的女人：做「成功女人背後的小男人」並唔風光，面對工作太強的女人，男人變得渺小，絕對會很「無癮」。所以女人幾叻都好，適當時候都要識得表現女性的溫柔，做個可愛的女強人。(其實我唔知點先算事業好成功, 但係, 我估, 汪小菲既阿媽, 即係大S既奶奶, 佢事業算好成功喇, 佢咪一樣已經結左婚仲有仔添。又或者陳方安生, 又或者葉劉淑儀都應該算係成功掛。)
4. 惡形惡相的女人：這種高高在上、自以為是的女人，往往權力欲、操縱欲比較強，事無大小都管到實，要日日對住隻黑口黑面的「老虎乸」，邊個男人會頂得順？ (呢個, 我真係諗唔到例子, 因為我唔知邊個係高高在上呀, 哈哈。如果講身邊人, 我覺得我姊夫既阿嫂囉, 因為我覺得佢唔會正眼望人, 成日以為佢自己好巴閉, 所以搞到佢個女都一樣咁無禮貌, 見到長輩都唔識叫人, 當自己阿媽係工人。之不過, 佢都一樣結左婚呀, 如果唔係點做我姊夫既阿嫂喎。)
5. 太神經質的女人：男人最怕女人「一哭二鬧三上吊」，隨便因為一個女性朋友的Facebook留言或sms都嘈到拆天的女人，留在身邊只會家嘈屋閉，不得安寧。 (名人例子我真係唔知, 可能我唔算太八掛新聞 :p, 如果身邊人, 我覺得我大陸既表姐就係咁既人, 但係我表姐夫仲係好愛佢, 不過我表姐佢可能太神經質, 搞到精神開始出現問題, 要去睇醫生食藥喇, 好慘>.<。)
6. 太敗家的女人：香港地有金山銀礦的人並唔多，無男人想被女人搞到傾家蕩產，落得人財兩空，除非你本身好有米，否則「洗腳唔抹腳」的習性係時候改改。(呢個應該唔駛講名人例子喇, 相信你地身邊認識既都應該有好多。)
7. 太男人婆的女人：雖則現今社會男女平等，不過絕對無男人鐘意女人粗口爛舌、粗粗魯魯，適當時候都要展現下女人味，著下裙、化下妝扮下靚，男人帶出街都有Face啲。 (一睇到呢到, 我個腦即刻戇起魯芬, 唔知魯芬嫁左未呢?)
8. 有公主病的女人：這種「港女」要求多多、尖酸乞薄、洗人唔洗本，平日返工服侍老細都未夠，返屋企仲要伺候习蠻公主，被人當咕喱、阿四咁舞黎舞去，真係唔癲就假！ (豬腳指皮囉, 佢3月都要嫁喇。)
9. 有不良嗜好的女人：電視劇都睇唔少，女人爛賭爛飲有雀癮煙癮起上黎，比男人更恐怖，就算唔惹來周身債都一定麻煩多多，更加唔荒會照顧屋企，真係娶左都喊三聲。 (呢d有時新聞都有賣, 個老婆爛賭......, 都係人地老婆, 即係嫁得出喇。)
10. 太過依賴的女人：嗲聲嗲氣乜都要人幫的女人，男人初初可能會好受落，但耐左就唔多耐煩，因為娶左都唔洗止意會做家頭細務煮飯洗衫，仲要照顧返佢轉頭，真係寧願單身，起馬有阿媽幫手執頭執尾。 (佢都有講男人初初好受落, 就係好受落既時候, 可能都已經娶左個女仔入門喇, 咪一樣係嫁得出囉。)

點知睇完, 真係只想笑笑就算, 其實我覺得呢個世界上唔會有注定嫁不出的女人, 點解女人會嫁出不呢, 只係因為佢唔想嫁, 又或者他想嫁的人唔娶佢唧。 所以, 就算中左以上既所謂注定又有咩問題, 有一句野叫做 "冤猪頭都有盟鼻菩薩"