時鐘Diy

我屋企部三星電視，岩岩夠三年零一個月就即刻同我打柴。

打去三星問，佢話我地過左保用期了，上門檢查費xxx, 如果要運返去佢地公司維修要再比xxx, 最後零件同維修費就要檢查完之後先可以報數。

聽完一大輪，心諗：我不如買部新架喇。

又因為換左電視，就遮住左now既接收器，我地就再睇唔到時間喇。

河馬大師話不如買個鐘返黎喎。

咁好喇，我就即刻上偉大的淘寶睇睇。

係我左挑右選既情況下，我決定買個Diy鐘，一來可以美化家居，二來又可以比河馬大師發揮佢既設計空間。

終於係其中一個星期日，佢開始佢既偉大工程，搞左兩個幾鐘完成左呢個鐘喇。

我覺得好靚，我好滿意。

所以，河馬大師，你既辛苦係值得的。

激氣的乾衣機

我其實都幾憎香港既天氣，因為真係好潮濕，成日都濕濕泣泣。

之前有幾日好凍，一回暖少少，我屋企既浴室就好似比人拋棄一樣，不停咁喊，d眼淚未停過，係咁流。

其實我浴室都算好喇，我果層既電梯大堂先恐怖，我以為佢比人掉左落海再走返上黎唧，竟然濕到水浸一樣，地上有一灘一灘既水，天花亦都有水滴落黎，我行果時好小心，因為我怕跣低。

呢d我可以好小心咁避，但係好困擾我既係，我洗既衫一直唔乾，因為我屋企無乾衣機，可以晾衫既地方又有限，沖完涼既毛巾係浴室醃住，d味好臭，有時我會忍唔住掉左條毛巾去。

終於，我忍唔住係街度買左一部摺疊式乾衣機返屋企試下。

老實說：我好失望，因為部機太細，放唔落好多衫，我第一次用果時唔知，我掛左十二件衣物入去，三個鐘後，E…點解唔乾既，心諗係咪多得濟，好喇，乾少d嘢，掛九件，又開三個鐘。哎呀！呢九件衫加埋乾左六個鐘喇，只係好薄果五件乾左，呢五件係底衫同老公既shirt，另外我平時著既唔厚長袖衫，睡褲同毛巾都未乾晒。


真係激死我喇，感覺呢個乾衣機好廢。

後來經我再三測試，我發現裡面最多可以放四件衣物，咁就三個鐘可以乾晒，當然太厚既唔得喇。

但只可以乾四件，又麻煩我又開又收，又晒地方，真係激死人喇，真係唔用好過用呀。

冬天必備的電暖毯

聖誕節果時，我返左屋企同屋企人燒野食。講開隻腳好凍就好難訓著 。
細佬就即刻話，佢女友成日都話佢手手腳腳都凍，成日都比細佬凍醒左。
我話，係喇係喇。河馬大師隻腳又係好凍，好似成舊冰咁。
不過好彩我有用暖水袋，成日都推個暖水袋落河馬大師對腳度，咁就唔會凍親我 。

我細佬就話，唔知買電暖毯有無效，佢話打算放假果時去買。

我就記起hsbc有電暖毯買，即係search比佢睇，四百幾蚊既雙人電暖毯，最長可以長開十粒鐘，又有買種溫度選擇，好似幾抵，再望真d, 佢話德國名牌，心理上感覺唔錯 。我細佬就叫我幫佢買張。

我同河馬大師講，不如我地自己都買一張喇。

咁河馬大師梗係話好喇，我開始發現，我好似話買咩佢都話好的。係佢知道我真係天生慳家唔會亂買野定係佢真係一d都唔在乎錢呢？？？

我上網訂完，約一星期收到信，叫我一月尾去拎。
下！！要等成個月，本來凍都變唔凍喇。
我仲明明打去hotline問過話有貨架嘛，真係唔明點解有貨都要等咁耐。
算喇，唯有等下年先用喇。

點知，奇怪既事發生了，就係二月有幾日好凍，凍到發顛咁濟。連三月都有幾日好凍，點解個天氣咁奇怪既。
係咁凍既天氣之下，我地就即刻拎張電暖毯出黎用。我地開足十個鐘，好舒服咁訓左一場好覺。

幾日後回暖，河馬大師竟然同我講，電暖毯真係救左佢一命，如果唔係佢一定會凍死喎。

尋晚我返媽咪度食飯，我入客房見到電暖毯既盒，就突然醒起，係喎，我細佬好孝順咁將張電暖毯比左父母用，(其實本來想買多張比阿婆，我阿婆點都唔肯用，話怕電死佢，搞到我細佬仲好嬲話點解阿婆咁固執) 我問爸爸，張毯掂唔掂，有無開黎用。
我爸爸話有呀，最凍果幾日先開黎用，依家收返入盒喇。

我諗：冬天既期間，相信電暖毯已成為我既必需品了。

中頭獎

我....我....我竟然中左頭獎呀。

激死我喇。

今次出門口返工, 行經樹下, 突然聽到 "督" 一聲, 再感覺到頭頂好似有D野跌左落黎。

心諗: 無理由咁快有果子跌落黎架, 

哎呀~~會唔會係我最唔想發生既事呢。

跟住就用手輕輕一摸.....

嘩!!!!  真係唔摸由至可, 一摸巴鬼火。

到底邊隻雀仔咁無公德心, 竟然周街柯便便, 仲要柯左落我頭頂到, 

真係激死人激死人喇。

我同河馬大師講, 河馬大師叫我今晚收工去買張六合彩喎。

不過可以預計到, 我今日一定絕對黑仔, 

由以下兩件事可以証明喇。

1 ) 我係馬路對面, 見到我返工既巴士岩岩埋站, 我一過完馬路, 架巴士竟然係無客既情況下開走左, 果架巴士係吉車, 平時至少停留三分鐘先開走的。

2) 返到公司打卡, 遲到了, 竟然係遲到一秒, OH >.<

胎神祝福的豬腳薑

其實我好想生bb,

結婚已經差不多兩年, 

但我一直都未有bb,

每次望到blog友既bb, 

又或者身邊其他朋友既bb,

我都好羨慕。

報紙成日都有d細路有左, 然後唔要d bb, 

我就會諗, 點解好想有bb既人, 偏偏只係得個想字....

其實我屋企人又或者身邊既朋友, 

唔多唔少都知我想要bb, 

佢地成日叫我唔好比自己咁大壓力, 

其實, 我真係唔係好識控制, 點唔比自己咁大壓力。

我同自由講, 平常心喇。但係越講咪越係呃自己。

我已經唔再去 bk 既想生bb版睇任何關於生bb既野, 

不過身邊既人都會無意中提起, 咁又叫我點唔去諗呢?!?!

好似今年新年, 我聽得最多既就係, 祝你早生貴子。

又或者, 你快d生喇, 我都想派返比你個bb呀。

唉~~~其實我都真係好想生架 >.<

家姐麻雀腳既女剛生完bb, 話比d薑醋我家姐食, 

我家姐就即刻講, 哎呀~~我個妹都好想生bb呀。

個麻雀腳就話, 咁我拎d薑醋比你個妹喇, 

每樣拎一對, 係有胎神既祝福架。

所以, 就有兩舊薑, 兩舊豬腳同兩隻蛋 (我食左一隻先記得影相。) 

然後我回返封利是比家姐既麻雀腳。

利利是是....咁先好喎。

不過d薑好辣, 我唔想食。

但我家姐話, 一定要食晒架, 咁唯有忍下喇。

肥著過新年

呢個新年, 放左好少假,
平時我星期六同星期日都係放假既,
所以, 感覺上只係放左兩日唧, 星期五同星期一囉。

年初一同年初三都要返奶奶度過。
因為我有一個習慣, 就係大年初一一定要自己醒, 如果唔係自然醒, 我一定全年都唔夠訓。
所以, 河馬大師自己返奶奶度玩啤牌, 而我就訓醒先返去。

但今年, 我好早就自己醒左, 回想往年, 我至少可以訓到三點唧, 唔知點解今年咁早就醒左。
醒左肚仔餓, 就自己煎左d芋頭糕同蘿蔔糕黎食。
我竟然可以食晒, 真係離晒譜。
之後返奶奶度, 梗係又食喇, 我奶奶既年盒放左好多朱古力,
因為我唔鐘意賭錢既關係, 我就起勢係度食朱古力, 開心果, 薯片.......



年初二, 回娘家。
食飯既時候, 就會講好多八掛笑料, 但今次慘喇, 變左鬧我呀, 嗚嗚>.<
我家姐突然話 : 喂, 你依家真係肥得太過份喇, 大表姐上次返黎, 同我講, 你十年前係澳洲好瘦, 做咩依家咁鬼肥。然後又話, 原來食鬼咁多肉, 就梗係肥喇。
家姐再話 :  Emily (佢朋友) 話早兩日見到你, 圓碌碌, 好似個波咁喇。
家姐再再話 : 阿邊個邊個 (我既舊同學)依家都瘦過你喇。不過佢講完呢句, 我媽咪即刻講, 唔係, 阿邊個阿邊肥d, 我尋日先叫到佢唧嘛。
家姐再再再話 : 咁依家唔係同人鬥肥嘛, 你睇佢, 只得塊面係呃到人架唧, 但佢依家連塊面都幾肥喇。

然後, 我細佬女友即刻講, 二家姐, 你學我丫, 我一個月瘦左十三磅喇。你食咩咩咩 + 咩咩咩, 然後再做咩咩咩就得喇。

激死我呀, 我都唔想變肥架嘛。
不過其實我都知我家姐鍚我唧, 我家姐成日覺得, 結婚前要靚, 結婚之後要更靚。
佢覺得我咁樣hea落去係糟塌自己, 所以佢先咁樣鞭策我知。
我咪唯有答佢, 係喇係喇, 我會食少d, 減肥架喇。

之後, 我地就打麻雀。我一年只會賭一次錢, 通常都係年初二, 陪我屋企人打麻雀。
我家姐成日話, 要陪爸爸打多d麻雀, 等佢唔駛老人痴呆。
其實我覺得我爸爸都唔知幾精靈。
點知打麻雀既時候, 我輕輕咁咳左兩聲, 我家姐又即刻話, 你一定係食好多薯片, 所以咳喇 >.<

年初三, 奶奶家
又係去奶奶度, 今次係奶奶d親戚都會黎, 所以又一家十幾人出去食飯, 平時都係打邊爐多既,
但今次改食圍飯喎, 食圍飯好d喇, 因為食圍飯通常都唔飽唔夠食架。
所以今日算食少左喇。

年初四, 本來奶奶話今日要去我媽咪度拜年的,
但因為河馬大師唔想今日, 就改左初九先, 可以順便一次過去埋阿叔度拜年喎。
咁今日就應該好輕鬆喇。
同河馬大師去左大家樂食左個tea, 然後河馬大師突然話想食大雞大既雞味薯條。
我話你食喇, 不過我唔食呀。
河馬大師唔信我真係唔食, 佢就不停係我隔離講, 好好味架喎, 好香架喎。
然後我話, 得喇得喇, 買喇買喇。

買完之後, 河馬大師以為我會食, 我話我唔食呀, 你食喇。
佢都係唔死心咁, 不停再講, 好好食架, 又吉一條遞過黎。
我就話唔食喇, 激死呀, 家姐話我太肥喇, 再食又比佢鬧喇。

哎呀~~~其實我又點減肥唧,
河馬大師成日都驚我唔夠飽, 成日都叫我食野喎。
又成日買野返黎, 話比我食, 激死人呀。

題外話 : 河馬大師話, 大雞大既薯條唔同左, 以前係紐紋的, 依家係直紋。
我話唔係一樣咩?
然後我就搵返我之前既薯條 blog, 原來以前真係紐紋架。我問佢點解咁都記得。

河馬大師話 : 嘻嘻...呢d又點難到我為食人呢!!!

河馬大師的生日

12月29日

河馬大師的生日, 不過河馬大師病左, 病左好多日, 好慘。

成個聖誕節都無咩點出過去慶祝, 只係其中一日返左我媽咪度燒野食唧。

佢病呢幾日, 我只係煲左肉碎粥比佢食, 佢真係食左好多日粥, 

如果換左係我, 我估我一早死左, 因為我唔鐘意食粥的, 

間中一次粥我就ok, 如果好似佢咁, 食左幾日, 我真係人都顛呀, 哈哈。

咁岩今年河馬大師生日係星期日, 本來想同佢出去慶祝架, 

不過病既關係, 佢都唔想郁, 所以算喇算喇, 只要佢唔介意, 我咪陪佢係屋企睇碟囉。

咁我問河馬大師, 今晚想食d咩?  係咪又食粥?

河馬大師話 : 今日佢生日, 大晒喎, 所以要食我煮既星州炒米。

咁好喇, 唯有就炒比佢食喇。

其實我既星州炒米同出門既唔一樣既, 

我唔鐘意食洋蔥, 所以我係唔會落架。

又因為我鐘意食青椒, 所以我又會落好多喎。

其他既材料好簡單, 只係蛋叉燒, 如果屋企咁岩有火腿就落埋, 

如果無既話, 就只係青椒, 蛋, 叉燒就搞掂架喇。

我唔係好明點解河馬大師咁鐘意食呢個星州炒米, 

如果出街食, 又唔見佢叫, 但又成日要我煮喎, 真係奇怪。

不過唔緊要喇, 最緊要河馬大師開心唧。

中西情人節

嘩~~~
呢幾日真係好凍,
凍到痴線喇。
就算依家係屋企, 我d手拍都係薑硬晒, 真係唔想伸出黎打字呀。

--------------------------------------------------------------------------------

2月14日

雖然今日係19年一遇既中西情人節, 但係我心目中, 都唔算係d咩重要日子。
因為, 我真係唔鐘意要比貴幾倍, 然後再食返平時既 set dinner, 又或者比平時難食既 set dinner。
其實剛開始拍拖既時候, 我地都試過好似依家既情侶一樣, 去食果d情侶套餐架。
我記得果次, 個餐廳有送左每個女仕一枝玫瑰花添。
但係, 間餐廳好迫, 平時都唔覺得d位咁迫, 唔知點解果日既位特別的窄, 而且d餐都好似好凍, 同埋d人好趕, 好想你地快d走, 可以比佢下轉客坐。

所以, 我一直都對今日無咩特別大既期望。
河馬大師同12號果晚已經同我講, 好多間餐廳都好 full, 問我如果book唔到位點算。
我話, 有咩所謂, 最好就book唔到添, 因為我真係唔想有個感覺係比個老闆笑我白痴咁送錢比佢駛呀。
其實我食咩都無所謂架, 食麥當勞都得架。
最衰太凍, 如果唔係我煮都得, 但係太凍, 我隻手真係唔想掂水洗菜呀。

尋日, 我同事問我, 聽日係19年一遇既情人節喎, 你老公有無約你呀?
我覺得好奇怪, 但我答我同事, 下!!唔駛約呀?? 正常佢都係要同我過架喇, 唔通仲要專登約我架咩?!??!
我同事又問 : 咁知唔知你老公打算同你食咩呀?
我 : 唔知呀, 食咩都無所謂喇, 最緊要係同佢一齊唧。
我同事又再問 : 咁你有無買禮物? 又或者你老公有無準備咩禮物呀? 會唔會聽日有花收呀???
我 : 無買禮物呀, 無專登預備呀。我估我老公應該都無買禮物架喇, 仲更加唔會送花喇, 因為送花一定會比我鬧爆。
我同事好奇的問 : 點解會鬧爆呀?
我 : 依家我同佢結左婚, 佢d錢就一早已經變左我d錢架喇, 如果佢用我d錢買幾千蚊花黎送比我, 你話係咪比我鬧爆喇, 如果係要送花, 佢就應該拎果千幾蚊換晒廿蚊紙, 然後用廿蚊紙摺花比我, 咁先唔會比我鬧而我又開心喎。

今日, 我見我d同事好多都化晒妝, 我仲係度諗, 唔知今日有無人有花收呢?
因為我記得上年同前年都有同事有花收架。點知今日等左一日, 都唔見有同事有花收喎。

到左五點, 我內線響, 同事叫我出去收野。
yeah!!!  估唔到我既紅米咁早送黎呀。
係呀, 係我自己上網訂既紅米呀, 唔係有花收呀, 哈哈。

因為年初二果日, 同細佬講開話成日見到d人話咩米咩米, 唔知係咩。
我細佬話係手機黎既, 一千蚊就有一部 smart phone, 粗粗地黎玩都唔錯, 但佢黑仔, 都搶唔到喎。 所以我細佬知道有得搶, 就即刻同我講, 今次我搶到, 我細佬搶唔到。

出去拎既時候, 我同事問我咩黎, 我話今日送黎就當係情人節禮物喇。
個速遞員聽到就搭訕咁講 : 下!! 咁 cheap, 一千蚊唧喎。
我話 : 其實係我自己訂架, 諗住到時叫老公比錢唧, 哈哈。不過一千蚊一部手機, 買黎玩下都好呀, 夠平呀。

我心諗 : 其實送禮點解要用價錢去衝量呢, 不過一千蚊都話cheap, 咁到底佢要送幾多錢既禮物比佢女朋友先唔 cheap 呢?
我又心諗, 如果要送幾千蚊既野比你女朋友, 你女朋友先覺得係岩既, 你就真係應該考慮下呢個女朋友值唔值得你同佢過人世喇。

收工, 出荃灣搵河馬大師。
河馬大師見到我既時候, 就比個紙袋叫我拎住, 我對眼望入去見到有盒草餅。
然後佢講左一句, 比你架。

我心諗 : 係咪奶奶收到盒禮係草餅, 然後叫河馬大師拎比我食呢?

我正想問既時候, 河馬大師再係紙袋裡面拎左一束紫色好細束既花比我。
我望一望, 原來係金莎花黎架。

我就開口話 : 做咩晒錢買花比我呀。
河馬大師 : 靚唔靚呀?
我 : 靚, 買左幾錢呀?
河馬大師 : 我自己整架, 尋晚整到三點幾呀。 (尋晚河馬大師打籃球, 通常佢打籃球果晚都唔會返黎訓的。)
我 : 下。

我既心情即刻唔同晒喇, 嘩!!!!!我完全地驚喜, 我真係諗都無諗過佢會比驚喜我, 因為佢真係好多年無自己整呢d手作仔比我喇。我真係感動到有d眼濕濕呀。

我問佢, 邊有時間整比我。
佢話, 就係襯平時無返黎訓既時候偷偷地整囉, 佢話佢試左好多方法, 跟埋網上面既教學, 不過都唔 work, 一樣撐唔起d金莎。尋晚仲要整到三點幾, 佢好驚整唔切呀, 所以依家好眼訓呀。

咁我問佢盒草餅呢?
佢話怕自己真係整唔到, 所以買定盒草餅先, 如果真係整唔掂, 都至少有盒草餅喎, 真係比佢激死。

我地行去食飯既時候, 佢講解比我知佢點整, 佢一路講, 我一路聽, 聽到我聽唔住流左兩滴眼淚, 因為我真係好感動。

對我黎講, 呢一束好細束既金莎花靚過成萬蚊既真花, 收到呢一束金莎花開心過收到成萬蚊既LV手袋。原來, 我真係好易氹, 嘻嘻 :p

一風堂

前排, 我偷懶無返工, 出左去搵河馬大師食lunch。

佢話, 不如同我去一風堂食拉麵。

唔知點解, 最近佢都好鐘意食拉麵, 咁好耐, 我地就去一風堂試下喇。

因為我到先, 所以我入去住低等。

我隔離台既兩個外藉人仕, 完全發揮相機食先既行為,

佢地每黎一個就先影相,

不過我其實懷疑佢地係果d寫雜誌既記者。

因為佢地兩個都係帶住長鏡頭既相機, 

碟野黎左之後, 佢地都係唔同既角度黎影碟野,

而且, 佢地仲要係一碟一碟咁叫, 

黎完, 影完, 食完先再 order 第二個。

不過, 我估佢地兩個應該係歐洲人, 因為兩個都係金髮, 佢地兩個自己對話唔係用英文, 嘻嘻。

講左好多八掛野, 可想而知其實我係幾咁八掛仔呢。

叫左個餃子  (我覺得好普通)

仲有炸雞, 真係好脆, 不過我覺得有d油。

我同河馬大師都係叫左呢款拉麵。

其實我食完, 都係覺得不外如是唧, 點解d人會咁讚既呢??
係咪.......其實我真係唔識食呢?!?!?!

恭喜發財~~

今日大年初一,
我等陣要去奶奶屋企拜年,
尋晚無行花市, 不過都好夜先返到屋企, 返到屋企都一點喇。
我仲要入埋d利是先訓得。

點知, 我去搵返d利是封想入既時候, 發現左已經左幾盒係我上年已經入左架喇。

我同河馬大師講,
佢話好彩我有睇到, 如果我唔發現又覺得利是封唔靚掉左既話, 就真係喊死我呀。

所以因為已經有幾盒入左既,
我就唔駛好辛苦咁再入喇。
因為我自己要派既利是唔多, 只係要入返d大封比親友既利是唧, 所以好快就搞掂喇。

其他老公要派, 等初四先再入都得, 嘻嘻。
好喇, 差不多要出門口去奶奶度喇。

係度祝咁多位身體健康!
中多幾次六合彩頭獎!!
同另一半甜甜蜜蜜幸幸福福!!!
有仔女既就仔女乖乖, 聽聽話話, 快高長大!!!!
如果想添丁既就添丁發財!!!!!

靜電

好搞笑呀, 好搞笑呀。

頭先河馬大師落去跑步, 咁我就當然唔會跟佢去喇,
所以, 佢出門口我就去鎖門。

通常我同佢分開既時候, 都一定會kiss kiss既。
咁頭先佢 kiss kiss我既時候,
突然 "啪" 一聲,
我地倆個一齊彈開,
因為, 有靜電呀~~~

我地兩個既咀唇都比靜電彈左一下。
平時只試過手有靜電,
今次係第一次連咀唇都有靜電,
我同佢一齊係度大笑呀。

之後再錫既時候都變得小心翼翼。
你地又有無試過呀???

再黎酵素....

上次整左5樽, 

有兩樽發左毛。

咁剩返果三樽, 

好彩都飲得。

咁我見河馬大師咁鐘意飲, 

都好乖會主動飲, 

所以我就梗係再整比佢飲喇。

問左佢, 

三款口味佢最鐘意邊款。

答案係橙酵素。

所以我今次又整兩樽橙酵素比佢喇。

自製xo醬

我屋企d xo醬用晒喇, 

但因為有一個餸河馬大師好鐘意食, 

所以我要整定d xo醬先得。

12月6日

今日河馬大師唔返黎食飯, 

佢有叫我一齊出去食, 但我唔想, 所以我自己一個留係屋企。

終於有時候整xo醬喇。

本來打算聽日先整既, 但今晚屋企得我一個, 今晚整等凍左就可以入樽。

我切紅蔥頭果時, 真係流眼淚流到好慘, 

其實我已經預先將d紅蔥頭雪左冰格兩個半鐘喇, 

但都一樣流晒眼水, 超辛苦。

撕瑤柱絲真係撕到好攰, 可能我浸得太多瑤柱喇。

因為河馬大師話唔好整太辣, 所以我只係用左十粒辣椒唧, 應該唔會太辣既。

材料預備晒, 就可能煮喇。

首先將紅蔥頭, 蒜蓉同辣椒碎炒香。

(哇~~真係好鬼香, 好彩我已經食左晚飯, 如果唔係我一定比d香氣燻死我。)

炒香晒佢地之後就較細火, 然後再落埋蝦米碎, 金華火腿絲再慢火炒, 

炒得咁上下就落多d油, 

然後再落埋瑤柱絲再一齊炒, 炒到個色變到xo醬既色後, 

再細心d睇下夠唔夠油, 唔夠油就要再落多d油, 再炒多一陣。

(油好重要架, 因為唔夠油既話, xo醬會好快乾, 就唔好食喇。)

依家等d xo醬變凍, 就可以入樽架喇。

係等既時間, 我消毒左d玻璃樽, 預備用黎裝xo醬既。

好好彩, 可能天氣凍, 而且又係夜晚, 竟然唔駛兩個鐘就已經凍晒喇。

我入到三樽, 兩樽細既分別比我媽咪同我奶奶。

其實我都唔知佢兩老鐘唔鐘意既, 不過我之前同我爸爸提過我想整, 話整完比佢試下, 

我爸爸話好。

但我又覺得, 只整比我屋企, 唔比老爺奶奶又好似好偏心咁, 咁佢地依家都係我父母黎架嘛, 

所以唔理, 整左比佢地先, 佢地唔鐘意咪下次唔整囉 :p

另外樽大既就梗係我自己用喇, 嘻嘻。

酵素的好處

之前d酵素收成, 我叫河馬大師飲一杯。
個味道佢話佢可以接受, 然後我就同佢講, 酵素對身體有好多好處架,
所以我叫佢要日日都飲一杯。

尋晚, 佢主動同我講, 可唔可以沖一杯比佢飲。
嘩!!!  我好開心呀。
因為佢其實唔係好鐘意飲呢d "古怪" 野架。
不過佢飲既時候又問我有咩好處,
咁我就上網搵下有咩好處, 等佢自己等閒就入黎睇喇。


酵素能幫助改善下列體質：

消 化一便秘、腹瀉、食慾不振、胃下垂、胃炎、胃潰瘍、12指腸潰瘍、痔瘡、腸炎、肝炎、肝功能不良、脂肪肝、肝硬化、宿醉、糖尿病、口腔炎、牙周病、太瘦、肥胖。
呼 吸一鼻竇炎、氣管炎、氣喘、肺疾、感冒、扁桃腺發炎。

循 環一心臟病、心肌梗塞、狹心症、血管硬化、高低血壓異常、手足冰冷、麻痺酸痛、中風、腦出血性引起半身不遂、頭暈、容易疲勞、身體虛弱、貧血、體質過敏

神 經一自律神經失調、失眠、神經質、頭痛、肩痛、脖子痛、腰痛、神經痛、痛風、風濕痛、關節炎、神經過敏、坐骨神經痛、羊癲瘋。

泌 尿一腎炎、腎功能不全、尿蛋白水腫，高尿酸、膀胱炎、結石（肝、膽、膀胱）

內分泌一內分泌失調、性無能、冷感、不孕症。
婦 科一生理不順、經痛、習慣性流產、更年期障礙、赤白帶、子宮下垂。
骨 科一骨質疏鬆。
腫 瘤一子宮肌瘤、卵巢囊腫，前列腺腫大（攝護腺）、脂肪瘤、淋巴瘤。
皮 膚一香港腳、濕疹、刀傷、燙傷、挫傷、紅腫瘀血、皮膚病、蓄膿褥瘡、紫斑症。

美 容一黑斑、肝斑、老人斑、紝娠紋、青春痘、粉剌、皮膚粗糙、瘦身。

--------------------------------------------------------------------------------------------------------

椰子酵素：預防心臟病，關節炎和癌症，強健肌膚，滋潤止咳。

葡萄柚酵素：降低膽固醇，預防感冒及牙齦出血。

哈密瓜酵素：消暑解燥，生津止渴。

西瓜酵素：消暑利尿，降血壓。

芹菜酵素：補充體力，舒緩焦慮、壓力。

香蕉酵素：提高精力，強健肌肉，滋潤肺腸，血脈暢通。

葡萄酵素：調節心跳，補血安神，加強腎、肝功能，幫助消化。

奇異果酵素：含豐富維他命C，清熱生津，止吐瀉。

紅蘿蔔酵素：刺激膽汁分泌，中和膽固醇，增加腸壁彈性，安撫神經。

檸檬酵素：含豐富維他命C，止咳化痰，有助排除體內毒素。

柳橙酵素：滋潤健胃，強化血管，可預防心臟病、中風、傷風、感冒和淤傷。

草莓酵素：利尿止瀉，強健神經，補充血液。

梨子酵素：能維持心臟，血管正常運作，去除體內毒素。

蘋果酵素：調理腸胃，促進腎機能，預防高血壓 。

芒果酵素：幫助消化，防止暈船嘔吐喉嚨疼。

鳳梨酵素：消腫怯溼，幫助消化，舒緩喉痛。

木瓜酵素：消滯潤肺，幫助消化蛋白質。

金桔蒜蓉辣椒醬(食譜)

材料

紫天椒   一碗 (怕辣的可減少些)

獨子蒜   三包

粗鹽       八湯匙

金桔       1.5 磅

做法

其實很隨意

先將蒜、辣椒打碎拌勻

分層加入金桔及鹽

蓋上蓋子摇匀即可

**做好後放櫃內2-3 星期可享用的

食譜來源 : 維維媽 http://waiwaima.chiba78.com/articles-13313.html

金桔蒜蓉辣椒醬

早幾日網遊既時候,
我見到有個網友話用金桔黎整蒜蓉辣椒醬。
會有好香既金桔味。

咁我見個食譜唔難整,
同埋我浸完咸柑桔仲有剩,
就一於試下浸喇。

不過要等三個星期才可以收成。
好期待呀。

浸咸柑桔

因為見到街市有柑桔賣,
我就醒起, 我話想浸咸柑桔好耐喇。

所以, 我就決定要買咸柑桔黎浸。
浸左兩樽,
我數過喇,
每樽可以浸32粒。
希望唔會發毛喇。

酵素的收成

唔覺唔覺,
我既酵素已經浸左三個多星期喇。

其實我真係唔知點樣先為之可以收成。

因為我既酵素一直都唔似其他人咁, 嘔好多泡泡。
我d泡泡係好少好溫柔咁。

不過唔理喇, 都三個星期有多喇。
就當佢收成喇。

不過將d果肉拎晒出黎之後,
原來只得返好少架唧。



我同河馬大師即刻試左一杯,
我覺得仲係好大酒味。
河馬大師就覺得酸。

不過我飲左一杯之後,
即刻好眼訓,
可能我係醉酒喇 :p

自家煮雞煲

呢幾日天氣開始凍喇。
尋日河馬大師同我講想打邊爐。
我就突然醒起,
係喎, 我可以試下整雞煲喎。
就買定材料, 留返今晚試整雞煲先。

因為我唔識斬雞, 所以就唔買原隻雞喇,
不如用雞脾肉喇, 其實都係雞黎, 應該無咩大分別。

本來河馬大師係房午睡的,
但我岩岩炒完雞想放上電磁爐果時,
河馬大師突然間係廚房門口出現同我講
「真係痴線架。」
我問佢咩事? 我以為隔離屋又敲牆喇。
之後佢同我講, 咁鬼香, 真係痴線架咩!

我真係比佢激死就真。
以河馬大師既口味黎評分係七分, 佢話佢唔鐘意食雞煲。(其實我一早就知, 但我真係想試下整埋。
但我地食左兩舊雞之後, 我就即刻放湯開始打邊爐。
我再問佢, 咁依家又幾多分呀? 佢話即刻變九分喇。
激死!!!!

不過以唔鐘意食雞煲既人黎講, 我可以係佢身上拎到七分。
即係我個雞煲係成功左喇,
Yeah~~~

浸檸檬醋

我係網上搵到一d關於檸檬醋既資料。
睇落檸檬醋好似對健康唔錯。
又由於我一直都愛喝醋,
我就一於自己試下浸檸檬醋喇。
點知我勁唔小心, 
切檸檬果時竟然切埋自己隻手指。
揸刀咁耐, 
第一次切到自己。
比河馬大師鬧到我狗血淋頭,
嗚嗚!!!

不過估唔到會切得咁緊要, 
第一張膠布滿晒血, 
要換過另外一張新既膠布。
仲比河馬大師整蠱,
話要我舉高隻手一個鐘先止到血, 哼哼。

下面係我上網搵到既資料。
 - 檸檬含大量維生素C、鈣、磷、鐵等。常喝檸檬飲品可美白肌膚，也能使黑色素沉澱，可去斑、清熱解毒。

 - 檸檬含有豐富的有機酸，浸泡成醋對健康有加分的效果。浸泡好的檸檬醋中含有豐富的檸檬酸及果酸，可以讓醋的養生及保健功效更為顯著。

 - 根據專業醫師表示檸檬耐久易保存，且內含豐富的維它命C，能防止牙齦腫脹出血，還可減少黑斑、雀斑發生的機率，並有部份美白的效果，檸檬還有豐富的鈣質，對人體缺乏的維生素能提供高效率的養份。

 - 檸檬與醋同樣具有分解脂肪的效果，這樣看來，檸檬醋的確是能養顏美容的，也是健康食品，飯後小喝一杯讓自己更具元氣，也更美麗窈窕。

 - 飲用後功效： 
1.有保肝解毒的作用，可以很快恢復體力精神充沛
2.能淨化血液、血脂肪、血酸，讓血液恢復酸鹼平衡，血液正常化
3.防止心臟病、高血壓﹝因血液恢復正常﹞  
4.增強人體免疫系統的功能，預防感冒
5.改善慢性疾病，預防腎臟疾病
6.可治療骨骼疏鬆症、偏頭痛
7.可以排除硝酸鹽，防止癌病變
8.可以清除壞的膽固醇
9.幫助排泄系統通暢，可治便秘