靜電

好搞笑呀, 好搞笑呀。

頭先河馬大師落去跑步, 咁我就當然唔會跟佢去喇,
所以, 佢出門口我就去鎖門。

通常我同佢分開既時候, 都一定會kiss kiss既。
咁頭先佢 kiss kiss我既時候,
突然 "啪" 一聲,
我地倆個一齊彈開,
因為, 有靜電呀~~~

我地兩個既咀唇都比靜電彈左一下。
平時只試過手有靜電,
今次係第一次連咀唇都有靜電,
我同佢一齊係度大笑呀。

之後再錫既時候都變得小心翼翼。
你地又有無試過呀???

再黎酵素....

上次整左5樽, 

有兩樽發左毛。

咁剩返果三樽, 

好彩都飲得。

咁我見河馬大師咁鐘意飲, 

都好乖會主動飲, 

所以我就梗係再整比佢飲喇。

問左佢, 

三款口味佢最鐘意邊款。

答案係橙酵素。

所以我今次又整兩樽橙酵素比佢喇。

自製xo醬

我屋企d xo醬用晒喇, 

但因為有一個餸河馬大師好鐘意食, 

所以我要整定d xo醬先得。

12月6日

今日河馬大師唔返黎食飯, 

佢有叫我一齊出去食, 但我唔想, 所以我自己一個留係屋企。

終於有時候整xo醬喇。

本來打算聽日先整既, 但今晚屋企得我一個, 今晚整等凍左就可以入樽。

我切紅蔥頭果時, 真係流眼淚流到好慘, 

其實我已經預先將d紅蔥頭雪左冰格兩個半鐘喇, 

但都一樣流晒眼水, 超辛苦。

撕瑤柱絲真係撕到好攰, 可能我浸得太多瑤柱喇。

因為河馬大師話唔好整太辣, 所以我只係用左十粒辣椒唧, 應該唔會太辣既。

材料預備晒, 就可能煮喇。

首先將紅蔥頭, 蒜蓉同辣椒碎炒香。

(哇~~真係好鬼香, 好彩我已經食左晚飯, 如果唔係我一定比d香氣燻死我。)

炒香晒佢地之後就較細火, 然後再落埋蝦米碎, 金華火腿絲再慢火炒, 

炒得咁上下就落多d油, 

然後再落埋瑤柱絲再一齊炒, 炒到個色變到xo醬既色後, 

再細心d睇下夠唔夠油, 唔夠油就要再落多d油, 再炒多一陣。

(油好重要架, 因為唔夠油既話, xo醬會好快乾, 就唔好食喇。)

依家等d xo醬變凍, 就可以入樽架喇。

係等既時間, 我消毒左d玻璃樽, 預備用黎裝xo醬既。

好好彩, 可能天氣凍, 而且又係夜晚, 竟然唔駛兩個鐘就已經凍晒喇。

我入到三樽, 兩樽細既分別比我媽咪同我奶奶。

其實我都唔知佢兩老鐘唔鐘意既, 不過我之前同我爸爸提過我想整, 話整完比佢試下, 

我爸爸話好。

但我又覺得, 只整比我屋企, 唔比老爺奶奶又好似好偏心咁, 咁佢地依家都係我父母黎架嘛, 

所以唔理, 整左比佢地先, 佢地唔鐘意咪下次唔整囉 :p

另外樽大既就梗係我自己用喇, 嘻嘻。

酵素的好處

之前d酵素收成, 我叫河馬大師飲一杯。
個味道佢話佢可以接受, 然後我就同佢講, 酵素對身體有好多好處架,
所以我叫佢要日日都飲一杯。

尋晚, 佢主動同我講, 可唔可以沖一杯比佢飲。
嘩!!!  我好開心呀。
因為佢其實唔係好鐘意飲呢d "古怪" 野架。
不過佢飲既時候又問我有咩好處,
咁我就上網搵下有咩好處, 等佢自己等閒就入黎睇喇。


酵素能幫助改善下列體質：

消 化一便秘、腹瀉、食慾不振、胃下垂、胃炎、胃潰瘍、12指腸潰瘍、痔瘡、腸炎、肝炎、肝功能不良、脂肪肝、肝硬化、宿醉、糖尿病、口腔炎、牙周病、太瘦、肥胖。
呼 吸一鼻竇炎、氣管炎、氣喘、肺疾、感冒、扁桃腺發炎。

循 環一心臟病、心肌梗塞、狹心症、血管硬化、高低血壓異常、手足冰冷、麻痺酸痛、中風、腦出血性引起半身不遂、頭暈、容易疲勞、身體虛弱、貧血、體質過敏

神 經一自律神經失調、失眠、神經質、頭痛、肩痛、脖子痛、腰痛、神經痛、痛風、風濕痛、關節炎、神經過敏、坐骨神經痛、羊癲瘋。

泌 尿一腎炎、腎功能不全、尿蛋白水腫，高尿酸、膀胱炎、結石（肝、膽、膀胱）

內分泌一內分泌失調、性無能、冷感、不孕症。
婦 科一生理不順、經痛、習慣性流產、更年期障礙、赤白帶、子宮下垂。
骨 科一骨質疏鬆。
腫 瘤一子宮肌瘤、卵巢囊腫，前列腺腫大（攝護腺）、脂肪瘤、淋巴瘤。
皮 膚一香港腳、濕疹、刀傷、燙傷、挫傷、紅腫瘀血、皮膚病、蓄膿褥瘡、紫斑症。

美 容一黑斑、肝斑、老人斑、紝娠紋、青春痘、粉剌、皮膚粗糙、瘦身。

--------------------------------------------------------------------------------------------------------

椰子酵素：預防心臟病，關節炎和癌症，強健肌膚，滋潤止咳。

葡萄柚酵素：降低膽固醇，預防感冒及牙齦出血。

哈密瓜酵素：消暑解燥，生津止渴。

西瓜酵素：消暑利尿，降血壓。

芹菜酵素：補充體力，舒緩焦慮、壓力。

香蕉酵素：提高精力，強健肌肉，滋潤肺腸，血脈暢通。

葡萄酵素：調節心跳，補血安神，加強腎、肝功能，幫助消化。

奇異果酵素：含豐富維他命C，清熱生津，止吐瀉。

紅蘿蔔酵素：刺激膽汁分泌，中和膽固醇，增加腸壁彈性，安撫神經。

檸檬酵素：含豐富維他命C，止咳化痰，有助排除體內毒素。

柳橙酵素：滋潤健胃，強化血管，可預防心臟病、中風、傷風、感冒和淤傷。

草莓酵素：利尿止瀉，強健神經，補充血液。

梨子酵素：能維持心臟，血管正常運作，去除體內毒素。

蘋果酵素：調理腸胃，促進腎機能，預防高血壓 。

芒果酵素：幫助消化，防止暈船嘔吐喉嚨疼。

鳳梨酵素：消腫怯溼，幫助消化，舒緩喉痛。

木瓜酵素：消滯潤肺，幫助消化蛋白質。

金桔蒜蓉辣椒醬(食譜)

材料

紫天椒   一碗 (怕辣的可減少些)

獨子蒜   三包

粗鹽       八湯匙

金桔       1.5 磅

做法

其實很隨意

先將蒜、辣椒打碎拌勻

分層加入金桔及鹽

蓋上蓋子摇匀即可

**做好後放櫃內2-3 星期可享用的

食譜來源 : 維維媽 http://waiwaima.chiba78.com/articles-13313.html

金桔蒜蓉辣椒醬

早幾日網遊既時候,
我見到有個網友話用金桔黎整蒜蓉辣椒醬。
會有好香既金桔味。

咁我見個食譜唔難整,
同埋我浸完咸柑桔仲有剩,
就一於試下浸喇。

不過要等三個星期才可以收成。
好期待呀。

浸咸柑桔

因為見到街市有柑桔賣,
我就醒起, 我話想浸咸柑桔好耐喇。

所以, 我就決定要買咸柑桔黎浸。
浸左兩樽,
我數過喇,
每樽可以浸32粒。
希望唔會發毛喇。

酵素的收成

唔覺唔覺,
我既酵素已經浸左三個多星期喇。

其實我真係唔知點樣先為之可以收成。

因為我既酵素一直都唔似其他人咁, 嘔好多泡泡。
我d泡泡係好少好溫柔咁。

不過唔理喇, 都三個星期有多喇。
就當佢收成喇。

不過將d果肉拎晒出黎之後,
原來只得返好少架唧。



我同河馬大師即刻試左一杯,
我覺得仲係好大酒味。
河馬大師就覺得酸。

不過我飲左一杯之後,
即刻好眼訓,
可能我係醉酒喇 :p

自家煮雞煲

呢幾日天氣開始凍喇。
尋日河馬大師同我講想打邊爐。
我就突然醒起,
係喎, 我可以試下整雞煲喎。
就買定材料, 留返今晚試整雞煲先。

因為我唔識斬雞, 所以就唔買原隻雞喇,
不如用雞脾肉喇, 其實都係雞黎, 應該無咩大分別。

本來河馬大師係房午睡的,
但我岩岩炒完雞想放上電磁爐果時,
河馬大師突然間係廚房門口出現同我講
「真係痴線架。」
我問佢咩事? 我以為隔離屋又敲牆喇。
之後佢同我講, 咁鬼香, 真係痴線架咩!

我真係比佢激死就真。
以河馬大師既口味黎評分係七分, 佢話佢唔鐘意食雞煲。(其實我一早就知, 但我真係想試下整埋。
但我地食左兩舊雞之後, 我就即刻放湯開始打邊爐。
我再問佢, 咁依家又幾多分呀? 佢話即刻變九分喇。
激死!!!!

不過以唔鐘意食雞煲既人黎講, 我可以係佢身上拎到七分。
即係我個雞煲係成功左喇,
Yeah~~~

浸檸檬醋

我係網上搵到一d關於檸檬醋既資料。
睇落檸檬醋好似對健康唔錯。
又由於我一直都愛喝醋,
我就一於自己試下浸檸檬醋喇。
點知我勁唔小心, 
切檸檬果時竟然切埋自己隻手指。
揸刀咁耐, 
第一次切到自己。
比河馬大師鬧到我狗血淋頭,
嗚嗚!!!

不過估唔到會切得咁緊要, 
第一張膠布滿晒血, 
要換過另外一張新既膠布。
仲比河馬大師整蠱,
話要我舉高隻手一個鐘先止到血, 哼哼。

下面係我上網搵到既資料。
 - 檸檬含大量維生素C、鈣、磷、鐵等。常喝檸檬飲品可美白肌膚，也能使黑色素沉澱，可去斑、清熱解毒。

 - 檸檬含有豐富的有機酸，浸泡成醋對健康有加分的效果。浸泡好的檸檬醋中含有豐富的檸檬酸及果酸，可以讓醋的養生及保健功效更為顯著。

 - 根據專業醫師表示檸檬耐久易保存，且內含豐富的維它命C，能防止牙齦腫脹出血，還可減少黑斑、雀斑發生的機率，並有部份美白的效果，檸檬還有豐富的鈣質，對人體缺乏的維生素能提供高效率的養份。

 - 檸檬與醋同樣具有分解脂肪的效果，這樣看來，檸檬醋的確是能養顏美容的，也是健康食品，飯後小喝一杯讓自己更具元氣，也更美麗窈窕。

 - 飲用後功效： 
1.有保肝解毒的作用，可以很快恢復體力精神充沛
2.能淨化血液、血脂肪、血酸，讓血液恢復酸鹼平衡，血液正常化
3.防止心臟病、高血壓﹝因血液恢復正常﹞  
4.增強人體免疫系統的功能，預防感冒
5.改善慢性疾病，預防腎臟疾病
6.可治療骨骼疏鬆症、偏頭痛
7.可以排除硝酸鹽，防止癌病變
8.可以清除壞的膽固醇
9.幫助排泄系統通暢，可治便秘 

浸野既準備

尋晚我媽咪生日, 
所以夜晚同媽咪食飯慶祝。
食完飯, 我地一定會返媽咪屋企, 
一家人傾計傾過幾兩個鐘先會再各自回家。

每次返到媽咪屋企, 
我都會東找找, 西找找,
看看有什麼我合用的東西。

這次我看到一個吉的玻璃樽, 
我就同阿婆講話我要玻璃樽。

點知我阿婆幫我東找找, 西找找, 
搵到好多個吉的玻璃樽比我。

Yeah!!!
我可以浸好多野喇。

好味燒賣??

河馬大師真係好鍚我,
成日聽到d人話邊度邊度好食,
就會想帶我去,
就算我同佢講, 
你可以同你朋友又或者同事去左食先, 
佢都唔肯。

咁佢話葵芳地鐵站有一間野既燒賣好好食,
但係好食既唔係燒賣喎, 係燒賣既豉油。
佢聽人講話d甜豉油係間鋪仔自己煮既。

剛好要係葵芳坐E32入亞洲博覽館, 
終於, 我有機會試下佢同我提左幾次既燒賣喇。

一食, 有少少失望喎。
因為串燒賣唔係好熱, 
個心只係暖暖地。
再食真d個甜豉油, 
個味都算唔錯既, 
但同我公司樓下果間差不多唧喎,
我公司樓下既燒賣仲要平少少, $5五粒。

我事後忍唔住問,
邊個話你知呢間既燒賣好好食架?
河馬大師答我 : 好多係葵芳返工既人都話呢間燒賣好食, 
仲好多人排隊架。

金坊

其實我同河馬大師成日都去呢間金坊食下午茶,
因為河馬大師好鐘意食呢間既金邊粉。

佢好大碗, D料都好多下, 我次次食完都會好飽。
而且個湯好有味, 河馬大師好鐘意飲個湯,
但成日比我鬧, 因為我唔准佢飲味精湯的。
皆因我有諗過佢地有無落味精,
不過如果落味精既話,食完會好口渴, 
但我食完又唔覺得口渴喎。
如果有人知道, 話聲我知, 等我知道究竟係真係用料足, 
所以個湯好味, 
定係因為佢地落左味精。

我地今次叫左雞絲湯金邊粉同豬手湯金邊粉。
你地估下邊碗先係我既?

開佑喇, 係豬手湯金邊粉呀。
正常黎諗, 女仔都通常會怕肥, 怕油膩, 就一定會選雞絲喇。
但我偏偏相反 >.<  而且豬手好多骨膠原, 對皮膚好嘛。

淘寶買鞋

早幾日係 forum 見到有人分享左佢買既鞋, 好抵好正。

咁我又試下跟佢買, 

搵到佢話既賣家,

我就search下呢對咁抵既鞋。

入到去個價錢無變, Rmb19.9。

抵!

包郵, 抵抵抵!!

拿拿臨淘左,

淘完先諗, 死喇, 咁平, 都唔知會唔會好差料既。

又或者對鞋好臭, 好大味。

一星期後, 經集運終於到我手,

一折開, 

E...無咩伏喎。

真係同張相差不多,

而且d毛都好軟, ok舒服。

後來, 同老公上東門咁岩又見到呢對鞋, 

我就八掛睇下, 見到有個價錢牌貼左50蚊。

我知大陸講野好多都要講價, 

但我諗, 點都無可能講到10蚊掛。

即係覺得自己好抵呀。

比你地睇下賣家既相同我自己影既相做對比喇。

發....毛.....了.....

早幾日我整左d酵素,

係一星期後, 有兩樽酵素竟然..發!左!毛!

嗚嗚 >.<

點解要咁對我呀!!!

好彩暫時只得兩樽發左毛,

其餘三樽都無事, 

但我已經放左係當眼處,

要密切留意呢三樽既發展喇。

其實我真係唔知邊個步驟出錯, 

朋友有話 : 可能我d糖唔夠。

同事有話 : 可能我太早就 "了" 佢。

十分鐘擂台大挑戰

11月10日

因為我岩岩呢個星期牙齒出現問題, 

所以我想買聲波既電動牙刷。

行下行下, 

見到震震板間鋪竟然無人玩緊,

咁我就捉河馬大師入去睇下,

因為我真係好奇, 呢塊咁既震震板,

係咪真係唔駛做運動, 企係上面就咁震就可以瘦呢。

無辦法, 因為我太懶做運動,

而結婚之後我竟然肥左三十磅,

真係過份到離晒大譜呀!!!

我心諗 : 如果真係企係度就可以瘦, 

我唔介意每日企返半粒鐘(極限黎架喇)。

我叫河馬大師企上去試下, 再話個感覺比我知。

咁 sales 姐姐見到我呢個肥肥"靚"太, 

就當然唔放過走黎介紹佢呢部震震機比我。

佢就帶左我去另一邊, 同我介紹呢部野,

河馬大師就繼續企係上邊同我試玩。

sales姐姐係度介紹既時候, 

我對眼咁岩望到有個易拉架寫住

「擂台戰! 十分鐘挑戰」

我就即刻問個sales姐姐, 

呢個挑戰係咩黎架?

係咪要買左先可以玩架。

sales姐姐話, 咁都比你留意到呀。

唔駛買野都可以玩架, 你係咪想依家即刻挑戰呀?

我? 梗係唔得喇, 我一分鐘都頂唔順, 我想叫我老公玩。

之後我即刻走去河馬大師度, 同佢講, 你想唔想玩呢個擂台戰呀?

河馬大師問我, 想要邊份禮物?

我問, 如果做難呢個挑戰, 會唔會太辛苦呀??

河馬大師問我, 你係咪想要?

我話 : 如果老公唔怕辛苦, 不如試下喇, 好唔好呀?

咁河馬大師就問個 sales 姐姐

難呢個有無人成功過呀?

sales姐姐話無呀, 

咁河馬大師就講, 想試下難呢個擂台戰喇。

唔好講笑, 真係好鬼難架。

因為塊震震板係一直震住, 仲要拎住對啞鈴。

換左係我, 我估我十秒鐘都頂唔順呀。

係呢十分鐘裡面, 我望左好多次時間, 

我覺得真係好辛苦, 我睇到河馬大師咁, 

我心都痛埋。

我同佢講, 老公, 唔緊要, 辛苦就唔好玩喇。

河馬大師佢話唔緊要。

去到七分鐘既時候, 河馬大師問我依家仲有幾耐先夠鐘。

我話依家已經七分鐘喇, 仲爭三分鐘唧。

跟住佢叫我幫佢抹汗。

佢真係出左好多汗, d汗開始流到眼度醃住,

我即刻拿拿聲想幫佢抹。

個sales姐姐竟然問我, 可唔可以唔好抹住, 比佢影張相。

佢話因為d客人唔信呢個震震機係可以流汗。

咁好喇, 我比佢快速影左兩三張相就即刻幫佢抹汗。

我好不容易, 一邊扮專心咁聽sales姐姐介紹, 

一邊係咁諗, 可唔可以快d夠鐘呀。

呢十分鐘對我黎講, 足足似過左一個鐘一樣。

突然, 河馬大師話:點解部機唔震既??

Yeah!!!!!! 終於完成十分鐘既挑戰喇。

河馬大師成功左, He DID it!!!!

贏左喇贏左喇!!!

佢成面都係汗, 但我都即刻忍唔住鍚左佢一啖。

sales姐姐話佢係第一個成功既人呀。

咁我問sales姐姐, 可唔可以當頒獎俾佢, 比我影張相呀?

sales姐姐話無問題, 不過唔好亂放張相上網。

我話, 我想放上 blog, 但我遮住你個樣得唔得呀?

sales姐姐聽到我遮住佢個樣, 佢好爽快話無問題, 

而且張相佢仲笑得好甜添。

事後1 : 河馬大師話, 真係好辛苦, 係七分鐘果時有諗過放棄。 

但聽到我話仲有三分鐘唧, 佢就諗, 都辛苦左七分鐘喇, 再忍多一陣, 如果唔係就白辛苦左七分鐘。

同埋佢諗起問我想要咩禮物果時, 我選禮物既表情, 係從來未見過我咁想要一樣野既樣, 所以佢先繼續堅持落去唧。

(呢個就係份禮物喇, 可以按條腰都可以按肩頸同小腿。)

事後2 : 尋晚我訓左先, 河馬大師兩點幾睇完波入黎訓果時唔小心整醒左我。

之後我訓唔返, 再諗返岩岩佢咁辛苦, 忍唔住偷偷鍚左佢十多啖, 然後再幫佢按摩對手。

酵素期待中

本來只打算浸奇異果同蘋果。

見仲有樽剩, 

屋企又咁岩有d橙, 

就不如浸埋橙喇,

一次過嘛。

有人話檸檬同蘋果其實可以唔駛去皮, 

但檸檬唔去皮會有苦澀味,

我唔知果種苦澀味自己受唔受到, 

所以呢, 

就各整一樽黎試下。

但蘋果呢, 

我就幾辛苦都打算去皮。

依家d蘋果層蠟好厚, 

就算平時食蘋果我都會去皮, 

所以就辛苦d都去皮喇。

(呢樽係奇異果 + 橙)

(呢樽係橙)

(呢樽就只係奇異果唧)

(呢樽係奇異果 + 蘋果)

(呢樽係蘋果 + 檸檬)

終於搞掂晒, 

加埋有五樽呀。

希望成功喇。

我又浸酵素

最近無聊,

所以想浸下酵素, 

咁其實我未浸過, 

都唔係好識點浸, 

不過唔識都唔緊要架, 

試下又唔會死既, 咪試下囉。

而且我有個朋友都打算浸, 

佢上網都做左好多 research, 

總括上黎講, 一層生果一層糖, 

最尾果層就一定要用d糖黎蓋過晒d生果。

仲有就係唔可以有水, 同d野要消毒乾淨。

咁應該唔係好難唧, 

所以就預備好晒d料開始浸。

我打算浸奇異果同蘋果,

材料易買嘛,

只要去一趟超市就搞掂晒喇。

東門一日遊

有時, 我會同河馬大師上東門行下。

不過都真係行下, 然後就按下腳走人喇。

我地好少係東門買野, 

因為我肥左好鬼死多, 

東門既衫褲我邊有可能岩著。

河馬大師一樣, 都好少係東門買野, 

因為佢話d衫褲唔值佢地開既價, 

又唔想辛辛苦苦講價喎, 所以算了。

平時我地會食細細間既麵店,

好平, 十幾蚊一碗米粉。

但呢d麵店無裝修, 睇落唔會吸引人入去食。

以我地食左咁多次, 無一次見到有香港人(因為我聽唔到有人講廣東話呀)。

但其實有d真係幾好食架。

今次我地無去麵店, 轉場, 去左呢間叫為食館既餐廳食下午茶。

因為我好熱, 麵店成日都唔開冷氣。

我點左個海鮮炒米粉, 好香架。

仲要有大大杯既檸檬茶, 岩晒我呀。

因為我成日都缺水。

而河馬大師叫左個炸雞脾薯條, 同一杯大大杯既紅豆冰。

佢次次下午茶都會叫炸雞脾。

呢個炸雞脾等左廿分鐘先黎, 但點解個雞脾係bb雞黎既!??!

而且杯紅豆冰, 似奶水多d喎。

北上按摩

10月27日

我屋企人一向喜歡即興。

尋晚我們一家同我爸爸預祝生日飯既時候, 

我媽媽話今日同爸爸去深圳按摩。

家姐聽到就問好唔好, 然後家姐同媽咪講講講, 之後佢地就話今日一齊上去喇。

然後, 家姐送我地返屋企既時候就問我地去唔去。

我話睇下起唔起到身先, 起到身就會去。

如果我無打比佢, 即係起唔到身就唔去喇(其實我個意思係我唔會去架喇)。

點知今朝, 我媽咪晨咁早打黎問我出左門口未。

我仲訓到懵懵下話, 出門口做咩。

佢反問我, 咩你唔係去按摩咩?!

我好想問, 我幾時有話過我今日會同你地去按摩喎???!!!

但佢咁樣打比我, 即係想叫埋我去唧。

同埋, 我都慣晒我屋企人架喇, 

佢地成日都即興去做一d野, 然後又要你陪喎。

我同佢地真係好唔似, 我成日都要 plan 好點點點...不過對住佢地, 係永遠都無得 plan 架, 最初河馬大師真係好唔習慣我屋企人咁樣, 但因為同左我一齊都咁多年, 佢都已經習慣晒喇。

咁我就問下河馬大師去唔去。

河馬大師話, 其實尋晚我陪阿婆聊天既時候, 

家姐已經叫左佢去好多次喇。

咁OK喇, 咁一齊開開心心去按摩喇。

其實呢間按摩係福田關口附近, 行幾分鐘就到, 

唔係咩大場, 不過我媽咪話按過佢, 佢覺得舒服。

去到都中午, 家姐話食左飯先。

就係按摩中心樓下既酒樓食個午飯。

點心一般, 小菜OK, 只是油多了點。

在食飯既過程中, 成日都搵唔到服務員, 

就係咁既情況下, 我媽咪又同隔離枱既茶客聊起天來,

個茶客話佢返左黎住好耐喇, 

叫我地唔好當香港既酒樓, 咩都當自助就好喇。

食飽飽,

就上去按摩。

首先按腳, 我坐個位個電視係廢架, 轉唔到台。

只睇到足球台, 激死人呀!!!

首先講下按腳喇, 1票舒服 VS 4票唔舒服。

我媽咪仲迫我家姐寫左30蚊小費。

好喇, 按身既。

1票唔舒服 VS 4票舒服

果一票唔舒服既係我呀, 我媽咪仲專登留左佢話好得既按摩師比我。

但係, 按得我好痛呀。

我地係按中醫推拿, 佢話我D骨坐到有D歪左, 要幫我推返好。

同埋佢話我一定係成日對住電腦, 

又話我塞晒, 所以輕輕一推我都會痛。

不過好彩, 我話痛果時, 佢都唔會狂推

(我之前遇過一個, 見我唔叫出聲, 就狂推, 好似要聽到我叫出聲為止, 好變態呀。 但我慣左就算好痛都唔會大叫架嘛, 我怕丑呀, 我會忍住, 再叫佢細力D咁囉。)

但佢都好盡責, 真係足鐘無偷懶。所以我寫左60蚊小費比佢, 之後我媽咪又偷偷塞左四十蚊港幣比佢。

(未去按之前, 我背脊唔知係扭親定咩原因, 已經痛左兩星期, 但按完大約三日後, 背脊好痛個位真係唔再痛喎。)

之後換衫出去, 我同家姐見到我媽咪比左$40小費沖涼房果D開LOCKER門阿姐。

去食晚飯果時, 我家姐就忍唔住話我媽咪, 駛唔駛比咁多小費果D阿姐呀, 
怪唔得人地個個都認得你, 當你貴賓喇, 咩都無幫你做過, 
只係幫你開個 LOCKER 門同你走果時比杯水你, 就有$40小費, 比我都認住你喇。

我媽咪話: 唔係呀, 果D阿姐好可憐, 無人工架。

我家姐話: 無人工鬼同你做咩, 佢講你就信。

我媽咪話: 就算有人工都好少, 佢地要靠小費過活架。

我家姐話: 係入面果d腳底按摩按生按死咁辛苦先得果廿蚊小費, 呢D開開LOCKER門比杯水就40蚊, 咁比我都做開門阿姐就算喇, 仲邊有人同你按摩喎。

其實, 講真我都覺得媽咪比$40真係有D太過喇, 我覺得比$10都已經好夠。
因為我次次去, 都唔覺得佢地有招呼過D咩,
想沖涼都要自己問佢攞衫同毛巾, 剩係識得不停問你要唔要刷背。
有時想搵個人都難, 成日呢埋一角係度吹水。

不過呢, 當見到你換衫, 知道你要走就好積極, 拿拿臨拎杯水同個碟比你(個碟上面放張廿蚊港紙)。

我通常連水都唔拎, 自己走人。

唔係我孤寒, 係我覺得佢地真係唔值我比小費。

按摩完都夜喇, 而且因為同爸爸媽咪一齊, 所以我地係福田食埋晚飯先走。

但呢間酒樓就無今日lunch果間好食, 而且d油仲多過下午果間。
仲要好搞笑咁, 我地點左花螺同大隻既花甲。
大約過左45分鐘, 有個經理走黎同我地講, 花甲同花螺都無晒喇。
咁我地都食到七七八八, 就諗住算喇, 食完就走, 所以叫經理改單, 
點知經理準備去改單既時候, 突然有個傳菜拎左碟花甲出黎。
下!  你地唔係無晒花甲架咩?!?!
點解又突然有既, 不過我地點菜既時候問過經理係咪大大隻既花甲, 但呢碟係細細隻既花甲囉 >.<而且仲要有沙架, 嗚嗚嗚~~

走完, 都差不多八點喇, 起程回家去, 因為明天還要上班呢。

蒜蓉 Diy

結婚之後, 其實我都成日煮飯既 (不過, 最近無煮喇>.<)。

所以, 我地兩個都食到越黎越肥。

咁煮餸既時候, 好多時我都會用到蒜蓉, 

落左蒜蓉去煮餸, 真係香好多架。

但依家樽裝既蒜蓉真係越黎越貴呀,

所以我就諗緊可唔可以自制呢?!

上網一 search, 原來都有好多人自制架喎。

咁我都試下先。

原來自制蒜蓉好簡單, 

只需要蒜頭同生油就可以, 當然唔少得裝蒜蓉既樽喇。

首先 : 分開晒d蒜頭 , 然後要將佢地去衣。

因為我無買果d好方便去蒜衣既工具, 所以我要逐粒逐粒 "met", 但原來都好辛苦的。

所以, "met" 到後來, 我上網睇下有無咩方法可以易d "met"

原來, 將粒蒜頭用刀背拍幾下, 就比較易d可以去衣架。

我將d蒜頭去晒衣之後, 覺得個蒜頭既頭部好樣衰, 啡啡色咁, 所以我切晒佢。

順便逐粒檢查下, 個蒜頭根部有無綠色既芯, 如果有就清埋佢, 如果唔係, d蒜蓉就可能會變綠色, 唔用得喇。

蒜頭清理乾淨之後, 就可以放落攪拌機裡面喇。
其實蒜頭唔駛洗乾淨, 因為本來佢已經有好多衣包住, 除非你d蒜頭掉晒落地整污糟喇。
如果真係用水洗乾淨之後, 一定要風乾先得, 唔可以濕水, 因為濕水會發霉。

攪拌到咁上下, 我就加少少雞粉同鹽, 然後再攪爛d。

如果唔鐘意咁爛就唔好攪拌咁耐。

整完, 可以入樽。
入完樽就落生油,d油要蓋過晒d蒜蓉就大功告成。
不過我就落橄欖油, 香d嘛。同埋我有用匙攪下佢, 因為我怕d油流唔到落底。

最後, 梗係放入雪櫃喇, 以免變壞嘛。

呢樽蒜蓉, 我已經放左入雪櫃兩個星期喇。

因為, 河馬大師突然話想食粉麵, 同埋我呢排都好懶唔想煮飯。