尋找晚裝中........

經過上次係愛華試左咁多婚紗之後, 我又比左D相我屋企人同朋友仔睇。
佢地都話我上次已經 hold 左果件好睇, 叫我唔駛轉款喇。
所以, 我估我婚紗都係選愛華喇。

不過, 我後來睇 blog 發現, 原來 blog友 kitkit 都係選呢一件婚紗添, 哎呀~~點算呢!?!?

晚裝呢, 佢既晚裝真係好唔得喎, 我真係唔鐘意呀,
所以, 我決定下次同媽咪去愛華選媽咪衫既時候再睇多次晚裝。

不過, 我都會去其他地方睇晚裝喇,
我同河馬大師相量, 亦深深比佢知道, 我真係唔鐘意上次果兩件晚裝,
咁佢話陪我再搵, 所以,
如果你地知道邊度有平靚正既晚裝, 話聲我知丫。
等我去睇下。

我只係想租兩件晚裝唧,
一件迎賓, 另一件係敬酒+送客。

本來我諗住敬酒一定著大紅色既。
但因為註冊都要著褂既關係, 所以, 敬酒唔駛大紅色喇, 只要係紅色系都可以, 除左粉紅色囉, 因為未來奶奶唔鐘意呀。

係呢? 下面呢件晚裝用黎敬酒好唔好睇呀??

婚紗之旅於元朗

(續上文)

離開愛華後, 我就諗, 不如去雅麗喇。
但係因為雅麗搬左, 唔再係地鋪, 我又唔係好知佢搬左去邊喎, 上網 check check,
原來搬左去中旅樓上唧。
咁ok, 我都識去既。

去到, 我問佢, 我想睇衫, 可唔可以試埋。
好彩, 因為仲試身室可以試, 咁佢就比我試衫喇。
咁我首先就選婚紗先喇。
我試左3條婚紗,
一條魚尾, 著上身先知 >.<
一條直身, 同埋一條蓬蓬裙的。
唔駛諗都知我著頭兩條一定唔好睇, 我係要著有撐裙果d婚紗先好睇d。
咁係試之前, 店員已經同我講, 件婚紗係要加錢的, 加$680。
我話ok, 如果鐘意就無問題的。
咁我試左呢三件婚紗之後, 我唔想再試婚紗喇, 因為我覺得都唔夠岩岩愛華果件靚。

咁愛華既晚裝唔靚嘛, 咁我就諗, 或者我可以係呢度租晚裝架。
咁我試左一件藍色既, 係一件好淺既粉藍色, 我著左上身。
未問河馬大師我都已經覺得唔夠岩岩愛華果件 "海上的寶石" 靚。
然後對眼望望河馬大師, 佢就已經比左答案我。

咁好喇, 不如試下紅色先, 咁我試左佢4條紅色, 有一條我覺得真係好睇呀,
因為著到我好瘦, 超瘦呀。
我上雅麗既網偷左相落黎, 我無記錯, 著得我超瘦既紅色, 好似係呢件。
不過呢件, 又唔係拖尾, 佢都要加我錢, 印象中係加 $280。 我又覺得好唔抵呀, 點解唔係拖尾都要加錢喎。

咁佢問我有無岩, 我話無呀, 我只係對呢條紅色有d興趣唧。
佢話, 咁要再試多d, 搵多d先會有機會搵到自己鐘意架, 就咁試幾件, 好難就好快可以搵到自己鐘意既。
佢既意思即係唔介意我繼續試, 但係, 我已經睇過下佢既衫, 無咩邊件我想試喎, 咁點算好呀。
同埋我又唔鐘意佢既標價, 因為佢每條既價錢都唔一樣既。
即係我 join 左佢既 package 我都唔會有一個預算, 因為佢係唔係拖尾都可能會加錢。
我覺得咁樣好煩, 我自己唔鐘意咁囉。
我最憎呢d, 所以, 我話, 唔好意思呀, 搞左你咁耐, 我或者出去睇下其他店再諗諗先。

咁佢話好, 如果到時想再返黎時都可以, 不過記得約時間。
我話, 好呀好呀, 唔該晒, 就走喇。

其實試過既衫, 我上佢既網站搵唔到, 果時仲未學識偷影 >.<

禮服....唉!!!

其實我都知我做野慢架喇,
但係我唔想架嘛, 因為我要等河馬大師得閒, 我先可以去睇衫, 如果唔係, 我睇左佢唔鐘意, 我都唔會著架喇,
因為我實在太聽話喇。

咁講返我睇衫既野先喇。
有一日, 我朋友同我講, 問我去左睇衫未, 我話未呀。
咁佢就講喇, 咁你幾時去睇衫, 你就叫埋我去, 等我幫下你眼嘛。
咁我話好丫。唔該晒先喎。

然後有一日, 我突然間醒起, 我就打電話同佢講,
我或者遲d去睇衫喎, 你係想我已經選定一間既時候先搵你陪, 定係我自己搵緊既時候你都得閒陪我呀?
朋友就答我 : er...你選定一間既時候, 我先搵你喇。
咁我話好喇。

再有一日, 我係元朗同河馬大師食緊 lunch 既時候, 見無咩野做, 突然間想去睇衫, 咁我地就去左睇衫喇。
我地呢一日只係去元朗既婚紗店, 我地幾間都睇晒相薄, 當然有兩間出名既, 我地都有試左身, blog文後補。

咁試完之後, 我當然唔係好滿意喇。
咁我同佢講, 我仲未搵到衫, 因為d衫都唔靚, 試上身都唔好睇, 又或遲d出尖沙咀既婚紗街睇下。

跟住, 佢竟然咁樣同我講 :

車~~邊個叫你試咁多間唧, 你試咁多間梗係搵唔到架, 你試咁多你都花多眼亂喇。就好似你試妝一樣, 你因為試得太多, 你先要搵咁耐之嘛。

我聽到, 心裡面即刻 O 嘴, 然後我扮老細叫我, 就話, 咁我自己再睇下先, 唔傾咁囉。

但係, 我係唔想同無心情同佢傾落去囉。
我真係有好大既一個疑問, 我試咁多次妝, 都係我自己去試唧, 我好少主動叫人陪我去架喎, 同埋, 我係真係覺得唔好, 所以我唔 join, 而唔係個個都好而唔知點選喎。

同樣地, 係佢主動話陪我去睇衫, 不過最後佢都無去到呀, 咁我有煩到佢咩?!?!
而且我都只係去左元朗一個地方, 兩間婚紗店試衫之嘛, 咁樣又幾有咁花多眼亂呀?!?!?
花多眼亂既意思唔係話, 樣樣都鐘意唔知點選先會咁樣黎形容架咩???!!!
依家我係件件都唔鐘意喎, 無一件我真心選得落手喎。
咁我依家又唔係下星期就結婚, 點解要我是是旦旦選一件喎。
定係, 因為佢當年結婚, 佢就係用其中一間婚紗店既衫, 所以我話唔靚, 佢覺得我彈佢既品味呢??
但係都咁多年, 就算佢當年既衫真係靚, 咁多年咩都唔同喇。

唉~~諗住佢結過婚, 佢係過來人, 佢應該會明白我既心情,
點知.....真係讓我意想不到。

P.S. 元朗婚紗之旅應該今晚會寫, 因為依家無相係手, 寫唔到。河馬大師今晚要應酬, 無時間陪我, 我實在太多時間可以寫喇, 哈哈。

婚紗之旅於尖沙咀

2月6日

今日因為要去婚姻註冊處選時間, 所以我一早就請左假。
本來可以只請半日假的, 但係我懶, 唔想喎。
而河馬大師又說, 他今天開完會之後, 可以偷走出黎陪我, 咁我就梗係更加唔想返工喇。
所以呢, 我搞掂註冊既野後, 就去我家姐公司坐一陣, 同家姐既同事吹下水,
又比佢同事笑我, 點解成年前就已經聽說你減肥, 你減到依家都係毫不進展既

等到河馬大師開會完, 我就即刻拿拿聲落尖沙咀會合河馬大師。
正好我地係婚紗街附近食lunch,
所以決定同佢食完 lunch 之後, 不如又睇下d 婚紗鋪喇。

今日, 只睇相薄既有幾間, 而我有試衫既呢. 有兩間喎。
無辦法, 河馬大師只係偷走出黎, 所以佢4點半咁上下就要返公司喇。
今日係街無得拖手, 因為怕比佢同事撞到, 哼。

今日第一間試既鋪頭叫做 "Rosebay"
佢問左我婚期, 我講左比佢知, 佢話我都好急下喎。
問我點解咁遲都唔選衫, 我反問佢點解咁急, 咁急到時又要轉咪仲煩,
可能轉款又要比轉款費喎。
佢話, 如果太遲, 可能你鐘意既款比人 hold 左嘛, 不過佢話我5月, 唔算旺, 都唔驚既。

我睇下佢既相薄先, 其實呢間鋪好細間, 衫款真係唔算多, 不過個人幾好, 幾有禮貌。
一婚紗一男禮既 package 係 $3988, 不過即日 join 就減$500。
因為佢比我 free 試兩件喎。
咁我就選下有咩鐘意既婚紗先喇,
我選左一件婚紗, 睇相我幾鐘意架, 不過河馬大師話我著呢d唔好睇, 因為我唔夠高。
然後, 經店員既介紹下, 我選左兩件, 而其中一件就係類似我鐘意既款式喇。
咁就當然試左類似果件先喇,
著左真係唔好睇, 顯得我個 pat 太大喇。
然後另一件, 係店員介紹既, 蓬蓬地果d。著落又真係比第一條好睇d喎。
不過, 都唔係我想要既野囉。
其實佢既款著到我條腰都幾修架, 佢話因為佢地自家設計師設計的,
所以, 佢有一系列係要加 $500 的, 當然我岩岩試果兩件都剛好係 +$500 的系列喇。
不過唔關錢既問題, 而係, 其實真係唔算好鐘意囉。
而且佢既晚裝, 我搵唔到岩心水既, 係果刻我係諗,
要分咁多間拎衫還衫好似好辛苦喎。
所以, 我禮貌地同佢講, 比少少時間我諗諗, 因為我想試埋其他先再決定。

而佢都好有禮貌的說, 唔緊要, 你考慮下先。

這是值得一讚的, 因為禮貌呢樣野, 原來真係唔係人人都有架, 哈哈。

以下圖片 copy from 佢公司既網頁。呢條就係我話我有少少鐘意既款。

情人節快樂之金都晚裝

情人節快樂~~
雖然遲左少少, 不過應該都無人會介意既。

最近公司好忙, 部電腦又成日 hang 機, 想偷偷地上黎寫埋果 d 試衫 blog 都唔得添。
我偷影左好多試衫相添架嘛。

今年既情人節, 係我以單身身份過的最後一個情人節喇。
不過我同河馬大師都無咩點特別慶祝。
因為, 只要和心愛的人在一起, 日日都可以係情人節嘛。

今日放工之後, 我地要去純美拎成長片段既 demo, 所以就順便行下金都,
睇下有無岩我既晚裝喇, 因為我仲未搵到岩我既晚裝呀。

其實我呢兩日都有上淘寶睇下晚裝, 考慮緊好唔好買條落黎算架。
不過, 河馬大師話, 都係行下睇下先, 因為可以試著嘛。

咁我係金都行行下, 竟然見到淘寶貨喎。
呢條裙, 我見到最平既賣家好似賣一百一十幾蚊人仔。
而有一個賣店, 4皇冠既, 賣rmb13x, 係量身訂做同包郵喎。

咁我見到有喇, 我梗係多口問句佢比唔得我試喇,
點知個店員態度唔係咁好囉, 佢反問我, 係唔係有誠意租先,
租價就 $800, 全新買走價就 $1980。
嘩嘩嘩!!! 佢食水會唔會太深呢???
佢仲話, 佢d衫唔係隨便比人試架, 要真係有誠意租先會比我試喎。
佢都傻傻地, 咁你不如話d衫無得試, 除非開左 package 喇。
咩叫誠意唧。

之後, 我落一層, 又見到呢條裙喎,
今次呢間就比我試喇, 咁我當然試下, 睇下自己著得好唔好睇喇。
可惜, 我實在唔適合著呢類裙, 我太太太太太矮喇,
所以著得一d都唔好睇。
不過都好, 至少可以比我死左呢條心嘛。
呢間既租價 $780。

婚紗之旅於觀塘 (下)

續上文 :

係果間試完走左之後, 再睇一睇手機既banner, 睇下仲有邊間。
今次終於有影低個店名, 叫藝心。

因為果時已經六點了, 我怕因為除夕夜, 婚紗店會提早關門, 所以我地就打電話去問一問先。
店員說沒問題, 叫我地上去參觀。

上到去, 已經有一對客人睇緊, 亦都有一對客人準備離去。
嘩, 好似好忙咁喎。
佢間店好大間, 個空間好闊落。
首先我地坐低, 睇相薄先。

唉~~~d相薄既衫老土都爆, 我覺得係幾年前既款囉。
果刻, 有諗過即走。
不過睇緊相薄既時候, 疑似經理同我地講, 有好多新款都趕唔切影相, 不如你話比我知你地鐘意咩款, 我拎出黎比你地睇喇。
咁我就即刻講 : 我其實就係想睇你banner果條鮮紅色敬酒裙, 我係為左呢條裙先上黎你地間店。

咁佢就即刻拎果條裙出黎比我睇。
然後其中一個店員, 就同我講, 我地可以免費試三件, 然後又即刻再講, 如果咁鐘意條裙, 不如即刻落訂開個 package, 咁你就可以任試架喇。
我心諗 : 頂, 你唔係覺得我咁白痴, 你有三件free試衫, 我連試都未試就走去開package呀??
個疑似經理聽到個店員sale我地 package 既時候, 就即刻加把嘴講, 如果你今日落訂, 我就比個優惠價你, bababa....一輪嘴咁講, 然後話送多一件比我地。

我同河馬大師, 超級唔鐘意呢種感覺, 我地最憎最憎比人強迫買野既感覺。所以, 我地梗係話, 諗下先喇。
個經理可能 feel 到, 我地難應付, 所以主力對返另一對客人, 因為我都覺得果個準新娘已經蠢蠢欲動了。

然後, 佢店裡既其他店員都有不停問, 我鐘意咩款。然後我就話, 其實我個人好易相處架唧, 最緊要我男朋友有靚衫著, 佢要求好高既。
咁佢地就改攻河馬大師, 其實河馬大師同我一樣難應付, 我可以話, 佢比我更難應付, 原因係: 我對河馬大師好 "言聽計從" 的。所以如果佢都ok, 佢都覺得我係呢間會選到衫既話, 咁我又邊駛煩呢。

咁佢地, 諗住男客人一定易於應付, 所以個經理又返轉頭黎, 係度讚河馬大師喎, 又話佢似明星, 又話佢身型好, 又話佢一d都唔矮, 然後話有一套男禮, 一定超級適合河馬大師的。
就話一於試上身睇下喇。咁個店員問河馬大師幾腰, 問佢係咪32腰, 河馬大師勁嬲, 因為佢只係30腰之嘛。話佢32, 咪即刻話佢肥囉, 咁河馬大師又點會開心喎, (嘻嘻, 地雷已放好位置了。)
然後佢拎左果套所謂好型既男禮比河馬大師試, 我睇見, 哈哈, 超大件囉, 簡直衣不稱身, 個西褲仲係穿左個洞的 (地雷已引爆了。)

ok, ok, 咁換我喇。
佢地不停拿一些佢地話新返既婚紗比我睇, 我想講, 好唔得呀, 因為我岩岩已經試左件算做得得地既婚紗, 咁睇佢既婚紗就有比較喇。所以佢大約拎左5件出黎比我睇, 我都唔鐘意囉。 我話唔緊要喇, 不如你比我試果件紅色既敬酒晚裝, 如果我真係好鐘意, 或者我只租果件都ok架嘛。
咁換我試喇喎, 因為無準備之下, 佢借左佢既 girdle 比我, 然後再幫我著左果條紅色敬酒衫,
嘩! 我竟然可以拉晒成條拉鏈, 而且岩岩好fit晒喎。但係........我一試上身, 我就即刻知道, 我唔會租喇, 唔係因為唔靚, 老實講, 我覺得ok架, 因為係我鐘意既敬酒衫嘛, 而且河馬大師同我都覺得, 我著得都ok既, handle 到件衫喇。不過, 件衫真係舊到阿媽都唔認得囉, d衫邊脫晒線, 扳晒既, 咁你叫我點租呀, 我唔得佢咁舊囉。
咁因為仲有兩件可以 free 試, 個店員又一直叫我試佢拎出黎既藍色晚裝, 河馬大師都叫我試下喇, 咁好喇, 我又試下果件藍色晚裝。
em.....一般喇, 頭先果間件銀色靚d喎。
咁仲有一間, 佢叫我不如試下婚紗喇, 但, 我決定放棄喇, 因為我好肯定地跟自己講, 我唔會係呢間租, 咁就無謂晒時間試埋件婚紗喇。
本來打算走的, 但閒談中有傾到姊妹裙, 咁佢又叫我睇一睇佢既姊妹裙, (因為果刻仲未決定join come2me的), 睇完, 又係一個字, 舊。
問佢幾錢, 佢同我講, 租短裙 $250 一件。
嗯, 好丫, 真係唔該晒喎, $250, 我可以買喇。

就咁, 我地就離開左呢間婚紗店。

因為已經八點了, 所以沒有再去最後一家婚紗店喇。
多謝河馬大師捱肚餓陪左我咁耐呀, 鍚晒你

婚紗之旅於觀塘 (上)

2011年12月31日

今日, 我本來係約左上 come2me睇姊妹裙的,
亦都無諗過今日會試婚紗, 所以完全無準備的,

點解, 我5月5日結婚, 但係我一直都無睇過婚紗呢?!
係因為之前同肥公主 msn 既時候, 我地諗住一齊睇,
睇下可唔可以一齊試, 大家比d意見大家,
但係因為之前肥公主要考試,
所以我就等佢考完試先,
(不過考試完之後, 我地都好似無左件事咁, 可能我地兩個都唔係主動既人掛)

咁我地出左地鐵站, 行去 come2me既路程中,
見到好多婚紗店既 banner, 然後我就問河馬大師
「我地要唔要上去睇下d婚紗呀?」
「好呀, 還掂陣間都無野做。」
咁河馬大師就用手機影左四五間婚紗店既 banner。

去完睇姊妹衫後, 我地就睇返果幾張banner,
出發去第一間, 不幸地, 沒開。第二間, 男人看店, 隨手睇左佢掛係度既衫, 走人。

第三間, 我好大意唔記得佢個名 >.<
上到去, 佢比左個 ipad 我睇佢既衫相先,
然後叫我 mark 低, 有邊d婚紗晚裝想睇現貨。

咁我同河馬大師好比心機咁睇, 睇晒佢ipad果度d相,
好老實說, 沒有特別特別鐘意的, 不過都有兩件晚裝同一件婚紗想睇現貨的。

咁我講左比佢知, 佢就去搵左果兩件晚裝比我睇。
第一件係金綠色的晚裝,
第二件係銀色既晚裝。
然後, 再叫佢拎多一件婚紗比我地睇。

點知件婚紗拎出黎之後, 我發覺完全唔係我想要既款。
咁佢問我, 其實有無想要既婚紗款呢。
我唔識形容, 我叫河馬大師形容比佢聽。
河馬大師一直同我講,
其實我心目中本來就已經有特定鐘意既款式, 只係唔識講出黎唧。

之後個店員, 就拎左我大約想要既款出黎比我睇,
然後, 我問佢, 我可唔可以睇下你掛係度既婚紗。
佢話ok, 無問題。
咁我就同河馬大師一齊睇, 我差不多睇晒佢店裡面掛係度既婚紗,
我大約指左幾件叫佢拎出黎比我望一望。
望完晒之後, 只得一件我係覺得較為好的。
個店員就同我講, 我可以 free 試三件再決定。

本來我想試果兩件晚裝同我岩岩選既其中一件,
但係, 佢果件金綠色既晚裝好窄,
因為上手租既人一定好瘦, 條裙窄到我點都著唔落既, 我只係係鏡前度一度唧。
咁店員話, 不如我選多一件。
但係我真係諗唔到仲有邊件可以試, 所以就試左果件銀色晚裝先。都ok既。
然後試婚紗, 試完婚紗之後, 河馬大師再次係我著緊既婚紗度解釋比店員知, 我係鐘意咩類型既衫。
店員聽完之後, 佢話明白, 然後話拎一件好靚, 我一定會鐘意既婚紗比我試。
試埋店員拎比我果條之後, 發現又真係比我之前試既婚紗好睇喎。
我試下形容一下條裙, 係拖尾, 裙邊係lace的, 裙後面係一對or一條龍鳳?? 好閃的, 前面心形胸, 腰的線條位好明顯。大約就係咁上下喇, 其實我都知我形容得好差架喇, 哈哈。

試晒之後, 當然就問package喇, 印象中, package 既價錢係$5xxx, 一婚紗, 一男禮, 兩晚裝。拖尾婚紗加$500, 水晶男禮加$500。水晶男禮既意思就係我好早之前post過河馬大師既試衫相, 果d係金都租$980一套果d。
抵唔抵, 就真係見仁見智, 不過我就唔會係呢度租。一來, 佢既價錢都吸引唔到我。二來, 佢既衫到唔係幾吸引到我, 所以, 我唔會考慮。

婚紗之旅

我岩岩先發現,
原來我除左第一次試衫既出師不利之外,
就無寫過關於試婚紗既blog呀,

其實, 我又唔係完全無睇過婚紗,
如果只係睇相薄, 我都睇左幾間架。

如果有試衫既, 原來我都有試左六間。
不過大家都知道, 好多婚紗店都唔會比我地影相,
所以, 通通都只係靠記憶, 同埋所有既blog都只會係文字喇。

不過, 後來我地終於試下偷影, 終於, 有一間偷影到相喇,
哈哈....

我決定只想睇薄又或者睇過衫無試既婚紗店唔寫喇,
因為真係無咩好記。

我就將試過既婚紗, 靠我記憶寫一寫當時既感受喇。

同公司請婚假了

今日, 我公司春茗。
同事都處於興奮狀態,
因為4點半就執野跟公司車去打保齡後再食晚飯。
當然, 好多同事都無帶飯喇, 怕麻煩嘛。

所以, 我就襯住 lunch 既時間, 入去搵左阿大,
同佢講, 我打算請兩星期假, 因為我要結婚。

我阿大答得我好搞笑。
兩星期咁多呀, 果時應該差不多要核數喎。
er...不過唔緊要喇,
結婚又無理由唔比你請假既,
蜜月旅行就梗係結完婚去架喇,
好喇好喇, 你寫紙出我喇。

然後我即刻入假紙比佢。
佢見到, 嚇一跳 : 嘩!  咩咁快既。
(嘻嘻, 打鐵襯熱嘛。)

然後, 係食春茗期間,
我阿大見我去拎甜品,
佢竟然講 : 你仲有三個月之喎, 你唔駛 keep 下呀?!?!?!

好衰架, 連阿大都笑我肥豬仔喇.....
不過我即刻講, 唔緊要喇, 我另一半都唔介意, 你就由我喇, 哈哈。

春茗完畢, 見個個都咁開心,
而我又難得終於見到老細,
我當然為我自己謀福利。

我就膽粗粗咁同老細講 : 老細, 公司可唔可以有婚假呀?
老細講 : 我結婚喎。
我就同老細講, 唔係呀, 係我結婚呀, 今年5月結婚呀。
老細 : 咁你同xxx講喇。
唉~~同xxx講即係無喇,
可憐我既年假完全無晒喇, 仲要no pay添......

倒數三個月的進度表

唉~~
真係好唔想寫呢個進度表,
因為我好似無咩進度咁, 哈哈

Thomasina & Jerry WEDDING
2012/5/5
婚 禮 進 度 表
- 婚 宴 -
婚宴場地:	皇廷匯
婚宴席數:	10 - 15圍
婚宴菜單:	未定
當日流程表：	未開始
- 出 門 / 回 門 -
出門地點:	北角
出門時間:	早上9點至11點
回門時間:	2012年5月6日
回門豬：	酒樓送
- 喜 慶 儀 式 / 用 品 -
過大禮日期:	2012年3月31日
過大禮時間：	早上11點
過大禮禮金:	傾掂數啦~~^^
過大禮用品:	未定, 打算利是代替
安床日子：	2012年5月3日
安床時間：	早上9點至11點
安床人選：	要問下, 唔知要搵咩人
安床用品：	未知
上頭日期：	2012年5月5日
上頭時間：	凌晨12時
好命佬:	可能佢阿爸
好命婆:	可能係阿姨
上頭用品：	未買
美心西餅卡:	已買150張
奇華唐餅卡:	已買60張
嫁妝：	係咪即係金器? 未來奶奶有一對, 我阿媽話可能買一對, 我家姐都話可能買一對
回禮利是封 ：	原來酒樓有送
喜字貼紙:	未買
龍鳳被:	已買
新睡衣:	未買
男女家對聯:	未買
紅傘:	未買
囍字跪墊:	未買
敬茶茶具 :	有了, 一套龍鳳茶具
- 註冊事項 -
註冊地點：	紅棉路註冊處
註冊時間:	早上11點半
戒指枕:	萬福送
結婚證書套:	打算 Diy
羽毛筆：	未知, 應該註冊處有提供掛
結婚介子：	已買 - 萬福
- 晚宴項目類 -
場地佈置：	酒樓有
席前飲品	酒樓包
席前小食:	酒樓包
紅酒:	打算係佢朋友公司代訂
結婚蛋糕 (假):	酒樓包
結婚蛋糕 (真):	酒樓包
Table No. Card:	未定
Welcome Board:	未定
賓客名單:	未知, 要問父母
賓客坐位安排:	未預備
Photo Frame Stand:	酒樓提供
囍帖:	酒樓送 - 已選, 等對稿後就可以印
進場前 - 成長片段	未準備, 但純美和酒樓都有送
席前 - 婚紗 MV	王子
司儀:	Sean
進場音樂：	未諗
上乳豬音樂：	未諗
敬酒音樂：	未諗
婚宴Background音樂：	未諗
合「緊」杯：	未買
進場花炮：	考慮
遊戲：	未諗
遊戲獎品：	未諗
音響設備：	酒樓提供
簽名布:	王子和酒樓都有送
簽名筆:	未諗
接新娘遊戲:	未諗
回禮禮物:	打算唔送喇, 因為諗唔到有意義既野
- 攝 影及 錄 影 -
婚紗相:	(1) 王子 (已影, 已拎相)
	(2) 百年 (已影, 未拎相)
婚禮攝影錄影:	純美新娘 - Kenny & 福喜哥
- 新 娘 / 新 郎 / 伴 娘 化 妝 及 配 飾 -
新娘化妝:	Cindy@Makeup Secret
新娘婚紗晚裝 - 頭飾/首飾:	Makeup Secret
新娘婚紗 - 頭紗:	Makeup Secret
新娘婚紗 -  手套:	淘寶買左兩對
- 姊 妹 及 媽 咪 化 妝 -
奶奶化妝:	Makeup Secret
媽咪化妝	Makeup Secret
伴娘化妝	Makeup Secret
姊妹化妝	Priscilla
- 禮 服 -
新娘婚紗:	尋找中
新娘晚裝:	尋找中
新娘裙褂:	永隆繡莊
新郎禮服:	應該也是愛華 - 半 confirm
媽咪衫:	愛華 - 未 confirm
奶奶衫:	愛華 - 未 confirm
姑仔衫:	愛華 - 未 confirm
伴娘裙:	愛華 - 未 confirm
姊妹裙:	Come2me  (已訂未取)
兄弟呔:	尋找中
新娘婚紗鞋:	已買
新娘晚裝鞋	可唔可以用返婚紗鞋果對?
新娘裙褂鞋:	已買
新郎禮服鞋:	已買
媽咪晚裝/裙褂鞋:	已買
奶奶晚裝/裙褂鞋:	已買
新娘Girdle, Nu Bra, 乳貼 & 束褲:	不合身的Girdle - 已買
- 兄 弟 姊 妹 團 -
伴娘 x 1:	Jenny
伴郎 x 1:	阿勇
姊妹團 x 4:	Polly, Yuki, Catherine & Winnie
兄弟團 x 4:	阿傑, Ivan, 毛強, 阿然 & Daniel
- 花 車 -
主花車 x 1:	Benz (已 confirmed)
兄弟姊妹車	未知, 要租一架28座先得
主花車公仔/花:	未諗
花車佈置:	未諗
席後送客旅遊巴	搞掂
- 花 飾-
鮮花花球,新郎襟花,頭花:	未諗
姊妹+伴娘手花	未諗
兄弟+伴郎襟花:	未諗
主婚人襟花:	未諗
- 其 他 -
婚前檢查:	毅力 - 已完成
當日Rundown:	未諗
影相 Rundown:	未諗
主婚車 Rundown:	未諗
兄弟姊妹車 Rundown:	未諗
兄弟姐妹分工表:	未諗
兄弟姊妹午餐:	未諗
兄弟姊妹Task List:	未諗
存放賀禮袋 (有鎖):	未諗
存放金器袋 (有鎖):	未諗
開門利是：	有idea
兄弟姊妹利是：	未定
工作人員利是:	未定
- 蜜 月 旅 遊 -
蜜月旅遊:	已book機票及酒店 - 沙巴 - 新加坡 - 布吉