大大獲

死喇,
今次真係大大獲。

前排咪講到我要做姊妹既,
化妝既問題, 我決定放棄喇,
安慰自己, 自己天生麗質, 掃兩次就算喇。

然後係我既催促之下,
同我不停上網搵D資料比佢,
都應該可以七七八八,
本來打算聽日再傾埋當日既小小細節安排,
日頭接新娘同夜晚飲宴。

點知,
岩岩我阿媽一個電話打黎,
喂, 你既二伯婆死左,
12月出殯, 叫我地幾姊弟一定要去。

下!
咁既情況下, 其實我仲做唔做得姊妹呀?

各位知道既, 唔該答答我。

註: 二伯婆係我阿爺二哥既老婆。 我阿爺同阿爺二哥都已經死左。

做姊妹的預備

因為我要做姊妹既關係,
我預備左好多野喎。

因為我自己岩岩結完婚喇,
我知道結婚有好多野好煩,
所以, 我當然唔會煩到我個同學仔。

果日去做完姊妹裙之後,
因為肥左好多, 所以,
我既事業線就更加明顯,
搞到其他姊妹話,
點解我可以咁誇張,
其實呢d我都唔想既。

但係要我減肥咩, 我又知道我一定唔可能架喇。
而且得返一個月既時間,
我又邊有可能減到肥喎。
所以, 我當然會搵野遮一遮。
而因為咁, 我買左件毛毛披肩。

又因為我自己無高踭鞋既關係,
其實唔止高踭鞋,
連女人一d既鞋我都無架。
我只得 cons, 同波鞋,
同埋結婚時果兩對囉,
似乎我唔應該著結婚時既高踭鞋,
所以, 我又去左買一對白色既高踭鞋。

點知, 最大既難題難到我了。
因為我既舊同學係唔包我地化妝,
當然, 我都無要佢包我化妝,
所以, 我地要自己化妝喎,
點算呢?
我唔識化妝架。

所以, 呢排除左搵接新娘既遊戲之外,
我仲成日上網睇化妝既教學。
我覺得真係好難,
我睇左好多, 都係唔識。
所以,
我決定果日就咁擦BB Cream,
然後畫返條眉, 痴假眼睫毛,
擦少少眼影, 腮紅, 同唇就算了。

我專登買左呢d野係屋企試,
但我畫極條眉都係好奇怪,
真係唔識畫。

我又試痴假眼睫毛,
痴左我兩粒鐘都痴唔掂,
哎呀~~點算好呀!!!!!

我直頭去上埋果d一堂既化妝班,
我都係唔識呀,
死喇, 我真係好蠢呀!!!!!

我要做姊妹

我個有舊同學要結婚喇。
真係好開心, 佢終於結婚喇。
因為我知道佢想結婚好耐。

以前聊天既時候都有問過,
點解唔結婚,
佢話, 佢同我唔一樣, 佢真係好想結婚架, 但係佢男友都無表示, 佢又可以點喎!!
依家知道佢要結婚, 係真開心既。

我地係之前係 o係 一次婚紗展撞到既,
果時, 佢都有表示想搵我做姊妹。
咁前排, 大約一個月前,
佢再問我, 其實仲方唔方便做佢既姊妹,
佢點解咁遲問我, 係因為怕我大左肚。
唉~~
咁我依家係大肚, 不過係大肚腩而唔係懷孕囉。
所以, 我答應左做佢姊妹。
佢11月尾結婚喇,
時間真係相當緊迫。

好老實講, 我都唔知想唔想做佢姊妹架,
因為, 我答應佢果時, 我都一路好驚, 如果我到時有左咁點算。
(不過, 我到呢一刻都未有囉, 失望~~)

我上星期去試姊妹裙,
試身果時, 死喇, 好鬼肥呀!!!
比起結婚果時, 我真係肥左好多, 肥左差不多5KG。
不過無辦法, 答應左, 就算肥都要架喇。

唔知係唔係因為我岩岩結完婚既關係,
所以, 我會知道結婚有D咩要注意,
咁我就提我既舊同學,
我提佢既野, 佢真係好似咩都唔知咁,
不過, 我覺得佢都幾搞笑。

我係婚紗展果時見到佢, 咁即係表示佢絕對唔係突然間先決定結婚喇。
但點解佢可以咁多野都未完成又或者未決定架呢?!?!

佢連做姊妹衫都係結婚前個半月去做,
通常急單都會貴D架嘛。
所以我地既姊妹裙係好普通唔靚款,
淘寶幾十蚊果d呢, 但香港買就所以長裙都三百幾果種。

花球, 襟花, 手花, 簽名筆呢D都未買, 又未決定。
我同佢講, 算喇, 簽名筆我借我果時果D比佢用喇, 應該都未乾墨水既。
我話, 最緊要之後比返個殼我就得喇, 因為我老公話要做記念架。
手花, 花球果D, 係咁急既情況下, 是旦買就算喇。

但係, 佢又話要用鮮花球, 鮮手花同襟花。
我話鮮花球無問題, 最緊要果間鋪肯接你既單唧,
但係, 記得提前一日去拎, 如果唔係, 你果朝無花球用。
原來, 佢一日都以前夜晚進場果時先拎個花球, 仲反問我, 點解要提前一日拎。
跟住又話, 不如用鮮花黎做手花,
我同佢講, 鮮花好貴架, 是旦普通手花就得喇, 唔駛晒錢。
佢又話, 鮮花靚D。我問佢, 怕唔怕到夜晚果時, D鮮手花會殘?
佢話買兩個。兩個手花, 真係何奇晒錢呢!!!!
佢話, 咁不如朝早唔用手花, 只係夜晚入席果時先用。
佢話, 朝早得D兄弟同屋企人, 個個都知道邊D係姊妹喇。
如果, 佢覺得用手花係怕D人唔知邊個係姊妹,
我想話, 咁其實夜晚都可以唔用手花, 因為邊個係姊妹, 相信賓客都唔會好理。

佢又問我兄弟襟花點, 我話同手花一樣都係是旦就得架喇,
最緊要顧掂自己既野先, 我地呢D兄弟姊妹有幾咁閒唧。
我話, 如果你真係想靚, 一係四大長老先用靚靚鮮花喇。
佢又唔想喎, 真係唔明。

好喇, 佢又話, 叫我幫佢諗D遊戲,
我問佢諗咩遊戲?
佢話, 佢個司儀問佢當晚有無遊戲玩,
嗯, 原來佢係叫我諗入席後既遊戲。
我問返佢, 點解一定要玩遊戲, 同埋你果日擺咁多圍, 仲有無時間玩遊戲呢?
佢話, 因為如果唔玩D遊戲, 佢怕D人唔記得佢既婚宴。
佢再話, 佢無可能好似我當晚咁, 可以令人咁印象深刻, 但又想有人記得去過佢既婚宴, 所以佢想玩遊戲, 然後有獎果D。
即係例如問問題, 答中左就有coupon咁。
我問我老公, 叫佢提議一下, 我老公好衰咁講,
下!!  為左要人記得所以比錢人?? 咁不如到時每個賓客都派錢, 咁就一定人人記得喇。
而我就同佢講, 不如叫佢老公諗D驚喜比你, 咁咪唔駛玩遊戲囉。

點知, 我呢個舊同學真係超級搞笑, 佢竟然叫我, 可唔可以幫佢老公寫份稿, 等佢老公果晚可以跟住讀。
我一聽即刻ban左, 我話, 呢d係發自你內心架嘛,
而且我又唔係你老公, 點知你老公有咩想同你講喎。
佢話佢老公唔識講野, 我話唔識講野咪唔好講, 只係講句多謝你父母比個女嫁比佢咪得囉。

跟住, 佢又話, 佢唔想送花比佢奶奶, 但佢又想送花比佢自己阿媽。
我話咁樣唔係咁好, 就算你地關係惡劣, 都唔可以做一D咁讓人落唔到台既事。
然後佢又話, 如果係咁, 佢可唔可以送埋花比佢自己嫲嫲,
我話梗係可以架, 不過你要睇下你搵到咩位去送囉, 然後我又突然醒起, 佢好似仲有個婆婆喎。
我就問佢, 咁你只送比你嫲嫲, 唔送比你婆婆呀?
佢話唔送, 因為佢係嫲嫲湊大, 唔關佢婆婆事。
唉~~佢明知佢婆婆係超級小氣既人, 佢咁樣做, 佢婆婆一定會嬲架, 又何必呢??!!!

然後我問, 佢既其他姊妹, 有無幫手諗左D咩,
佢話佢既姊妹咩都無諗過架, 所以要麻煩我喎,
咁我話, 會唔會幫手做野先?
佢話, 你叫佢做, 佢會做。不過叫佢地幫手諗, 佢未必會諗同去搵。
嗯, 明晒。
咁即係佢地唔會搵同諗同預備接新娘遊戲喇??
佢話係呀, 仲即刻叫我諗掂佢,
咁我話好喇, 我會幫你搞掂接新娘既遊戲喇, 我會上網搵架喇。
唉~~點解我結婚當時無姊妹肯幫我諗接新娘既遊戲同準備道具既 >.<

不過, 到依家, 我個舊同學都仲未約佢班姊妹出黎見面,
我當然每次電話既過程都有催一催我個舊同學,
終於約左黎緊呢個星期五,
哇~~會唔會太急呢。。。

希望到時樣樣順利喇。

大追捕

我知我好out喇,
依家先黎講大追捕。
但因為我係岩岩果個星期日先同老公睇完呢套片嘛。

其實, 好多時, 關於電影我都係好OUT既。
因為我好少去戲院睇戲。

我唔係嫌去戲院睇戲貴,
我係因為我生得太細粒,
我以前去親戲院睇戲,
都一定一定比前面既人擋住我既畫面,
所以, 我無一次係睇得舒服既。

自從我有左自己既地方之後,
我老公亦買左D好既影音設備後,
我真係好少再出去睇戲喇。

假如有一套戲, 我老公真係好想睇,
我先會陪佢去睇,
如果佢等得, 我地都會選擇出左碟先, 舒舒服服坐係屋企睇。

哎呀~~講左好多唔關於大追捕既野添。

我好鐘意一路睇片, 一路去估佢既劇情。
初初, 係石灘上面, 一個男人用石打個屍體既時候,
我本來係估張家輝打死洪桌立既。
點知原來死果個係王敏德。

任達華佢地發現, 原來依雯同雪雪係一樣樣既時候,
我就開始估岩個劇情喇。

睇到最後, 張家輝問任達華有無同囡囡玩過騎膊馬既時候,
嘩~~~我既眼淚完全不受控制咁狂飆呀。
然後, 我就一直喊到完場。
真係眼同鼻都紅晒呀。
超級感動。
如果有人睇完, 唔覺得感動既, 我只可以話, 我個人既淚線比較低。

睇完晒呢套片後,
我老公即刻同我講,
唔理第二時節瓜囡有幾肥, 就算會比佢責死, 都一定要同佢玩騎膊馬。

哈哈, 我就即刻笑返喇。
忍唔住話老公, 蠢到死!!!

回憶 之 外影

終於完成晒所有入門既儀式喇。

佢地就拉大隊去酒樓食午餐。
我, 伴娘 同 化妝師 Cindy 都無去,
因為 Cindy 話要幫我換外影妝,
所以就唔去食喇, 搞到Cindy要同我捱蛋糕, 真係辛苦晒佢呀。
而伴娘話, 佢已經累到食唔落野,
所以就留係度, 睇下有咩要幫手喇。

我地好快轉完妝, 就3個係度吹水,
然後傾下講下, Cindy 同我講,
話其實外影都唔可以影好耐,
因為行規要比攝影師一個鍾頭休息架。
呢一個鍾頭既休息, 佢地係真係咩都唔做,
亦都唔會同新人一齊, 佢地可能係去茶餐廳飲杯奶茶咁。
我即刻嚇一跳, 下!! 因為我真係唔知呀,
點解純美果時無同我講既。

Cindy 話, 其實如果新人堅持唔比都無咩所謂既,
不過佢叫我諗下, 如果真係無時間比佢地休息, 佢地會好累。
咁好累既情況下, 夜晚影既相又點可能會出心機影呀,
到時, 後悔既咪可能係新人囉。
但係我真係好想問, 點解化妝師又唔駛呢?
如果化妝師又真係好累既話, 咁會唔會無心機化妝架???
不過我無問呀, 呢個只係我心裡面既疑惑。

所以, 如果外影完之後, 佢地要去休息既, 我咪由佢地去休息囉。
我真係無理由搵自己笨架嘛, 係咪。

等到咁上下, 佢地終於返黎喇。
咁我叫班兄弟姊妹佢地自己去酒樓先,
因為酒樓有包佈置,
而正常黎講, 客人都唔會咁早黎,
我叫佢地去, 都係想佢地可以係果度坐下休息下。
我都拜託其中一個兄弟帶埋 Cindy 一齊去酒樓,
唔駛佢跟我出去外影喇, 因為我都想 Cindy 可以休息下。

所以, 只得我, 河馬大師, 同攝影師佢地去影外影。
不過, 我有一個姊妹, 佢話, 我條婚紗太長, 所以佢話跟埋我去, 幫下手都好。
咁我問左佢, 佢唔覺得辛苦既, 咁我就梗係歡迎喇。

所以我地一行5人, 就去西鐵站果附近, 然後再行埋去荃灣碼頭果附近影外影喇。
其實唔係影左好多相, 因為都幾多人架。
而我著住對四吋高既鞋, 真係超級無敵的辛苦囉。

所以唔係影左好多, 我地就返轉頭, 坐的士去酒樓喇。
落車後, 攝影師真係同我地講, 佢地去飲杯野,
會係六點返到黎酒樓。

我話OK, OK, 無問題, 你地去喇。

回憶 之 入門

好喇, 都係時候寫埋大日子既記錄,
唔好等佢有頭無尾。

我諗左好耐, 都係決定唔想男家既人暴光。
所以, 都係唔放佢地既相喇。
-----------------------------------------------------------------------------------------

為左一定要係早上註冊, 所以我不得不註冊後才入門。
本來一直以為奶奶會反對的。
但係, 估唔到奶奶無點反對喎, 我無問原因。
不過我估原因只有兩個, 一個係, 奶奶唔想我地洗咁多錢。
第二個係, 河馬大師堅持, 所以我奶奶根本無得反對。

係註冊處影完相, 我地就出發返荃灣。
係途中, 好例牌要影幾張我地係車去緊荃灣既相喇。

好快, 一點前我地就已經返到荃灣喇,
不過我仲未入得門住, 唔關時間既問題,
係因為, 我老爺奶奶要返去預備先,
佢地搞掂再叫我地上去喎。

咁我地無理由周圍行架嘛, 所以上左平台既花園度等時間。
最衰就係12點既時候灑左幾滴雨, 所以d 椅都濕晒, 無得坐。
我其實隻腳已經好累好痛喇。
因為我實在著唔慣高踭鞋, 所以真係好累。

終於等到可以上去喇, Yeah~~~
上到樓, 度門就一早已經開左喇。
我梗係有誇過 "門欖" 咁行入去喇,
因為好多人都千叮萬囑我, 千其唔好踩果一級入去呀,
其實點解呢?
我只知道唔可以踩, 但我真係唔知道原因喎。

入屋後, 我奶奶拿拿臨比利是d兄弟姊妹。
但係我依家諗返起, 有一個兄弟+一個姊妹因為當日既生肖相沖,
所以唔可以睇住我入門喎, 唔知道究竟奶奶有無比到佢地呢?!?!

利是比完, 就叫我地食d西餅同飲汽水,
因為怕佢地餓親, 果時都一點多喇。
食左少少, 飲左少少, 終於可以正式入門喇。

首先, 我地要敬茶比祖先。
河馬大師敬完之後就輪到我敬,
我敬茶果時, 我有同祖先講,
我會照顧好河馬大師, 都有講我會盡快生返個小朋友架喇, 所以叫佢地放心喇。

敬完茶比祖先, 就當然開始敬比老爺奶奶喇。
其實我可以感覺到, 我老爺奶奶好緊張,
我唔識講點解我知道, 總之我就係 feel 到喇。
不過緊張都應該既, 因為河馬大師終於肯結婚喇。

敬完茶比老爺奶奶, 就輪到其他親屬。
其實男家既親戚唔多人, 奶奶只有兩個細佬係香港,
老爺果邊, 亦只有一個細佬係香港。
當然佢地既表親有幾多我唔知, 我只知道好直系果種親戚唧。

之前媽咪已經同我地講過, 舅最大。
所以如果舅同叔都係度, 我地就要敬完比舅父先可以敬比阿叔。

所以, 我地先敬茶比舅父舅母。
然後再敬茶比阿叔阿嬸。

敬晒之後, 我地就影男家既全家福,
就終於完成晒所有入門既儀式喇。

佢地就拉大隊去酒樓食午餐。

不幸, 傷心

係喇, 我潛左水好耐,
耐到差D唔識浮返上黎喇。
結婚BLOG停晒,
咩都無寫,
除左因為忙之外,
仲有就係心情真係好差好差。

我諗我講出黎, 你地就會明白我既心情點解會咁差架喇。

----------------------------------------------------------------------------

上次, 我有講到, 我病左, 又成日皮膚敏感,
最後有一次, 個肚勁痛地入左急症添。

入左急症之後, 我同醫生講, 我個肚勁痛,
就係打晒止痛針, 照晒超聲波, X-RAY + 抽埋血, 都驗唔到有咩事喎。
因為我有同醫生講, 我岩岩結左婚, 打算生小朋友,
所以醫生有幫我驗尿睇下會唔會有小朋友,
驗尿既結果係陰性, 咁即係我仲未大肚喇,
但醫生話, 因為我係打算生小朋友, 所以照 X-RAY既時候可能會有輕微既幅射,
所以, 就用左一個野黎遮住我個肚。
訓左一晚之後, 都係 CHECK 唔到我咩事肚痛。
咁醫生就話, 因為有D人排卵期既時候都會有排卵痛,
咁岩呢幾日我就係排卵期, 咁就安左呢個痛症為排卵痛喇。

但一星期後, 醫院突然打電話黎, 話驗到我有D菌,
要我返去拎藥食。
我心諗: 如果呢隻菌係勁野, 我估我可能死左喇, 一星期後先發現。

返去拎藥, 佢叫我九點去, 我白白痴痴咁坐左兩個幾鐘頭都無人理我,
然後我好嬲好嬲, 到佢黎問我有無藥物敏感既時候, 我忍唔住發脾氣鬧佢,
我問佢, 係咪只係你地醫生先會忙, 只係醫生既時間先係時間,
而我地病人既時間就唔係時間, 係奉旨係度比你地晒既。
之後佢咩都無問, 拿拿聲比張藥單叫我落樓下拎藥。
我係度坐左兩個幾鐘, 而佢前後只係比左一分鐘多D我,
就係問我有無藥物敏感, 我答未發現, 就即係比張藥單我, THAT'S ALL

呢隻藥係抗生素, 要食足一個星期。
其實我都知食抗生素唔好, 但係我有菌, 咁醫生只開呢隻藥比我, 我唔食唔得。

就係因為咁, 點解我寫寫下註冊就停左喇,
因為我係個病人, 所以我好早訓, 又因為好累, 所以諗住好返遲D先寫 BLOG。

食完一星期既抗生素, 我既M都應該黎喇,
通常M黎既時候, 心情都總係有D唔暢快,
我唔知你地係唔係, 但係我就係咁喇。
但係, 我既M竟然無黎,
估唔到無黎既心情係更加唔暢快,
因為我有D擔心,
擔心咩呢? 擔心會唔會因為呢隻抗生素既問題,
令我一向超準時既經期變得不正常。
咁樣會影響我既懷孕大計。
另外我仲更加擔心既係我有左BB,
因為我食左一星期既抗生素, 怕對BB有影響。
所以, 我決定遲一星期既話, 我就一定要買驗孕棒去驗孕。
四日後, 我既M終於黎喇。
當時, 我心諗, 好彩唧。只係遲四日, 應該無咩大影響既。

咁我當然等呢七日既經期完左, 我就會開始寫返我既結婚blog喇。
但係七日之後, 我既經期仲未走。
十日之後, 我既經期仲一齊黎。
我已經覺得好煩, 搞咩黎咁耐呀。
但係我同自己講,
可能因為之前遲左少少黎, 所以依家黎返耐dd唧。
但係當我兩星期後, 經期仲一直未走既時候,
我就心諗, 死喇, 會唔會係抗生素既問題呢?
定係因為我太大壓力, 所以先會一直黎經呀?!?!
就突然醒起,
有人話食多d凍野同涼野, 就可以快d停經架喇。(我都唔記得我係邊度聽返黎, 應該係讀書時期d同學仔講掛, 都唔記得喇。)
所以, 我呢個星期不停食凍野同涼野。
當我既經期已經黎左三星期後,
我開始擔心, 死喇, 點解會咁既,
我估我要去睇中醫調理下身體先得,
所以不停問人拎一d關於中醫既資料。

就係上星期一, 我又再次皮膚敏感, 加上個肚仔有少少痛。
我就去睇醫生, 睇醫生既時候, 醫生問我有無小產過又或者墮胎。
我話無呀, 我都好想有bb呀。
咁醫生話, 可能因為我消化不良, 排唔到便, 所以肚痛。

咁醫生好好人比左兩日假我喎。
但係我都只係放左一日, 因為公司太多野做喇。唉~~~

星期二返工既時候, 我突然係度諗, 點解醫生會問我有無墮胎同小產既?
唔通同我一直流血有關, 我就自己係度諗諗諗,
我覺得, 我只係遲左4日黎唧, 無可能會有bb既。
跟住就無理呢件事。

到左星期三, 呢個想法又突然飄入我個腦度,
我就即刻停晒我手上既野, 係公司上網 search, 關於小產。
晴天霹靂呀,
我竟然 search 到真係有日遲左兩三日黎經, 就原來已經小產左喇,
我開始好擔心, 忍唔到係公司個位一邊流眼淚, 一邊同老公msn。
我越睇越驚, 同老公越講我就喊得越緊要, 最後我走左入廁所喊。

老公就幫我問下人, 然後老公既生左bb既朋友話,
叫我唔駛擔心, 我應該唔會係有左bb同小產既, 叫我放心放心果d咁喇。
但係, 我真係控制唔到自己個腦係度諗。

到左星期四, 肥公主msn我, 傾左兩句, 我就忍唔住同肥公主講我既困擾。
肥公主幫我問左幾個婦科醫生既電話, 叫我記得打電話去約時間
叫我唔好再自己估估下, 睇醫生check下好d。

星期四晚, 我老公打波無返黎, 我就打電話比我家姐,
同家姐傾呢個問題,
我家姐叫我即刻入急症, 佢話我似小產既期會好大,
而且我已經流左三星期血喇, 正常諗法就係bb都已經唔係度,
咁至少都要清乾淨d惡露, 先有機會迎接下一個。

就係咁, 我選擇左星期五放工後, 我會自己一個入急症室。
我入到急症室, 係分流果度同個姑娘講左我既狀況。
然後佢話, 咁幫我驗尿check下先。
我話, 但係我已經流左三星期血, 就算曾經有過,
依家都變無喇。

姑娘話, 仲會check到既, 所以叫我驗下先。
咁我就留小便比佢地 check。
之後坐左唔夠5分鐘,
即刻叫我名, 然後第一句同我講,
你真係有左bb,
我一聽到忍唔住又喊左出黎喇。

點解會咁架~~~~

休息休息

寫寫下回顧停鬼左添。
哎~~其實我都唔想咁有頭無尾架。
但係公司一忙, 我就無時間上網寫喇。
而且, 身體唔多聽話,
入左急症 + 住院。
我岩岩今日先出院,
死喇, 最近成日請假,
唔知老細會唔會炸形添
不過, 老公大人話,
如果老細炸形炒我,
佢話佢養我架,
叫我放心, 唔駛理公司既野喎,
呵呵, 老公,
愛死你

回憶 之 出門

終於接左我出黎。

原來出左黎之後唔係即刻敬茶架,
攝影師仲要我地影返幾張相,
即係好例牌果d,
佢跪係度比扎花我,
又或者鍚鍚咁囉。

然後, 我先可以真正敬茶,
咁我女家呢邊其實唔係敬好多茶,
首先, 我敬比我婆婆先。
因為阿公唔係度, 所以我婆婆要倒半杯茶當比阿公飲既。
到我阿婆既時候,
係呢一刻, 我真係有d想喊既衝動,
(因為我細個係由婆婆湊大既,
到我五歲既時候, 我婆婆就移民去美國,
我仲記得我果時問我婆婆,
可唔可以帶埋我一齊去美國呀?
因為我好憎我阿嫲。
我婆婆果時答我,
佢話媽咪唔走, 所以佢帶唔到我走架。
之後, 我仲喊左成晚。)不過眼淚只係我眼睛裡面游走左一圈唧。

之後,
當然係我爸爸同媽咪喇,
可能因為要戴太多對鐲,
又搞左一輪先開到d扣,
所以, 無講咩感動說話,
開開心心咁飲左杯茶。

最後一對喇,
就係我家姐姐夫,
嘩!! 估唔到我家姐買左條金豬鏈比我呀。
然後, 唔記得我地講d咩,
總之就好搞笑。

敬晒茶, 都未夠十點半。
所以我地再點一點野, 睇下齊唔齊。

等果個29座小巴黎接佢地。

回憶 之 接新娘(兄弟預備篇)

輪到兄弟篇,

當然, 關於呢篇我都係聽返黎, 因為我無可能係現場睇到架嘛。
_______________________________________________________

河馬大師果朝6點鐘起左身, 開始準備,
其實我唔知佢要準備d咩, 無問清楚,
不過我估應該唔係拜神掛,
因為奶奶講佢會提前拜嘛。
所以應該係扮靚, 因為今日佢係主角嘛。


然後佢好似約左班兄弟六點半開始食早餐,
其實約咁早係因為佢預左有人遲到。
但係唔知點解, 我覺得其中一個會遲到既人
一定有河馬大師份, 哈哈。

佢地食完早餐, 等埋我其中一個姊妹,
就開車出發黎北角。

我呢個姊妹好似係8點15分前到左,
所以班兄弟應該8點15到左樓下佈置花車。

之後, 就開始分派兄弟呔同兄弟襟花。



河馬大師話,  好彩兄弟阿賢安排得好好。
朝早, 佢安排晒班兄弟點樣去整架花車,
 
如果唔係真係一頭煙,
因為唔識點去整果d蝴蝶, 哈哈。

係中間既時間,
個攝影師落左樓下同班兄弟影左d相,
不過唔算影左好多。
 (其實我地班姊妹都未得, 點解個攝影師唔幫班兄弟影多幾張呢??
但因為我樓上班姊妹一直都未搞掂,
所以, 佢地就變左好多時間係下面吹水喇,

直至我地打電話叫佢上黎。

回憶 之 接新娘(姊妹預備篇)

Cindy 約6點20分就到左,

係佢到之前, 我已經好乖咁沖左杯茶黎飲,
因為我記得Cindy話, 最好係起身之後飲半杯黑咖啡又或者半杯紅茶,
係可以去水腫的。
好可惜, 我係唔飲咖啡既,
而我搵晒成間屋都搵唔到紅茶, 所以我沖左鐵觀音。
唔知係咪因為咁, 我睇返d相, 我覺得我朝早塊面又真係好似肥d。

Cindy到左之後, 我就帶佢搵位, 睇下坐邊度比佢幫我化係最好既。
咁 Cindy 搵到位後, 開始 set 架步。
Priscilla 都黎到, 但係我D姊妹呢??
一個都未到。我叫 Priscilla 是旦搵個位坐先,
因為我要開始化妝, 我實在無時間可以招呼佢,
但相信佢會明白, 因為佢黎近都會做龍年新娘。

係我已經開始化妝既時候, 我開始聽到有禁鐘既聲,
相信係我既姊妹佢地黎到喇。

咁邊個黎到咪邊個化先喇,
而未開始化既姊妹, 好似係度整理緊等陣玩兄弟既野。

我聽到, 佢地係度痴紙杯,
同分開酸甜苦辣果幾杯野。
以我知道既應該係搾檸檬汁唧同整塘水。
因為辣薑汁, 有個姊妹尋晚整左。
而苦茶, 係現成買既。
然後佢地又搵六樣野用黎玩紅繩既遊戲咁。

係呢段時間, 化伴娘妝既化妝師同攝影師佢地都到左喇,
佢地開始各有各做自己既野。

而我家姐係約8點起身, 然後佢同姐夫去拎點心返黎再蒸比我地做早餐。

我好為食咁食緊叉燒包, 我仲食左兩隻添。

呢個指甲, 就係尋晚伴娘既好友幫我整架。

其實係呢一刻, 我真係已經唔得閒理佢地搞左d咩, 做左d咩, 同仲爭d咩。
只係佢地黎到問我, 我就答佢地。
我只係知道, 人黎齊, 連我父母都到齊, 新郎同兄弟係下面佈置花車,
其他既野, 我都好少過問。

而我, 準時係九點前化完妝。

係我原先安排好既rundown, 我地係九點開始接新娘。
十點開始敬茶給長輩。

但係, 我地無辦法跟呢個 rundown 去做囉,
因為九點既時候, 佢地仲未化完妝.......

而且原來化完妝都唔可以即刻接新娘架,
仲要比時間攝影師去影接新娘前既片段,
即係講果d咩鬼, 開門利是xxxx, 又或者xxx玩殘班兄弟果d野咁。
又要影一d, 我媽咪幫我著褂既相。

每一個人, 包括我自己, 都以為我媽咪幫我著褂既時候, 我一定一定會喊。
但係, 試問係咁既情形之後
原定10點敬茶, 11點要去到紅棉路, 11點半要開始註冊。
但係, 已經9點20分, 連接新娘都仲未開始, 兄弟們仲係樓下,
而我又係一個極度易炆既人, 我會唔會有機會喊得出?!??!

咁我就梗係無喊喇, 一滴眼淚都無流,

我既內心係好想鬧人囉, 而我盡量叫我自己笑,
唔好黑面。

講真架, 我果時個腦係不停重覆同自己講
要笑, 唔好黑面, 要笑, 唔好黑面, 一得趕得切, 最多唔玩兄弟即飲茶。


姊妹預備篇就大約寫到呢段, 因為之後我入左房, 我就咩都唔知喇。

回憶 之 出嫁的清晨

5月5日

今日係我結婚既大日子喇,
尋晚我好夜訓, 因為我寫埋我最後既日記關係, 唔覺唔覺,
搞下搞下, 我竟然差不多三點半先訓,
不過我伴娘同佢好友仲勁,
兩個衰野玩到成晚無訓 >.<

我呢?
五點鐘就已經起左身,
其實我唔需要咁早預備既,
只係答應左會morning call其中一個姊妹唧。
咁我就只起身 call 完佢之後,
我又可以訓多一陣。

我正式起身離開床既時間係5點45分。
其實我約左 Cindy 6點半,
我確實唔需要咁早起身,
但可能我個人太緊張喇,
又擔心今日落好大雨,
所以訓唔返, 唔再賴床喇。

再次檢查一下,
然後比自己個腦係度遊一陣。
諗下, 今日無可能會發生既事,
例如: 河馬大師唔黎接新娘,
係註冊處既時候, 我突然偷跑唔簽名
又或者係酒樓播片既時候, 竟然播出河馬大師既偷食相
再再可能, 河馬大師既二奶三奶黎踩場。

哈哈哈, 其實呢d都只係幻想, 我發下夢,
因為我實在太愛胡思亂想。
好, 依家就係等佢地黎到就要開始喇~~~

回憶 之 上頭

我好嬲既樣, 其實我伴娘見慣見熟,
因為佢係我細佬既女朋友,
我既臭脾氣, 係屋企係出晒名既。

咁伴娘同我細佬都拍左拖十一年,
我絕對相信我細佬同佢講過我好多既黑面臭檔野。

佢亦都知道, 係呢個時候, 唔需要特別既安慰我。
需要既係, 比我自己冷靜一下, 平伏自己既心情。
因為, 呢個時候佢出聲, 佢只會變左我既出氣袋。

我係真係好嬲架, 但係, 我內心都知道, 依家係北角呢度既人都係無辜既,
我唔應該繼續黑面, 所以我行開入房,
大大啖地深呼吸, 叫自己冷靜, 然後先再出廳。

當然我出得廳既時候, 我係已經冷靜架喇。
然後我就同伴娘, 伴娘既好朋友三個係度傾計。
係呀, 點解我伴娘既好朋友會出現呢,
因為, 佢今晚會幫我整指甲呀, 真係好感動架,
佢真係幫左我好多, 係好多呀。

到大約九點半, 我家姐打黎問我地食野未。
我話我地三個都未食, 咁佢就問我地食pizza定kfc,
最後我地選左 kfc, 因為方便。

咁我家姐同佢既朋友(蘭姐)就買野上黎比我地食。
然後我家姐十點多就出發去接我阿婆過黎。

我地幾個女人食下野, 吹下水, 睇下電視, 唔覺唔覺就十一點半。
但係我家姐都未返, 點算呢。
蘭姐就叫我, 唔好等家姐,
快d去沖涼先, 費事誤左吉時。
所以, 我就去左沖涼。
沖完涼之後, 家姐都岩岩返到黎。
本來我以為我阿姨有事返左美國, 係我家姐幫我上頭既。
點知, 家姐叫左蘭姐幫我上頭, 因為蘭姐都係好命人,
有老公, 有仔, 有女。
咁蘭姐就幫我上頭, 我地好簡單咁只係講三句果隻。
即係一梳梳到尾, 二梳白髮齊眉, 三梳兒孫滿地。
梳完晒, 蘭姐就拎左d湯圓比我食, 叫我要食晒佢。
原來蘭姐襯我沖涼果時, 已經先煲好湯圓比我。

果時我姐夫都返到黎, 我家姐同我姐夫講, 點解上頭既儀式好似咁流咁既。
我答我家姐, 係真係咁流架唧, 因為我地後生人, 費事咁講研喇。
我姐夫一望, 就話, 做咩唔點著支蠟燭, 只係插係杯就算。
我話, 費事燒嘛, 又費事滴到周圍都係。
我姐夫話, 梗係唔得喇, 佢就拿拿臨幫我點著皮蠟燭。

蘭姐走左之後, 我就醒起。
係喎, 我地仲未貼對聯。
我拎出黎, 我姐夫同我家姐係係度幫我癡對聯。
然後又整我買既喜字貼, 同掛飾。
我真係好感動, 因為我有個好鍚我既家姐,
而且我姐夫都一樣好鍚我。
我覺得絕對係我姐夫愛屋及烏,
因為佢鍚我家姐, 所以都鍚晒我家姐既家人。
我真係覺得我好幸福,
雖然我無好多 blogger 寫既好姊妹朋友,
但係我有好愛鍚我既家人, 我知道做人唔可以貪心, 咁樣, 我已經足夠喇。。

回憶 之 結婚前一天

終於開始寫喇, 雖然整個過程唔算十分完美, 但都結婚呢件事, 絕對係我人生中既一件大事。
所以, 就算自己完唔完美, 對我倆來說, 都是一件絕對值得記錄下來的。

----------------------------------------------------------------------------------------------------------------------

5月4日
結婚前一天

其實, 本來由一開始, 由決定結婚既開始, 我想所有關於傳統上應該要做既野, 我都希望可以做足。
但係, 慢慢發覺, 要跟足呢個傳統, 原來係相當難既一回事。
所以, 去到一半就已經放棄左喇。
再加上自己散慢既性格, 好多野都唔到最後既一刻都唔做, 咁亦都變得求其。
自然地, 我地結婚前一日, 唔理未來奶奶講既,
結婚前一日唔可以見面既要求, 我同河馬大師繼續相見。
我地相見既原因絕對唔係我地真係愛得咁誇張, 見少一日都唔得。
而係, 好多租既野都係結婚前一日先會比你拎。
我自己一個真係拎唔掂,
仲有一個好重要既原因係, 河馬大師真係好鍚我, 我唔想我辛苦。

所以, 佢果日就陪我去拎晒咁多野喇。
中午十二點,
河馬大師同佢既好朋友兼同事, 一齊揸車黎天水圍搵我。
我地就拎晒之前一晚我執好晒需要帶去酒樓既野,
就好似, 油畫, 相架, 相薄, 花炮, 簽名筆, 簽名布, 同埋所有用黎佈置酒樓既野。
真係唔好睇少呢D, 係好重好重同好多好多。
佢朋友見到都嚇一跳, 嘩! 原來咁多架。

第二站,
我地先去元朗既愛華拎衫。
去到愛華既時候, 已經有人拎緊衫,
咁愛華叫我地等一等, 佢話因為唔想搞亂, 所以會一個拎完到一個。
咁OK, 我都明白。所以我就係度等。
本來佢叫我地去食D野先, 話食完返黎再拎。
但因為我怕, 如果食完返黎又有其他人黎拎, 咁我就要再等,
我唔想咁晒時間, 所以我話唔緊要, 我係度等。
只係叫河馬大師同佢既朋友去食Lunch。
佢地兩個食完Lunch返黎, 我都差不多搞掂。

第三站,
我地去荃灣酒樓放低大部分既野,
因為我地真係好趕時間, 所以拎晒d野入新娘房,
好是旦咁掛起d衫, 因為衣架唔夠, 我地又費事問佢地拎,
所以變左有d衣架掛兩件衫 >.<

過左呢一站, 就完成好多野喇, 其實個心都已經定左好多喇,
因為之後既野, 我自己一個拎都唔會好重。

第四站,
呢一站我要同河馬大師分開喇。
佢同佢朋友就返荃灣屋企放低d野,
而我就去銀行, 因為我要買本票用黎聽日酒樓埋單之用。
我去匯豐銀行, 好多人, 其實多人就預左架喇, 無辦法。
差不多排到我既時候, 我就打電話比河馬大師,
叫佢地去銀行門口等我。
我們再相會既時候, 就出發去第五站

第五站,
本來佢地想車我去油麻地拎完褂再去北角的,
但係時間上真係唔係太夠,
點解會時間唔夠呢? 係因為河馬大師係返工時間 "鼠" 出黎架唧, 所以要五點就返返公司架。
咁我覺得褂其實好輕架唧, 所以我就寧願佢地車我過左海先,
最多我陣間自己去拎褂, 咁我會無咁辛苦嘛。

所以, 第五站去中環, 我家姐公司。
過海之後, 好塞車~~~
所以, 去到中環, 放低我同兩大袋野, 佢地兩個就返公司喇。

由於我成日都未食過野, 其實我好餓的。
剛好我家姐話想去食個粉, 所以我地兩姊妹就去食個下午茶。
坐低同家姐食野, 傾陣計, 休息一下, 我就走喇。

我自己落油麻地永隆度拎褂。
因為我出發去油麻地果時已經約左我既伴娘,
 所以拎完褂, 我地就係油麻地地鐵部一齊出發去北角喇。

因為真係太熱, 同太累。
所以我地打算係北角坐一陣, 再落去超級市場買聽朝要用既野。
即係好似苦茶, 檸檬, 芥辣果d野。
點知, 坐唔夠十五分鐘, 落大雨,
仲要係超級大雨............
到左八點, 都未停雨,
唯有打比其中一個話會黎我度過夜既姊妹,
問佢可唔可以幫我買呢d濕星野,
佢話ok無問題。
咁就唯有拜訪佢喇。

到左九點, 呢個姊妹打比我,
佢話, 依家黃雨, 佢都係唔過黎訓喇。
我心諗, 你係咪玩野, 又話過又話唔過, 依家即係點喎。

我話, 如果你唔過, 你地幾個邊化得切妝呀。
佢話, 聽朝七點前過到黎咪化得切囉。
我話, 本來你同xx話過黎, 所以你地兩個係六點半同七點開始化。
但係xx係一個月前就已經同我講左唔過黎, 所以佢係七點化,
而你因為係我度過夜, 你係六點半化架呀。

佢話, 咁本來就一直預左自己七點化, 諗住七點化會趕得切, 點知會轉左六點半化架唧。
我果時好嬲, 我就同佢講, 是旦你喇, 化得唔靚你地唔好怨囉。

我收線之後, 我真係好嬲, 我覺得點解你地一個二個都咁無責任感架,
依家唔係邊個化先化後既問題, 而係你地答應既野, 通通都無做。
我都唔知點解, 點解佢地可以做野做得咁無黎責任感呀。

唔通真係以為做姊妹係玩咩, 係以為可以靚靚咁就算呀!?!?
做姊妹其實係有好多野要做架, 係姊妹係要幫手新娘架,
你地已經通通無做, 仲要比好多好多既麻煩我。
就連差不多最後既時候, 你都可以話黃雨唔過黎。

咁如果聽日又係黃雨, 你係唔係會 no show呀,
我真係好接受唔到呢個答案。
我真係好嬲好嬲。
我心諗, 算喇, 最好你地聽日個個都唔好黎, 我唔想煩添呀。

好懶

婚後,
我真係變得好懶,
我懶到唔想入電腦房去開電腦

如果係公司真係太忙,
忙到無時間上網既話,
我就真係唔係返屋企寫BLOG,

唔知係因為無相, 所以唔想寫,
定真係我太懶,
唔想寫呢?!

我成日都諗,
如果我可以用手機寫BLOG既話,
可能我就唔會咁懶喇,
但係我試過,
用手機係寫唔到BLOG

同埋好奇怪地,
唔知點解我係公司寫BLOG係UPLOAD唔到相既。
每次都要我返屋企UPLOAD定一大堆相先,
然後係公司寫既時候都選出黎,
好麻煩>.<

不過早幾日, 我收到純美新娘既信息,
佢話我結婚既相已經搞掂喇。
我應該星期五晚出去拎,
唉, 如果相都拎埋返黎,
就無藉口唔寫後記喇!!
嗚嗚~~~

靚靚頭飾

等我寫篇關於結婚既野就去訓覺先。

我既MUA係 Cindy, 佢之前係 makeup secret 度做既,
但係佢依家已經自己出黎開出左 workshop 喇。

五月一日, 我約左 Cindy, 傾我big day既野,
講左個流程佢知, 大約係點, 同埋我會著咩衫。
我專登係 final fit 既時候影左d試衫相,
咁我就可以比 Cindy 睇下,
我果日既衫係點既。

當日我地傾我既造型其實唔係花左好多時間。
其實係開頭既時候,
Cindy 有問我有無咩特別既造型鐘意,
同埋慢慢解釋比我知,
佢會大約同我做d咩造型,
佢解釋左兩個之後, 我就同佢講,
其實, 你唔需要話我知你果日會點幫整,
因為, 我搵得你做mua, 我就係信晒你,
我知道你一定可以幫我扮到靚靚,
我係百分之一百相信你。

所以, 後面我只係比佢睇我選左咩衫, 同埋會唔會有外影,
再講多次個地址, 同埋 confirm 埋時間。
好多就可以走人喇。

係相討這型既時候,
Cindy 已經拎左呢個中式既頭飾出黎,
佢當時其實拎左兩組中式既頭飾,
佢話, 其實我試妝果時講過,
唔想用花, 想用中式頭飾,
所以佢專登整左兩款中式頭飾出黎。

兩款中式頭飾都好靚,
但因為呢款細少少, 而且係兩件
同埋呢款襯我多d,
所以我當日既褂妝就會用呢款中式頭飾。

而下面呢個紫白色頭飾, 都可以算係結婚當日既驚喜。
因為, 呢款紫白色既頭飾,
佢係睇完我既晚裝之後再做既頭飾,
完全襯晒我既迎賓晚裝。
好開心, Cindy 為我做左咁靚既頭飾。


圖片出處是在 Cindy 既 facebook。

上天賜給我的假期

係, 我突然多左三日假。
呢三日係病假,

由星期一至星期三,
因為我病左,
其實我無叫醫生比咁多假我。

醫生問我要唔要假紙同收據,
我話收據唔駛 (因為公司無醫療)
但係我要假紙, 因為今日無返工。

點知醫生可能都覺得我既病情嚴重,
佢話我比三日病假你喇, 同一星期藥你,
你下星期要返黎覆診。

所以, 我突然多左三日假喇。

不過我頭先打比我老細, 我同左老細講,
我聽日唔會返工,
如果星期三好返好多, 我就會返工架喇。

因為我真係好多野做, 點算呀!!!!!

有點忙

結完婚之後, 真係有點忙。
忙咩呢?
結婚前我係唔需要諗煮飯呢個問題,
因為自己一個住, 鐘意咪煮, 唔鐘意就買外賣。

但係依家唔得,
我要河馬大師每日都打比我話我知佢果日返唔返黎食,
如果佢返黎食, 我就要煮飯。

煮飯其實唔難, 最難既係, 我唔知煮咩好。

所以, 我依家成日都上網睇, 人地既簡易家常菜。
可以從中諗下, 到底煮d咩好。

除左夜晚因為煮飯煮送做家務忙之外,
我公司最近都好忙。

我個同事, 以前成日三催四請, 都未入好d資料比我。
佢成日都話好多野做, 入唔切。
催得多我唔好意思, 咁老細問我既時候,
我唯有照直講, 佢太忙, 未入晒,
所以我都無辦法完成。

就係因為個同事成日未入晒比我, 所以我之前先會咁得閒。
但係, 估唔到我放兩個星期假, 放完假返黎,
佢同我講, 佢入晒二月份同三月份既野。
(老實講, 我放假既時候係五月, 正常黎講, 我應該放假前已經做晒二三月既野, 但係, 我竟然只係做完一月份囉>.<)

佢同我講佢入晒二月同三月份既野既時候, 我心諗, 玩野咩!!!
兩星期入晒兩個月既野, 佢平時唔係好忙架咩, 點可能兩個星期入得晒。

咁佢入晒兩個月既野, 我當然要即刻做埋呢兩個月既野交比老細喇,
所以, 我比佢搞到好忙。
我係咁意睇下二三月到底多唔多野要做, 原來好多,
二月日數少, 但個量都唔會比一月份少囉, 三月就仲多過一月同二月。
我真係好唔明, 點解佢可以兩星期入晒兩個月既野呢?
我絕對唔會相信我呢個同事係OT入晒比我,
我唯有好衰咁諗,
佢之前一定已經入好, 只係佢好衰, 專登唔post出黎,
等我做唔到野, 要成日係度玩手指唧。
如果佢真係咁做, 我真係好好好唔明,
點解佢要做呢d咁損人而不利己既事呢,
真係唔明。

玩兄弟的預備

其實姊妹開會時所講既遊戲, 差不多比我全部改晒。
點解呢?
因為我真係唔想玩一d, 我覺得唔好既遊戲囉。
唔係話我特別鍚住河馬大師又或者鍚住佢既兄弟,
而係, 我覺得玩呢d遊戲唔會令到我特別開心。
同埋遊戲道具咩都係我自己去整又或者搵返黎,
咁到時我話搵唔到, 要改, 其實姊妹們都無我辦法既。
絲襪當然無用到, 因為我話我唔記得帶去北角,
咁短時間買唔切, 哈哈。

瑜伽卡, 其實動作唔難做, 因為河馬大師同佢既兄弟都間中有去physical玩下瑜伽。
仲有兵乓波, 酸甜苦辣, 紅絲帶唔記得影相。

姊妹的開門支票

因為我唔鐘意姊妹收到開門利是之後,
攝影師一定會叫姊妹即刻拆開然後拎d錢出黎影相既指定動作,
所以我預備左一張開門支票。

呢張支票其實連姊妹都唔知。
係大婚前一日,

河馬大師既兄弟陪我地一切去拎衫同將d物資預先放去酒樓既時候,
佢見到呢張支票,
佢好奇怪咁問我, 係咪用左呢張支票就唔駛比開門利是。

我話梗係唔係喇, 呢張支票做下樣之嘛。

然後佢話, 咁你班姊妹一定嘈話, 張支票兌唔到現架喎。

我就話, 點解你咁傻架。
你可以講, 呢間銀行確實存在, 只不過要真係超索同聰明人先搵到咪得囉。
唔通班姊妹真係同你講, 自己唔索又或者自己好蠢咩。
如果班姊妹真係咁講, 都好丫, 有得笑下嘛。

而且最後, 都一定會比佢地開門利是架喇。又邊有咁著數, 唔收開門利是既姊妹喎。

關於結婚戒指

我有問題想發問
是關於婚後的問題

結婚後, 你地係咪咩時候都會帶住結婚戒指架?
例如 : 沖涼, 洗碗, 煮飯, 訓覺

因為我沖涼既時候除左隻戒指, 比我老公發現。
佢就話, 我成日又除又帶, 肯定好快就整唔見左隻戒指喎 >.<

welcome board

大約結婚前一個多月

我其實成日係結婚同學會個 whatsapp group 度傾關於結婚既野,
因為我呢兩個同學2013年先結婚, 所以佢地有好多時間可以準備關於結婚既野,
咁最近個同學仔一直講緊關於場地佈置裝飾既野
同埋關於 welcome board 既野
講講下, 我都有少少心動想整個 welcome board,
但係佢地都知我實在無咩時間整野,
同埋都唔得閒 search 下黎研究個 welcome board 應該點整,
所以呢,
佢地就話比我知,
囍訊今期送既迎新禮品係 welcome board 喎。
因為我之前已經 join 左, 果時送花球。
咁我就諗, 不如用河馬大師既資料再 join 囍訊做 會員,
咁我咪唔駛整又有個 welcome board 囉。

其實都有少少擔心 join 唔到, 點知又得喎。
但係, 要係4月27日之後先可以拎, 好彩, 都仲趕得切婚期。

當然, 我又死 "lur" 河馬大師去幫我拎呢個 welcome board 返黎喇。

自製愛的宣言

點解要整愛的宣言呢?
煩!

其實我好唔想加插呢個項目, 因為我覺得愛的宣言好hea,
我真係好想問下, 裡面講既野, 又真係有幾多人做到呢???

不過我係姊妹開會果日問, 可唔可以唔玩愛的宣言,
佢地幾個噴到我一面口水, 即係唔玩唔得喇。

咁點解我咁唔鐘意呢個項目都要自製呢??
絕對唔係我鐘意自己 diy, 而係.........呵呵....大家應該估到既

咁河馬大師知道我要自己整愛的宣言既時候,
佢就問我, 點解唔係你既姊妹整既?
我只係回佢一個苦笑。

咁河馬大師都知我整緊花車公仔,
佢就話, 親愛的, 不如我幫你整喇。

所以, 以下既愛的宣言係河馬大師親手整既。
哎呀~~我唔記得影裡面添!!!!
其實裡面先係重點, 因為裡面既野係河馬大師自己作架....
內容如下 :

xx 今日娶老婆 嫁我好處多籮籮
以下承諾聽清楚 等d姊妹羡慕囉
家頭細務我做晒 有時同妳抺埋鞋
家用準時俾到足 雙糧花紅唔會縮
唔嫖唔賭唔食煙 同friend飲酒下次先
對妳家人好到痺 有乜幫手冇皺眉
老婆order一定聽 如果唔係瞓硬廳
老婆做乜嘢都啱 發我脾氣任妳煩
在場各位請見證 我愛 xx 不移情
愛的宣言自己度  feel到我既誠意麼?
立此承諾誓不變 求妳應承嫁俾我
當然佢一定有參考網上面既愛的宣言黎改,
但係, 又有咩所謂唧。

最最搞笑既係, 佢因為整呢個愛的宣言, 好多朋友仔笑佢呀。
事緣 :
河馬大師好多電話響既, 總之佢同我一齊既時候, 唔知點解佢既電話就特別多人打黎。
咁佢朋友打比佢問佢係度做咩,
河馬大師話 係度整愛的宣言。

佢所有朋友既反應都係, 下!!!點解你咁搞笑既, 咩唔係姊妹整架咩? 你自己整返比自己讀, 好傻仔呀!!!

不過河馬大師為左愛我, 所以無辦法之下就做左傻仔喇...哈哈。

花車公仔自己做

依家先講返結婚前既野, 會唔會遲左少少呢??
不過唔緊要喇, 寫呢個BLOG除左同blogger分享關於結婚既喜與樂之外, 仲有一個原因係我想記錄下關於我結婚既一齊嘛。

其實我都算係一個不折不扣既懶人,
雖然睇左好多blogger既diy, 我都相當之心動,
我成日都心思思想整, 但礙於我係一個心散, 成日半途而廢同埋懶既性格。
所以, 每次我想整既時候, 河馬大師都會喝停我。
又不停的潑我冷水,
所以, 我都無整過咩野diy既項目。

我最大既diy就係整比佢既結婚禮物喇, 嘻嘻。

但正當我為左我既花車公仔而煩惱既時候, 我既結婚同學會既其中一個同學仔就比左一個建議我。
佢話, 如果我可以親手整一對花仔公仔, 個意義感覺上又唔同d喇。

我睇睇下, 又好似幾好咁喎, 當然我又問下河馬大師喇。
佢都覺得呢對公仔幾得意, 同埋, 佢覺得如果我真係想整, 就整喇,
因為最後我真係整唔掂, 都可以隨便買一對花車公仔代替。

咁ok喇, 我就買左呢個材料包, 自己一手一腳裁剪, 入綿, 縫線。
由我一開始好用心既每一針一線咁縫, 到最後, 覺得後面無人睇到, 同埋有時有d地方可以遮掩既情況下。
我用左一個多月既時間, 終於完成左下面呢一對花車公仔。
雖然手工真係唔算話好靚, 不過都叫做我自己一手一腳搞掂嘛。

係大婚當日, 呢對公仔竟然獲得好評, 河馬大師既兄弟讚我整得靚。
佢地仲用呢對公仔整左d搞笑動作, 影埋相添呀。哈哈

返黎喇

我終於返黎喇~~~~
點解潛左水咁耐,
咪因為我結完婚之後就去左渡蜜月囉。

係呀,
我要係度多謝晒大家既祝福,
大婚當日都算有驚無險咁完成晒,
雖然唔算係最完美,
不過, 係無採排既程況下,
叫做合格有餘架喇。

雖然大婚當日既相我一張都未收到,
不過我都會係呢度用我手頭上緊有既少少相片黎慢慢分享我當日既點滴。

其實係咪應該分享左蜜月先呢?
因為有相係手嘛, kekeke

節瓜夢的出現

終於要寫最後呢一個喇。
其實呢個先係第一個既節瓜夢。

而呢一個夢, 係我發既, 而唔係河馬大師發既。
不過, 除左呢一個節瓜囡之夢外, 我無再發過任何關於節瓜囡之夢。
又可能我發左, 我醒左之後記唔起喇。

-----------------------------------------------------------------------------------------

其實我最鐘意就係訓係河馬大師個肚又或者大脾上面睇dvd, 因為我懶, 所以好鐘意訓係度, 而且佢個大脾同個肚都好好肉, 訓落好舒服 (註: 依家無肉唔舒服喇 >.<)

呢一日我如常地訓係河馬大師既肚上面睇dvd, 我已經唔係好記得我地睇緊咩喇。印象中應該係小品電影喇, 仲係唔用腦果d, 睇完唔記得都無所謂, 又唔駛用腦去諗個劇情, 最適合我呢種懶人去睇架喇。

睇睇下, E...突然間有個細路女出現係我同電視之間喎。果種突然出現既感覺, 就好似龍珠既孫悟空用舜間轉移一樣, 係突然出現係你面前既感覺。
而呢個細路女, 竟然著左古裝, 係一個古代既俠女。
呢個古代既俠女, 手握一把兒童既玩具劍,  將劍尖指向我跟河馬大師。表情嚴肅的。
而我身邊既河馬大師, 已經忍不住在大爆笑。
因為河馬大師已經在大笑既關係, 我就當然要忍住笑容, 開口問一下這個細路女係度做咩喇。

在我正想開口說話既同時, 呢個小俠女竟然一本正經的開口說 : 休得無禮!   而劍尖立即向上的指著河馬大師。
當然河馬大師那個爆笑沒有停止。

我只好用眼睛射了河馬大師一眼, 因為我那時的想法是, 不可以傷害這個細路女既心靈。
所以我就問 : 節瓜囡, 可唔可以話比媽咪聽, 你係度做咩呀??

印象中, 節瓜囡好似答我, 同細佬仔係度排練話劇。

但係實在太模糊, 因為河馬大師既笑聲太大喇, 笑到我就係咁由夢中醒左喇。

倒數五日

我之前實在太輕鬆喇。
所以搞到依家好似有D急咁。

呢幾日我做左D咩呢?

首先, 我既花車公仔終於搞掂,本來我要自己整愛的宣言既, 但係河馬大師見我辛苦, 所以佢決定幫我整。
(唔好奇怪點解唔係姊妹幫我整, 如果有睇過我既BLOG都知道, 關於好多人都覺得要係姊妹負責既人, 都會落返係我自己身上)
整左玩接新娘既瑜伽卡,

王子同百年既成品終於通通拎晒返黎喇。

今晚會去 final fitting我媽咪就已經 final fit 晒喇。

seat plan 果度算做七七八八喇,因為, 我相信真係要到最後果一刻先知道d人黎唔黎呀。因為, 實在, 好多人都好麻煩。唔派比佢果時, 又周圍問人點解唔派喎。
到我地真係派左比佢, 佢又話唔得閒黎唔到。又有一d, 問佢黎唔黎果時, 佢話黎。咁我地印完帖比佢, 幾日之後又話果晚唔得, 黎唔到。
哎呀~~~玩咩!!!
我又唔係貪你果份人情, 問左你先, 你話黎先派嘛, 你唔黎就唔派, 等你唔駛晒錢喇。搞到我依家14圍零7個人, 想點唧。
呢7個人仲有三個係化妝+攝影, 真係玩咩, 7個人開一圍真係好戇居。插人又好似好樣衰, 所以我為呢個問題同河馬大師爭吵好耐。

搞到我好煩, 所個人都好燥底, 訓又訓得唔好, 皮膚又開始敏感, 就黎搞到塊面都開始敏感喇。

又要為結婚而留指甲, 我又覺得好煩, 我係習慣將指甲剪到好貼肉果d人, 所以我依家除左唔慣之外, 仲成日唔小心將d指甲吉到自己, 好痛。

又因為我地結完婚即係去蜜月, 仲係自由行喎, 所以要預先安排行程, 但係, 我好似唔記得呢回事咁, 所以依家先黎開始睇。但係睇游記 blog 實在都好花時間下, 搞到自己好夜訓, 唔夠精神, 皮膚好似變差喇。

rundown 果樣野我地已經唔理, 因為我地發現個 rundown 做得幾好都無用, 因為到時好似好多野都唔到自己控制, 同好多野都唔知有咩發生, 所以做左一次就算, 到時睇佢地反應喇, 我唔理咁多喇。
不過, 河馬大師班兄弟裡面, 只有一個係做唔到野唧, 而其他幾個都好ok既, 所以, 相信佢地可以應付。

仲有安床既問題, 本來我一直都同媽咪傾好晒架嘛, 佢又突然話果樣咩咩, 呢樣咩咩, 好煩呀。
我就講, 唉! 咁唔駛安喇, 我自己換床單被鋪算喇, 我唔想煩。

當日既音樂同歌都差不多選晒架喇, 仲差燒碟, 我地諗住是旦搵到熱鬧既歌做敬酒就算喇, 因為我地覺得, 根本唔會有人留意個歌詞係咩。
所以, 我地有用kit kit比我地果首歌做敬酒, 因為真係夠晒熱鬧同 high 呀。 (唔該kit kit)

最後, 就係要整家張 list, 拎野d咩去酒樓, 怕到時太趕唔記得左拎返走。

旺夫

其實呢, 我真係一個不折不扣既八婆仔黎既,
我以前細個都去算過好多次命,
佢地話我係旺夫,
我一直深深相信係既。

因為我更相信一句說話叫 "相由心生"
所以, 我信我係旺夫, 咁我個相慢慢都變得旺夫。
我同自己講, 我一定好運既, 我相信總有一日我都會行運既。
(我仲一直同我自己講, 我總有一日會中六合彩既, 所以我依家等緊, 嘻嘻.....)

旺夫既事又發生喇,
河馬大師竟然抽中左中銀紀念鈔喎,
仲要係5月6日, 我地婚後一日去拎,
所以, 擺到明就係我旺夫, 所以佢先抽得中喇,
嘻嘻, 我要分佢一半先得

我八掛到, 好多人都話上頭果時著新既紅色內衣褲, 用意好似係喜氣洋洋。
但係我更八到, 原本上頭果時開始著新既黃色底褲著足一日, 係代表旺夫架,
原因 : 黃褲 = 旺夫

所以我決定要買一條新既黃色底褲先。

倒數十日

唔經唔覺, 原來得返十日唧。

因為好多人同我講, 叫我記得染髮, 咁樣個造型會靚D, 睇落會有層次D。
咁我就終於去左染髮喇, 但係, 我好唔慣呀, 我覺得染得太啡喇。
仲有, 我發覺我D頭髮好差, 係勁開叉添。
所以, 結完婚之後, 打算即刻剪左把頭髮去先, 見到自己個頭髮成堆草咁就真係唔開心呀。

減肥呢一 PART, 我放棄左LU, 算喇, 得果十日, 真係無咩可能瘦架。
仲有, 我真係好想講過將會結婚既人知, 你千萬千萬唔好再信有人同你講, 唔駛擔心喇, 到差不多結婚果時, 你自自然然就會瘦架喇。
我覺得絕對唔可能, 我當初真係太天真, 信以為真, 所以一直都無好用力地去減肥, 就搞到依家咁, 我仲係好肥呀。
如果, 你地覺得我真係瘦到, 其實我係有比心機架。
我減少飲可樂, 我以前好鐘意飲可樂架。
我又食少左, 係真係食少好多好多, 以前我放工既晚餐, 通常都係買麥當勞又或者燒味飯。
但係依家既晚裝, 麵包+生果, 又或者麥皮+生果, 再唔係就幾片麥包唧。
而我既 LUNCH, 已經好耐無同同事出去食飯喇, 呢係公司度, 一係就唔食, 一係就食無咪既鳥冬, 再唔係就生果+麥皮(麥包)。
仲有, 就係我放工既時候, 我去 PHYSICAL 玩一個鐘既 SKYWALK。 雖然唔係日日, 但係一星期都兩三日喇。
所以我真係已經好努力, 但可惜既係, 真係瘦唔到囉。
河馬大師話我塊面尖左少少, D肉實左少少, 但係果少少真係唔係好夠。

搵歌果度, 都搵得七七八八架喇, 爭敬酒歌, 我地係度諗, 到底係一隻歌不停重霞, 定係幾隻歌好呢!??!

而派帖果度就最麻煩, 尋晚, 我媽咪都突然同我講, 要加人, 仲要係闔府統請既,
慘喇, 到底我會擺幾多圍, 我真係唔係好知呀。
已經搞到好亂,
其實我最擔心既就係, 如果只係多左5個人出黎, 咁點算?!?!
唔通5個人開一圍??  咁樣真係好白痴。
其實應該多過幾多人先開一圍, 又或者少過幾多人就插台。

如果到時我真係差多一一

好開心之羽毛筆

其實, 本來我已經放棄左呢個 item,
無諗住再用羽毛筆架喇,

因為聽人話唔可以用羽毛筆, 用羽毛筆只係影相果時靚d唧。
所以, 我諗住算架喇。

但係, 我有幸運事喇~~~~
我因為寫呢個blog, 識到好多blog友仔。
其中一個就係 sandy,
佢將佢枝羽毛筆送左比我呀!
yeah~~
佢仲話我知, 佢都係註冊處結婚, 而註冊處都比佢用羽毛筆。

尋晚, 我踏出我努力既一步, 迫於無奈去做運動,
我就約左 sandy 係 physical 見面, 順便比枝羽毛筆我。
我地一見面就滔滔不絕, 講到停唔到口呀,
如果唔係怕佢老公無飯食, 我真係唔捨得趕sandy走呀, 哈哈。

再次多謝 sandy 給我的羽毛筆, 我好開心呀!!!!

日記的封面

早係幾個月前, 我就話過我會整一份禮物送比河馬大師。
呢份禮物就係結婚前半年既日記。
寫呢本日記都辛苦架,
以前, 學校要交周記果時, 我都已經覺得好麻煩+痛苦。
依家要寫日記, 仲要寫半年喎, 有時河馬大師黎到, 我又要等佢訓著左先可以偷偷地寫呢本日記, 其實過程仲痛苦。
同埋, 都無可能日日咁多野寫,
就好似, 我果日根本咩都無做過, 只係返工放工睇電視咁就一日喇。
唔通我真係兩行字就算咩!!

而且因為有呢本日記既關係, 我打 blog 就更加少左, 因為有咩都寫左係日記度,
再打 blog 既感覺好似怪怪, 因為重覆左嘛, 哈哈。

日記就可以好簡單, 就咁 print 晒出黎就得。
但係, 我係咪應該要釘裝好佢呢?!?!

所以, 我就一定要幫呢本日記整返個封面喇。
呢個封面唔係整得好靚, 不過相信河馬大師收到一樣會好開心。

簽名筆與筆座

我自己無Diy到簽名筆,
原因係 : 我懶喇, 手功唔好喇, 時間應該唔多夠,  同埋我發現原來買都唔算好貴唧。
所以, 最後我買左以後3對簽名筆。

我都知買3對太多, 不過我都無打算開晒3對筆, 我諗住用黎做裝飾唧。
而且, 其他剩下唔開既筆, 留比大細佬將來結婚用 (佢被我阿媽迫婚中, 哈哈.....)



買完簽名筆之後, 我突然間諗, 係咪應該要有一個筆座先靚d呢?
本來我打算又去買一個現成既筆座的。

但係, 早幾日返媽咪屋企, 發現我阿婆好環保, 佢將我地燒完野食既蜜糖杯都洗乾淨留低晒。
咁就岩喇, 我拎一個用黎做筆座喇。
我就用我屋企有既少少絲帶黎 Diy 左呢個筆座, 簡簡單單, 唔係用左好多時間。

原來個杯細得濟, 想將d簽名筆放晒入去, 但放唔晒d簽名筆, 所以, 拎左兩樣出黎,
打算呢兩枝就開左佢, 放係枱等賓客簽名用喇。

完成~~

結婚幸運事???

其實我唔係想講我有咩幸運事發生,
我係想問大家, 你地有無幸運事發生唧。

事原 : 我有一個同事既細妹都係2012年結婚, 所以我地間中都會講下少少結婚既野,
通常都係我問佢多, 因為佢已經結左婚嘛。
咁佢就突然問我, 你同人講左你結婚之後呢, 個人都會好LUCKY架。
我反問佢, 係咩??!??
同事 : 係呀, 我阿妹決定左結婚之後, 就發生左好多幸運事。
    如: 中左ok之前既豆豆 Jumbo 獎。
    又如 : 去商場Shopping 之後, 參加抽獎, 竟然中左個智能掌上電腦。

我聽完佢咁講之後, 我真係覺得佢細妹好幸運喎。
但回想自己, 我好似無咩特別既幸運事發生, 就連六合彩都未中過20蚊添。

我同事又講, 佢話佢聽人講, 如果決定結婚之後就有好多幸運事發生, 代表你地兩個加埋一齊好旺架。
咁我諗, 點算呀? 我好似同平時一樣, 無特別好運, 亦都無特別衰運喎。
咁我同事就講: 咁你男友有無幸運事發生先?!?!
我心諗諗 : 咁又好似有喎, 真係好似決定結婚之後,即係佢同我求婚而我又答應佢之後, 佢就慢慢有好事發生喇。
但最明顯既好事發生係我地訂左酒席之後。
同事就安慰我說 : 咁可能係你旺夫, 所以你男友幸運, 而你無幸運事。

我即刻諗起, 以前細個八婆仔果時成日都去算命。
每個都不約而同地說 : 我是旺夫益子命。
唔知係算命師加埋一齊呃我, 定真係我條命有呢個現象睇得出黎。
所以, 可能, 我真係旺夫, 嘻嘻。

所以, 就算我無幸運事發生, 我都唔覺得有咩問題。
我相信我老公好, 我都唔會慘得去邊。

咁你地呢? 有無幸運事發生呀??

幸福~~

我今日無返工, 因為我懶。
哈哈哈~~~

其實係我皮膚敏感, 我唔知點解我間中都會皮膚敏感,
我覺得我既血一定係好甜既, 所以特別多野鐘意咬我。
我唔知比咩咬, 咬完好痕, 而且仲係會傳染的。
即係好痕, 我"R"完之後, 再"R"其他地方既話, 就連其他地方都開始出紅色一粒粒的小水泡。
但係, 我個人又麻煩, 成日都忍唔住,成日周身"R"
每次 "R" 完都好後悔, 我本來只係個身有唧。
但係, 我好失策地, 一不小心, 就 "R" 左自己塊面,
就咁就中招喇。

河馬大師成日鬧我話做咩周身 "R" 搞到咁喇, 話我成個 BB 仔咁, 咁大個人都唔識忍下...
但係我真係好痕。

不過我係有止痕既藥膏, 因為我已經唔係第一次敏感, 所以屋企係有止痕既藥膏既,
但我連擦藥都會懶, (因為好多地方都有, 我自己又擦唔到, 咪擦少少又唔擦少少囉。)
所以假期既時候, 我沖完涼會叫河馬大師幫我擦。

今朝, 我突然比d涼涼地既感覺整醒左, 原來係河馬大師返工前幫我擦藥膏呀。
佢今日突登較早少少鬧鐘, 預時間黎幫我擦完藥先出門口。
係果一刻, 我真係覺得自己好幸福, 平時呢個懶訓鬼, 竟然為左幫我擦藥膏而早起。
可能係其他眼中係小事, 又邊值得叫做幸福。

但係我心目中, 得到一個就連呢d小事都咁在意我既男人既愛,
我將來又點會唔幸福呢?

我的結婚證書套

我睇完好多網友自己整個結婚證書套, 我都好想自己整。
之後見到 Nico post左個做法出黎, 咁我就更加想整黎玩下喇。
但係, 我家既河馬大師, 當然不停地撥我冷水,
叫我唔好晒時間, 話如果真係好鐘意, 就不如買喇。
但係我唔想晒錢嘛。

咁我, 咁岩有兩個舊同學結婚, 我地成日都係group度傾結婚既野,
講起證書套呢個問題, 同學T都話佢會自己整。
佢仲將佢自己整既比我地睇, 嘩!!!
整得好靚喎, 咁我就更加想整喇。

咁我比河馬大師睇, 證書套係點既樣喎, 我話我同學T都整到喇, 仲要好靚添呀。
咁河馬大師又話, 你既手功一定無同學T咁好, 又叫我唔好晒心機捱眼訓

咁我就係 group 度同佢地講話我個河馬大師好衰果d喇。
同學T就話, 其實佢咁早整個結婚證書套係想試下自己整唔整到,
如果整得到, 就打算整黎送比我同埋另一個結婚同學C架。
嘩!!! 好開心呀, 不過又怕晒佢時間。

不過佢話唔緊要, 佢都想我地開心。
講真, 我真係好開心呀, 睇下, 呢個就係佢送比我同河馬大師既證書套,
真係好靚架, 係佢自己整架, 真係靚到好似係出面賣既一樣。
簡直開心到爆炸添呀。
真係好開心呀, 多謝晒你呀

百年排版的前序

好多網友都有分享過百年既排版技術,
好多網友都話唔掂囉。

咁我係時間好緊迫之下,
我有諗過, 唔得都由佢喇,
除非唔想係big day果日放呢d相薄出黎唧。

但係一直都等唔到小琴打黎話可能睇排版喎,
想點呢?! 我真係無咩時間架喎。

咁我就係4月1日msn同小琴講, 我地4月4日會上深圳,
所以, 叫佢要係4月4日前完成排版 send 比我地睇,
等我地可以係4月4日上黎同佢地傾排版。

小琴本來話唔得既, 因為設計師未做好,
我就發佢爛渣, 有無搞錯, 幾個星期都未做好,
根本就係佢地無即刻做先會咁, 我仲有差不多一個月就結婚,
依家都未睇得排版, 咁即係結婚果日唔駛用相薄喇,
總之我嘈嘈嘈, 咁佢同設計師講,
最後, 係4月3日會預先 send 個排版比我睇。

我心諗, 都唔知佢地點解要咁耐, 都兩三個星期都未做好個排版。
以前唔識就真係以為要好耐, 但自從有左 photobook 之後,
我同河馬大師都試玩過之後, 其實三四個鐘就應該可以搞掂一本26頁相薄,
依家佢只係得10頁唧, 點可能唔要咁耐呢, 真係激死。

聽到佢地答覆話4月3日會比到排版我,
我即係同河馬大師講, 聽聞百年既排版唔掂喎,
點算, 要唔要我地依家做一個先。
河馬大師話唔駛喇, 睇左佢地果個先喇,
如果佢地果個好OK既話, 咁我地咪晒左時間囉, 所以睇完先決定。

4月3日, 我同河馬大師一齊睇百年既排版,
Oh My God~~~~
真係唔可以叫做排版囉, 只係將d相拼貼一切就算了。
16寸果本都仲好d, 至少前幾百都叫有d心機, 似排版。
但係12寸果本, 無一張係ok架。
係左一張全張, 右兩張半張, 咁就係一頁既排版喇,
仲有一張佢夠膽死, 左一張相, 右一張相就叫完成。
哈哈, 真係笑死人呀!!!

咁河馬大師睇到就梗係唔收貨喇。
所以, 佢自己一個, 慢慢執, 慢慢排。
成本12寸都係佢自己排過。
16寸果本, 就保留一d, 改一d。
因為我地兩個都好累好眼訓, 無咁多時間排呀,
所以叫自己將就下喇。

實習做煮飯婆

結完婚之後, 就即係要開始做煮飯婆喇。
雖然依家間中都有做下煮飯婆既,
但都係放假果時先會做,
因為平日佢唔會過黎架嘛。
咁我自己一個, 就梗係是旦煮個即食麵又或者出去食麥當勞就算喇。

但係, 我突然要提前做煮飯婆, 唔制呀...嗚嗚>.<

都係我媽咪囉, 佢無端端要去旅行, 仲要係正復活節果幾日, 一去就去成個星期有多,
真係有無搞錯呀, 我要放假整結婚野架嘛。

我媽咪, 佢千叮萬囑, 佢旅行果幾日就返屋企訓,
然後煮飯比細佬同家姐個女食,
然後夜晚唔好走, 訓佢間訓, 順便陪下阿婆,
怕阿婆太老有咩意外

咁我已經同我細佬佢地相量過, 4月6日果日我就一定唔返黎架喇,
皆因係我地既周年紀念。

而4月7日, 我地會燒野食。
本來打算4月8日返, 4月9日唔返。但最後因為我家姐個女同我講, 佢呢兩日會出去北角訓, 唔返入黎,
所以我就叫細佬自己食自己, 我10號先返黎煮飯。

呢幾日, 我放工就要即刻去買送, 然後趕返去煮飯,
原來真係好xyz$&^@%的累呀。
累爆, 諗煮咩已經頭痛, 仲要呢幾日都熱辣辣, 身水身汗咁煮飯,
好痛苦呀!!!

我媽咪仲話, 佢4月16日先返,
哎呀~~我仲要煮多幾日呀, 我唔制呀,
3送1湯, 真係好痛苦呀!!!!

而且我媽咪住村屋, 好多蚊呀, 真係咬死我。
所以, 我頂唔順喇, 尋晚煮完飯, 返返自己屋企訓, 順便好乖咁做左一個水份mask。
我依家打算隔日隔日係果度訓, 因為我真係頂唔順呀!!!!!

百年的pre-wedding package

其實百年本身只包我執50張相。
但因為另外有係王子影,
王子既 package 又唔可以改喎。
但係, 好好彩,
百年既 package 係可以任改既,
所以我將百年所有package包既野都改晒黎執相,
只留返兩本相薄。
其實係因為見到百年送既油畫有36寸, 好鬼大呀!!!
而且, 我仲諗到一個問題就係,
酒樓放一張油畫相咪夠囉,
還掂我屋企細,
之後都無地方放,
不如轉晒做執相,
所以加加埋埋百年既相最後有118張相呀。
我發覺, d相執完之後,
真係真係比未執前好超級多,
原來我係大米執相架, 定百年只有大米一個執相呢???
題外話 : 大米仲讚我, 話我其實臉型輪廓都好靚, 只係肥左少少

但係, 其實我心諗,
如果我自己識得執相,
我就唔駛咁晒轉黎執相喇,
轉晒做相薄又或者水晶相架,
放晒係阿媽屋企,
迫佢日日夜夜對住我張結婚相都好呀,
哈哈

pre-wedding排版

嘩~~~
頭先係公司肚痛, 忍唔住去廁所,
咁好悶, 無野做, 拎手機出黎睇果時,
先發現.......

原來我一直唔記得放王子同百年既排版相上黎同大家分享呀。

所以, 我聽晚 (聽晚應該得閒d) 我一次過放晒上黎。等我呀~~~

我一直以為的朋友...

其實我一直係度諗, 寫唔寫呢封抱怨文,不過, 其實我寫出黎又唔會影響邊個,
我只係寫出我內心既感受唧。

我之前都一直有提到, 我朋友唔多, 但係我以前一直都唔覺得係一個咩大問題,
因為我有一個好愛我既男朋友, 亦都有好鍚我既屋企人。
所以, 朋友唔多, 我真係覺得唔緊要架。
因為係我心裡面, 我一直都以為我有一個好好既朋友。
我果時仲會同佢講, 朋友唔駛多, 有一個真心既朋友咪足夠囉。

我諗, 其實呢個只係我自己一相情願既想法而已。
我真係一直都真心當佢係好朋友架, 雖然我地唔係成日聯絡, 但係, 佢都唔係成日主動聯絡我嘛,
咁我以為咁多年, 佢習慣左同我既相處方式。
每當佢唔開心, 咁岩佢打比我同我傾既時候, 我真係放低晒我做緊既野同佢傾電話, 開解佢架。
我記得有一次, 佢話忍不住喇, 要搵屋搬, 但因為租屋好貴, 所以好苦惱。

我仲記得我收左線後, 即刻打比河馬大師, 喊住問佢係咪有個朋友想放租,
仲迫佢要個朋友用友情價出租。
真係友情價黎架, 4xx尺, 交通便利, 市區, 岩岩新裝修完, 房同廳都可以望海的, 唔駛$3000, 仲包埋管理費, 我估其他地方都幾難搵。
如果我唔係當佢係真心好朋友, 我又點會迫河馬大師打出咁大既友情牌喎, 我同河馬大師都係, 盡量都唔想求人, 因為求左人之後, 我地都會盡量還返雙倍既野。
因為, 唔想拖欠人地d咩。
當然最後我既朋友無租到, 因為其他野既關係。

仲有, 我成日都話自己孤寒, 但係出黎做野咁耐之後, 同佢出去食咁多次飯, 只除左一次係佢請我之外, 印象中唔係AA就係我請佢, 至少我成日請佢食生日飯, 而我既生日佢通常只係 facebook 留言架唧, 但係我果時真係唔介質架, 因為我覺得朋友唔係在乎佢係邊度留言比我嘛, 我心諗, 至少佢仲記得我生日喇。

我仲記得當年, 我地講過, 如果我結婚先, 佢做我伴娘。如果佢結婚先, 我就做佢伴娘。
咁當時佢早過我結婚, 佢有打比我叫我做佢伴娘喎, 咁我當然好開心喇。我仲同自己講, 佢真係珍惜我地既友誼架, 如果唔係佢根本唔需要叫我做伴娘。
咁係佢準備結婚既期間, 佢無打過電話叫我出去陪試妝又或者陪試衫, 佢都無打電話叫我幫手做d咩, 亦都無約兄弟姊妹見面。
佢只係打比我同我怨左一次話怇想通知某個同學, 點知個同事聽到佢結婚, 就話會黎, 但最後打親電話呢個同事都唔接囉。

咁我又係第一次做伴娘, 更係第一次有身邊既人結婚, 我根本唔知有咩要我做又或者有咩要我幫手。
所以, 我自己都無好主動咁問佢, 我就一直係屋企等佢電話喇。
果後時間適馮我係無返工架, 所以我時間其實係好多, 佢都知道的。

我只係知道, 佢叫我去試衫, 我即刻話ok, 佢話幾點我就幾點。
去到試衫果度, 佢叫我選衫, 我只係睇左兩下, 佢就拎起一件話好睇, 叫我試呢件。
咁我又話好, 只係試左呢件衫, 無再試其他衫, 因為佢話呢件好, 叫我唔駛再試。
咁我又話好。因為我覺得, 果日你係主角, 我唔需要著咁靚(當然果件衫我真係唔覺得靚, 就連我家姐都唔覺得件衫靚, 而絕不關我肥事, 當年佢結婚, 我只有40kg, )
然後佢大婚當年, 叫我七點鐘去佢屋企, 我話無問題。無講過d咩, 就算佢叫我5點鐘到, 我都一樣ok。

到佢屋企果時, 我無咩地方可以幫手, 因為佢阿嫂咩都搶晒黎做, 唔係我唔想幫手, 係我要幫手果時, 佢阿嫂就搶黎做喇。
好似, 佢媽咪幫手佢帶金器, 我見佢媽咪好似手忙腳亂, 就試下幫手帶, 點知佢阿嫂輕輕咁推開我。
okok, 可能因為我係外人, 咁我無問題。
到 "針" 茶果時, 我拎茶杯比佢, 我想拎果時, 佢阿嫂又拎左。我只係得佢阿嫂飲茶果時先拎到囉。
仲記得化伴娘妝時, 個mua問我加唔加眼睫毛,  我問mua要唔要另外加錢, 佢話要架。
咁我即刻話唔駛喇, 唔想用朋友咁多錢。個mua話, 加左靚d喎。我答mua, 朋友靚d就ok喇。

真係自問, 我樣樣都為佢著想, 會為佢諗。我對佢真係百分百真心付出我既感情架。佢唔開心同我怨果時, 我真係會喊, 喊佢既唔開心。
估唔到, 我依家搞結婚, 我先發現。
佢可能只係當我係一個普通既朋友囉。

關於佢做姊妹既每一項細節, 佢都要係對佢最好既, 最好盡量遷就佢既時間, 每次有問題, 都係由佢發起, 又或者佢係搞事者。
我真係唔明, 難道你唔燧真心想做我姊妹既咩? 咁你結過婚, 你都知結婚係有幾煩架。
點解你唔可以為我諗多諗呢??
其實我真係好失望, 我估唔到原來結婚真係可以睇清好多我一直以為既友誼係幾咁脆弱。

怪唔得成日都有人講, 搞結婚真係可以睇清好多野。

小小Diy

我頭先無聊自己整架。
想整比姊妹用, 用黎做頭花又得, 襟花都得。
當然手工麻麻喇, 因為我好眼訓喇。
不過我整既時候, 河馬大師叫我唔好整喎,
佢話佢知我想d姊妹都靚d。
但係, 佢話 : 你知你d姊妹幾xx架, 如果你整左, 佢地話唔靚, 唔鐘意, 我怕你唔開心。同埋都唔想你晒心機呀。

所以, 我後面是旦埋尾就算喇。
只係整左一個當比自己玩下囉。
去訓覺lu.....
晚安

剩返一個月

嘩~~~~
得返一個月唧。
三十日, 真係好快就過。

其實我大部分都七七八八, 八八九九咁喇。咪除左減肥囉, 都係無咩進展, 唉~~~
不過仲有一個月, 我已經決定差不多慘地, 應該要食麥皮餐喇。
嗚嗚~~~~~~~~~~
簡直係惡夢!!!!!!!!

Thomasina & Jerry WEDDING
2012/5/5
婚 禮 進 度 表
- 婚 宴 -
婚宴場地:	皇廷匯
婚宴席數:	15圍
婚宴菜單:	未定
當日流程表：	差不多完成
- 出 門 / 回 門 -
出門地點:	北角
出門時間:	早上9點至11點
回門時間:	2012年5月6日
回門豬：	酒樓送
- 喜 慶 儀 式 / 用 品 -
過大禮日期:	2012年3月17日
過大禮時間：	早上11點
過大禮禮金:	傾掂數啦~~^^
過大禮用品:	利是代替
安床日子：	2012年5月3日
安床時間：	早上9點至11點
安床人選：	媽咪朋友 - 嬸仔 (到時封返利是比佢)
安床用品：	新床單, 被鋪同安床十果加一個迷你子孫桶
上頭日期：	2012年5月5日
上頭時間：	凌晨12時
好命佬:	可能佢阿爸
好命婆:	可能係阿姨
上頭用品：	笋崗
美心西餅卡:	已買150張
奇華唐餅卡:	已買60張
嫁妝：	係咪即係金器? 未來奶奶有一對, 我阿媽話可能買一對, 我家姐都話可能買一對
回禮利是封 ：	原來酒樓有送
喜字貼紙:	笋崗
龍鳳被:	已買
新睡衣:	笋崗
男女家對聯:	笋崗
紅傘:	笋崗
囍字跪墊:	笋崗
敬茶茶具 :	有了, 一套龍鳳茶具
- 註冊事項 -
註冊地點：	紅棉路註冊處
註冊時間:	早上11點半
戒指枕:	萬福
結婚證書套:	朋友Diy送給我
羽毛筆：	不打算用了
結婚介子：	已買 - 萬福
- 晚宴項目類 -
場地佈置：	酒樓有
席前飲品	酒樓包
席前小食:	酒樓包
紅酒:	打算係佢朋友公司代訂
結婚蛋糕 (假):	酒樓包
結婚蛋糕 (真):	酒樓包
Table No. Card:	未定
Welcome Board:	未定
賓客名單:	完成
賓客坐位安排:	未預備
Photo Frame Stand:	酒樓提供
囍帖:	酒樓送 - 已選, 等對稿後就可以印
進場前 - 成長片段	未準備, 但純美和酒樓都有送
席前 - 婚紗 MV	王子
司儀:	Sean
進場音樂：	搵左
上乳豬音樂：	搵左
敬酒音樂：	搵左
婚宴Background音樂：	搵左
合「緊」杯：	用酒樓既
進場花炮：	笋崗
遊戲：	KO
遊戲獎品：	KO
音響設備：	酒樓提供
簽名布:	王子和酒樓都有送
簽名筆:	KO
接新娘遊戲:	KO
回禮禮物:	打算唔送喇, 因為諗唔到有意義既野
- 攝 影及 錄 影 -
婚紗相:	(1) 王子 (已影, 已拎相)
	(2) 百年 (已影, 未拎相)
婚禮攝影錄影:	純美新娘 - Kenny & 福喜哥
- 新 娘 / 新 郎 / 伴 娘 化 妝 及 配 飾 -
新娘化妝:	Cindy@Makeup Secret
新娘婚紗晚裝 - 頭飾/首飾:	Makeup Secret
新娘婚紗 - 頭紗:	Makeup Secret
新娘婚紗 -  手套:	淘寶買左兩對
- 姊 妹 及 媽 咪 化 妝 -
奶奶化妝:	Makeup Secret
媽咪化妝	Makeup Secret
伴娘化妝	Makeup Secret
姊妹化妝	Priscilla
- 禮 服 -
新娘婚紗:	愛華 - 未度身
新娘晚裝:	完成
新娘裙褂:	永隆繡莊
新郎禮服:	愛華 - 未度身
媽咪衫:	愛華 - 未 confirm
奶奶衫:	愛華 - 欠 fitting
姑仔衫:	愛華 - 欠 fitting
伴娘裙:	愛華 - 未 confirm
姊妹裙:	Come2me  (已訂未取)
兄弟呔:	已買
新娘婚紗鞋:	已買
新娘晚裝鞋	可唔可以用返婚紗鞋果對?
新娘裙褂鞋:	已買
新郎禮服鞋:	已買
媽咪晚裝/裙褂鞋:	已買
奶奶晚裝/裙褂鞋:	已買
新娘Girdle, Nu Bra, 乳貼 & 束褲:	不合身的Girdle - 已買
- 兄 弟 姊 妹 團 -
伴娘 x 1:	Jenny
伴郎 x 1:	阿勇
姊妹團 x 4:	Polly, Yuki, Catherine & Winnie
兄弟團 x 4:	Ivan, 毛強, 阿賢 & Daniel
- 花 車 -
主花車 x 1:	Benz (已 confirmed)
兄弟姊妹車	全為您 29座
主花車公仔/花:	Diy - 整緊
花車佈置:	搞掂
席後送客旅遊巴	搞掂
- 花 飾-
鮮花花球,新郎襟花,頭花:	搞掂
姊妹+伴娘手花	搞掂
兄弟+伴郎襟花:	有 idea
主婚人襟花:	搞掂
- 其 他 -
婚前檢查:	毅力 - 已完成
當日Rundown:	差不多完成
影相 Rundown:	未諗
主婚車 Rundown:	差不多完成
兄弟姊妹車 Rundown:	差不多完成
兄弟姐妹分工表:	差不多完成
兄弟姊妹午餐:	有idea - 稻香酒樓
兄弟姊妹Task List:	差不多完成
存放賀禮袋 (有鎖):	未諗
存放金器袋 (有鎖):	未諗
開門利是：	有idea
兄弟姊妹利是：	有idea
工作人員利是:	有idea
- 蜜 月 旅 遊 -
蜜月旅遊:	已book機票及酒店 - 沙巴 - 新加坡 - 布吉