令我發笑的小事一件

忍唔住寫落黎, 怕我唔記得。

尋晚, 星期六既關係, 河馬大師例牌係我屋企過夜的。

咁佢睇完波, 有得累, 所以12點多1點訓左。而我因為未眼訓, 咁我就訓係佢隔離用手機睇 running man。

大約睇到三點幾既時候, 我有d內急, 就去廁所喇。

去完廁所返黎, 隻腳唔小心撞到河馬大師, 就整醒左佢。

點知, 佢就好似半夢半醒既狀態, 然後一邊落床一邊係度講 :

「我岩岩發左個夢,  好驚險, 因為老婆話要買蟹肉, 我就拖住個木頭車去買蟹肉, 但係好危險, 我要不停避, 又有人追殺我.....」

之後聽唔到佢講咩, 因為佢去左廁所。

點知去完廁所返黎, 訓左上床後。 突然又講 :

「哎呀~~因為老婆話要買蟹肉做節, 就算幾驚險我都一定要買到, 不過個木頭車點解貼左張搞笑貼紙既。」

之後, 佢就訓著左喇(因為已經在打呼)。

我聽完之後, 我好想大笑, 因為佢講既野同語氣真係笑死我呀。

不過係佢訓著之後, 我忍唔住鍚左佢一啖。

點知今朝佢醒之後, 我同返佢講, 你尋晚發左個夢好搞笑。

佢話, 真係好驚險架, d人不停推d大石落黎想壓死佢, 佢買極d蟹肉都唔夠喎。

然後, 佢好似突然間醒覺咁講 : 「我估我應該成日都發夢, 只係訓得太熟, 所以唔記得自己發過夢。」

哈哈, 我真係好想笑, 佢講得真係好鬼搞笑架。