晴天霹靂的事

(因為要幫朋友打電話去book伯大尼, 仲未訓得,  所以寫多篇先)

上回提到, 發生左一件晴天霹靂的事。

如果我唔寫落去, 你地會唔會好想知道呢???

其實呢件事可以好簡單講完, 就係我唔可以著婚紗註冊。

但以我講野成日都一福被咁長, 我當然會講好多我既想法喇。

因為我開blog既最先原意就係記低關於結婚既事嘛, 嘻嘻。

初七果日, 講完註冊處果d野之後, 我媽咪就突然開聲講 : 唔得喎, 你果朝唔可以換婚紗喎。

因為你出門著住套裙褂, 就一定要到入左門先可以換其他衫架。 唔可以係入門之前又換又剩。

我聽到即刻話 : 下!!!  要我著完套裙褂註冊, 唔係咁搞笑呀??

我媽咪話: 咁無辦法架嘛, 鬼叫你地要果日註冊呀, 咁你地下午註冊咪可以換婚紗囉。

我話唔得呀, book左喇。

我媽咪話 : 咁人地結婚都應該係紅噹噹架喇, 著裙褂都幾好呀, 人地鬼佬就話要著白色唧。你咪夜晚果時係酒樓先著婚紗囉。邊有人著住裙褂換換除除架。

我未來奶奶聽到都話 : 如果想影相, 咁你入左門之後先去樓下公園仔碼頭果邊影相。

我媽咪聽到有人撐佢, 佢就當然繼續講 : 咁傳統上黎講, 真係著住裙褂出門就要著到入門架嘛, 邊有好似你咁諗, 唔三唔四架。而且人地個個都係出門之後就入門, 你地又要中間走去註冊喎。

我話 : 咁無時間嘛, 入門時間又遲, 咁當然中間用黎註冊好d嘛。

我家姐開聲講: 其實我贊成媽咪既講法喎, 人地真係由出門著到入門架。裙褂唔會著咁多次架嘛。其實你地咁樣按排, 時間上都好趕, 怕你都無時間換婚紗唧。你換婚紗之餘又要換頭換妝, 好晒時間架。

河馬大師亦加把口, 唔緊要喇, 你著裙褂都好靚呀, 而且租左咁貴, 咪著耐d當補數囉。

佢地咁多把口, 我仲可以點反抗呢???

所以, 我相當之傳統地, 要著裙褂註冊喇。

在送未來老爺奶奶返荃灣既時候, 係車上面, 我未來奶奶細細聲咁同我講, 唔緊要喇, 你媽咪要你著裙褂註冊, 你咪順下佢意囉。

在當日行街既時候, 河馬大師同我講, 如果你真係唔想著裙褂, 而當日又有時間既話, 你咪諗下換唔換婚紗囉。

不過, 我知道我註冊既時候, 係一定會著裙褂架喇。

因為 : 我媽咪係咁多人面前講, 如果我仍然堅持著婚紗, 就好似變相落媽咪面, 佢一定會非常非常非常之不高興。

我依家只係需要時間去調適自己既心態唧。

哈哈~~~著裙褂註冊, 唉

雙方家長見面了

1月29日 (大年初七)

今日, 終於約好雙方家長見面, 其實係我地拍拖第三年, 佢地已經見過一次, 飲過一次茶架喇。

當年, 我阿媽既理由係 : 怕係街到唔知對方係親家, 到時鬧交就唔好

其實我覺得呢個理由超搞笑, 但係呢, 我當年又真係約左佢地見面喎, 因為當年我都無諗過結婚呢個問題, 所以見唔見面我都覺得無咩所謂。

但係, 當我地打算結婚之後, 我都盡量去拖延雙方家長見面既時間。

因為, 我真係好怕佢地講關於結婚既野而鬧出問題。

而且, 一直都打算係兩邊暪既。

暪d咩??

梗係暪禮金喇。

我媽咪獅子開大口既話, 未來奶奶一定唔高興, 覺得點解要比咁多錢。
而我媽咪又覺得, 禮金梗係唔可以少架, 因為我個女 (即係我) 又唔係 cheap 野。

又怕佢地係酒席上面又有吵鬧, 又或者傾結婚既野方面有更多習俗上面既吵鬧。

好驚~~好怕。

所以, 約係過年既時候見面就最好架喇, 過年個個都應該高興架嘛。

而且, 係見面時, 我已經千叮萬囑我媽咪, 我話, 如果未來奶奶問禮金果d, 你話是旦我地細既話事就得喇, 廢事佢覺得我地收得多, 但係我之前應承比既數, 我就一定會比。

叫媽咪幫我做一台好戲唧。

而且我地為左萬一, 仲專登叫我家姐出埋黎, 如果有d咩事, 可以禁一禁, 媛和下個氣氛。

而未來老爺奶奶一直都話見面要傾禮金酒席既野, 過大禮都要問。

但係河馬大師就同佢地講, 我地之前傾好晒架喇, 如果你地係都要問, 到時我媽咪加價既話, d錢你地比呀。然後又講, 其實依家都唔興要問架喇, 以前係娶媳婦嘛, 依家係娶老婆, 梗係我地自己傾左就ok喇, 見下面咪算囉。

可能因為我地一直講一直講既關係, 雙方家長都好識做戲, 見面過程都好順利, 完全無提過任何禮金同酒席既野。

只係講下煲咩湯對身體好呀, 傾下閒計呀, 又或者講下結婚既一d習俗, 同埋果日既流程大約係點。

亦都係因為咁, 發生左一件對於我黎講係晴天霹靂既事,

嗚嗚~~~~

真係需要d時間去消化同接受~~~

大年初一的節目

我個人有一個習俗, 就係大年初一
一定唔可以比任何野嘈醒, 一定要訓到自然醒。
如果唔係, 果一年我都會一直處於唔夠訓既狀態。

呢個習俗我係邊度聽返黎?
其實係我自己作既, 作個理由比自己可以訓晏d。

而好奇怪地, 我讀中學開始, 大年初一既時候,
我屋企人都唔會叫醒我, 真係由我訓到自然醒架喎。

咁我依家自己一個住, 咁就更加無人嘈醒我喇。

不過, 今年, 我終於要比鬧鐘嘈醒我喇, 嗚嗚>.<

點解呢?

 就係因為我要準八點入婚姻註冊處既網站搶位。

好搞笑地, 5月5日既註冊日期係要大年初一果日搶位 >.<

我一早起身, 其實果時鬧鐘未響架, 因為太緊張, 怕搶唔到, 一直都訓得唔係太熟。

起身後打比細佬佢地, 叫佢地起身幫我搶喇。

準時八點正, 我地一班人搶入網站。

我入晒所有野, 準備按確定果時, 佢話已經有預約了。

但係果時, 天文台時間係8點01分55秒。

我果刻諗既唔係有人幫我搶到, 而係諗, 死喇, 會唔會佢地練果時真係亂咁幫我地book左時間呀。

真係驚一驚, 不過我都即刻 whatsapp 個group, 問邊個搶左。

當我打到 "邊個搶" 既時候,

我大細佬就係 whatsapp 度打個 "完成"

咁我就即刻問我大細佬, 你幫我拎到呀?

佢話, 應該係掛, 因為佢一按完成後, 個網頁就自己 close 左, 佢話應該係1號, 問我可唔可以 check 返。

咁我即刻上去 check 下喇,

Yeah!!  我大細佬真係好叻咁幫我搶到紅棉路第一號籌呀。


終於可以安心訓喇, 之後, 我一訓訓到下晏3點半


在此多謝咁多位朝早起身幫我搶位既朋友們,  鍚晒你地

註冊要搶位

上篇岩岩講到註冊既問題。

咁我地已經決定紅棉路註冊處喇, 咁我就當然要上網睇下點book喇。

嘩, 因為係星期六既關係, 原來紅棉路只得10個位唧。

再睇一睇辦公時間, 早上9點至11點半。

嘩, 時間上好似好難安排喎。

我9點後先可以出門, 咁我似乎要11點後既位都最好喎。

再睇下佢既預約情況, 紅棉路同文化中心似乎都幾受歡迎, 旺日都係full既, 咁即係要搶位先得喎。

因為我至少要排頭兩名, 先可以安心肯定係果度註到冊,

如果我唔夠人搶, 要我9點幾係果度註冊, 真係無咩可能。

所以, 我就叫我細佬, 家姐個女, 未來弟婦幫手我搶位。

而河馬大師真係好想係紅棉路, 所以就叫左八個朋友幫佢手搶。

因為搶位既關係, 所以我就要公開左我地既出生日期同埋身分證號碼比晒佢地喇。

註冊地點

其實為左註冊既問題, 都煩左好耐。

河馬大師堅持唔要係酒樓註冊, 因為佢話係酒樓註冊好無意思, 樓上有樓上既律師同新人講野。樓下有樓下既賓客係度玩啤牌。

所以佢實在唔鐘意呢種感覺。

而我呢? 其實我無咩所謂, 係邊度註冊我都ok既。但係佢咁堅持, 咁我當然會順住佢既意思喇。

(其實, 我曾經有一刻諗過book伯大尼, 係教堂行禮架。不過, 未來奶奶一聽到就話, 我地都唔係教徒。而我就諗到, 好似好唔方便, 因為太遠喇。所以呢個念頭出現左半日唧。)

咁我問佢, 係咪一定要註冊處, 佢話最好喇, 因為傳統上感覺係註冊處先係一個標準。

咁ok喇, 就只諗註冊處喇。

問問人, 再上網睇睇發現, 原來註冊處星期六只有大會堂開唧, 其他都只係開朝早, 哎呀~~點算喇, 咁咪好趕。

我北角出門, 荃灣入門, 然後再返出中環註冊, 最後再返荃灣擺酒。

我覺得真係好白痴呀。

我就一直問一直問, 死喇, 星期六下午得大會堂唧, 咁點算呀。

而且, 迷信黎講, 有人話朝早註冊會最好喎。

咁我地曾經問過未來奶奶, 問佢我可唔可以註冊完先入門。

佢本來唔想, 話如果係咁, 佢就唔可以黎睇我地註冊, 因為佢要留係屋企拜神。

下? 佢唔黎睇, 我地又唔想喎, 因為佢係新郎既阿媽黎架嘛。

咁點算呢, 似乎都真係要好白痴咁, 真係去大會堂架喇。

但係, 有突破。

我將個假設性既 rundown 整左朝早註冊同下午註冊既分別比未來奶奶睇, 未來奶奶就話, 不如你地朝早註冊, 然後再入門喇。

點解我未來奶奶咁大轉變呢, 就係因為佢見到, 早上註冊只需要 $7xx, 但係中午註冊就要$19xx。佢話唔想我地晒錢為左就佢, 佢話最多早d拜神喎 (未來奶奶鍚晒你) 。

其實我未來奶奶唔知, 我朝早註冊既費用雖然平左, 但係其他地方貴左好多, 總括上黎講, 我下午註冊用既錢其實仲少d添。

咁樣, 我地就一心諗住朝早註冊喇。

咁朝早, 我係北角出門, 就當然選返港島區既註冊處,

就係大會堂同紅棉路。

我問十個人, 有八個叫我選紅棉路, 因為果度靚喎。

其實係咪真係好靚呢? 我未睇過, 唔知呀, 哈哈。

不過我問河馬大師, 佢都話想要紅棉路,

咁ok喇,

註冊地點 : 紅棉路

註冊日期 : 2012年5月5日

註冊時間 : 未知

令我發笑的小事一件

忍唔住寫落黎, 怕我唔記得。

尋晚, 星期六既關係, 河馬大師例牌係我屋企過夜的。

咁佢睇完波, 有得累, 所以12點多1點訓左。而我因為未眼訓, 咁我就訓係佢隔離用手機睇 running man。

大約睇到三點幾既時候, 我有d內急, 就去廁所喇。

去完廁所返黎, 隻腳唔小心撞到河馬大師, 就整醒左佢。

點知, 佢就好似半夢半醒既狀態, 然後一邊落床一邊係度講 :

「我岩岩發左個夢,  好驚險, 因為老婆話要買蟹肉, 我就拖住個木頭車去買蟹肉, 但係好危險, 我要不停避, 又有人追殺我.....」

之後聽唔到佢講咩, 因為佢去左廁所。

點知去完廁所返黎, 訓左上床後。 突然又講 :

「哎呀~~因為老婆話要買蟹肉做節, 就算幾驚險我都一定要買到, 不過個木頭車點解貼左張搞笑貼紙既。」

之後, 佢就訓著左喇(因為已經在打呼)。

我聽完之後, 我好想大笑, 因為佢講既野同語氣真係笑死我呀。

不過係佢訓著之後, 我忍唔住鍚左佢一啖。

點知今朝佢醒之後, 我同返佢講, 你尋晚發左個夢好搞笑。

佢話, 真係好驚險架, d人不停推d大石落黎想壓死佢, 佢買極d蟹肉都唔夠喎。

然後, 佢好似突然間醒覺咁講 : 「我估我應該成日都發夢, 只係訓得太熟, 所以唔記得自己發過夢。」

哈哈, 我真係好想笑, 佢講得真係好鬼搞笑架。

開工大吉

今日我就已經要返工喇, 其實我好唔想返架, 如果我唔係要留返d假用黎結婚, 我今日同聽日都一定一定會攞假呀。
如果我公司可以再多少少福利就好喇。

因為我其實唔係呢間公司做左好耐, 所以我無咩利是逗到返黎, 下年我就要派利是喇, 感覺好奇怪, 哈哈。

不過今日返工, 我以為我會一直不在狀態中喇, 因為我今日大遲到, 成十點幾先返到公司

點知, 到下午做下做下, 我又差不多做晒手頭上既野喇。

好無聊, 本來想睇晒咁多blog友仔既blog, 但係我公司個電腦真係超級慢, 慢到想死, 等極都開唔到個網頁, 真係激死人喇。

我覺得我都應該係時候記返關於結婚既野。

好似好多野想寫, 但又唔知寫d咩先岩, 等我努力諗諗先。

恭喜發財~~

咁多位blog友仔,

新一年, 祝大家同另一半恩恩愛愛, 甜甜蜜蜜,
在龍年可以買屋買樓升職加薪,
所有人都身體健康, 幸幸福福。

婚前會抑鬱嗎?

係, 我呢度都已經封塵, 因為我情緒好低落, 所以完全提唔起勁上黎寫下野。

前幾日, 河馬大師問我, 點解咁耐無更新個 blog, 我話係呀, 我懶嘛。

其實,

我唔知點解, 我覺得好大壓力, 婚期越近, 我就發覺我越多野好似未攪掂, 我真係唔係好想去搞, 好煩呀。

我真係唔明點解結婚要搞咁多野, 我已經skip晒d diy無做架喇, 如果好似大家咁勤力去整 diy, 我估我應該更快就感受到呢個壓力掛。

我本來只係得減肥既壓力, 但係依家連結婚既壓力都有喇。

我真係諗左好多次, 早知就唔結婚喇, 我真係唔明點解自己咁傻會去結婚。

其實我地一直咁樣相處落去都幾好呀, 結婚唔結婚好似都唔係咁重要唧,

我又成日諗, 如果佢唔愛我, 結婚都無用。如果佢愛我, 唔結婚又有咩所謂喎。

所以, 我呢排咁多呢d既負面情緒, 我唔想上黎, 我怕上黎就會越寫越多,

越諗越多, 我怕我真係會逃婚呀!!!

結婚鞋

哈哈, 我咁遲先寫添。

我都唔記得正確既日期喇。

我只係記得係 b2b 網聚果日買既,  肥公主陪我去選的,仲比左少少意見我。

咁岩間鋪又有我咁細對既鞋, 所以, 即刻買喇。

但係對鞋.....係百年影相果日就已經著左一陣, 不過好累呀, 所以之後就換返波鞋喇

似乎我要得閒係屋企著多d, 練習練習, 如果唔係big day果日一定累死, 累到腳抽筋都似。

pre-wedding化妝尋找下的驚喜

話說, 我之前就已經提過, 因為有朋友說幫我們拍 pre-wedding,
而他原來說的那個 mua 臨時爽約, 那在不得不的情況下, 我就四處上網找找看有沒有 free 的 pre-wedding 化妝。

幸運的, 之前找了 wendy, 他還可以免費試妝。(已在前文寫了)

但是, 河馬大師的那個朋友說要拍兩天。

唉~~那我就是要再找多一個 pre-wedding 化妝才行, 因為wendy只有其中一天有空。

我有問, 我說如果我找不到化妝, 那怎麼辦。

河馬大師的那個朋友竟然說, 叫我自己化一個淡妝。

然後, 河馬大師跟我說後, 我當然發了河馬大師的脾氣喇, 我還說, 你那個朋友是不是有病, 我一早就說了我不懂化妝, 還叫我自己化淡妝。
我說我找不到就不要去拍, 因為我本來就沒有很想要拍。

但是, 我當然還是有盡力去找的。

非常幸運地, 我終於找到一個免費的 pre-wedding 化妝, 他還可以來我家幫我化喇。

這個化妝師叫 Priscilla

在26號當天, 約了 Priscilla 到荃灣西鐵。

然後我帶他到河馬大師的家, 在那裡為我化妝。

在化妝的過程中, 我的未來姑仔一直很多問題在問, Priscilla, 都一一地答我未來姑仔, 很搞笑。

其實我沒試過在這個情況下化妝, 河馬大師一家人都在, 所以我自己都有一點點緊張。 哈哈。

本來 Priscilla 說不包眼睫毛的, 但是幸運地, 他說買了新的眼睫毛想試一試, 所以就提供了給我呀。

因為他不能跟妝的關係, 他幫我設計了一個可以兩用的頭。

第一個頭是把頭髮疏成髮髻的, 然後, 他教河馬大師, 只要把三個固定髮髻的髮夾拆下, 讓頭髮放下來, 就會變成公主頭喇。

很正!!!

不過我今次相當之失察, 因為趕著出去, 我忘了拍照喇, 嗚嗚 >.<

他幫我後面 set 了兩個很漂亮的圈圈呀, 哎呀~~真係好可惜忘了拍照呀。。

然後, 對我來說的超驚喜就是以下的一段。
在閒談間, 他問到我姊妹化妝找到沒。

我說我應該會用我那家化妝公司的了, 因為這樣才會便宜嘛。

然後他問我訂了沒, 我說還沒, 還沒寄電郵去訂。

他說, 如果我結婚那天是假期, 他可以幫我免費化姊妹妝, 他大約半小時化一個妝。

只是如果時間太早, 沒有公共汽車可以坐就只需給他的士錢就可以了。

Yeah!!!!   我那天是星期六, 他不用上班的, 所以他把這日已經預留給我了。

我本來打算請 Priscilla 吃飯的, 但是那天實在太趕了,

所以, 我跟 Priscilla 說, 我欠他一餐飯, 下次補請。