為姊妹裙頭痛

我覺得我好似好多野都倒轉晒黎做。

好似我自己既婚紗禮服未睇過。

但係我竟然去諗下我媽咪既, 我未來奶奶既, 同埋我D姊妹既。

算喇, 搞掂人地, 自己到時再輕輕鬆鬆搞自己。

-------------------------------------------------------------------------------

我未來姑仔問我, 打算選咩色比姊妹做姊妹裙。
我話唔知呀, 本來我一直諗住係粉紅色。

然後我未來姑仔不停講, 粉紅色好蝦人仔架, 如果肥人著左好核凸。
我心諗, 會咩? 我都成日著粉紅色架喇, 你一向咁心直口快, 連自己媽咪有個小肚腩仔都話肥, 又唔見你話我著得核凸。
不過, 我未來姑仔好瘦, 我估, 大部分人在佢心目中都係肥架喇。

我回想起, 我之前做伴娘, 都係著粉紅色唧。 然後佢又話: 著左粉紅色就會變左蝦條人。

但係我真係唔覺喎。

好喇, 後來我問河馬大師, 如果一定要比個主題顏色係婚紗上面, 佢想要咩色?
河馬大師話 : 紫色。

咁我又諗諗: 咁不如姊妹裙就粉紫色喇, 還掂好似咁多人都鐘意紫色咁。
但係呢, 我未想姑仔件晚裝係深紫色喎, 而我未來奶奶既晚裝就係紫黑色喎,   會唔會同佢地撞晒色呢?!?!

除左顏色之外。 我仲好苦惱可以去邊度買。

我見好多BLOG友仔都去淘寶買, 但係呢 :  我有朋友講左句話, 你唔好買淘寶果D比我著呀。果D點著得落呀!!

但係我又考慮過, 如果係香港做, 首先睇款, 試衫, FITTING, 唔好彩既第二次FITTING, 最後拎衫。 加加埋埋又要去好多次野果間做衫既鋪頭, 我唔會有咁多時間陪佢地去喎。 如果我呢4個姊妹都好難就岩時間一齊去, 要我分別陪佢地去既話, 我估我真係死得囉。

如果淘寶買, 其實我好驚佢張相同佢衫係兩回事, 應該大家都知, 有時佢地唔知去邊度偷相, 相就好靚, 寄到返黎先知賴野。
仲有就係, 就算我比埋尺寸佢, 好多時返到黎個尺寸都係唔岩, 拎去改又好似好麻煩同好貴, 我依家真係唔知點算好呀!!!

你地有無好提議呀??