小風扇

今日同河馬大師去超市買飲品, 

突然看見這個玩具小風扇,

我即刻想起信義妹。

然後開左呢把小風扇試下,

E......唔夠涼 >.<

南海楓丹白鷺之兩日一夜 (上集)

9月20日

今日中秋佳節, 我同河馬大師就參加左一個兩日一夜團, 去大陸既南海既酒店休息休息。

曾經有個朋友問我, 點解好似 D 四五十歲既師奶, 成日參加呢 D 大陸團。

其實, 我覺得呢 D 大陸團都無咩唔好丫, 有人幫我 book 埋酒店同車, 唔駛我自己搞, 而且價錢又平, 仲有最重要既係, 我真係無大假可以講嘛 >.< (我仲爭公司廿日假的....嗚嗚 ....即係如果我辭職唔做, 我要賠返廿日錢比公司呀, 好慘)

唔知係咪中秋節既問題, 個團費貴左少少嘛, 比起佢平時貴五十蚊, 而且又遲左出發, 平時九點要到皇崗, 今日可以九點九到。 

Yeah!!!  可以訓晏少少, hehe....

準時九點九到達皇崗, 點知導遊仲未黎, 一定係羅湖既團友遲到, 所以搞到十點都仲未見到導遊。

唔知係咪注定, 參加咁多次呢 D 兩日一夜團, 差不多我次次都係最後出發既一團, 慘慘。。

第一個目的地, 係食飯先。 我地去既酒樓叫做聚龍酒樓。

因為食圍餐既關係, 我就梗係唔會逐樣該樣餸咁影相喇, 無理由要 D 團友咁樣遷就我架嘛。 點知, 我呢圍竟然就有一個要逐樣逐樣餸影相既人........

圍餐係九餸一湯, 白飯任裝。但呢個圍餐竟然有兩味都係雞, 分別係白切雞同鹽焗雞。

我仲發現到一樣野, 呢度個格局真係唔靚, 但都有新人會選係呢度結婚架, 因為有一個花花既心型門呀, 但真係好娘.........

食飽飽, 我地就上車去下一個目的地 --  碧江金樓
呢個碧江金樓係有專人講解架, 大約帶住你邊行邊講解關於呢個金樓既歷史。
但係我無聽到呀, 河馬大師唔想鴨人團咁跟住行, 因為佢話一邊聽佢講一邊行就好難影相, 一定會影到好多團友架喎。
咁 OK , 我倆自己亂咁行。好彩我地自己亂咁行, 先可以影到好多相, 有一張相係河馬大師訓係果張金床 (相片右下) 度扮十二少, 仲要係扮岩岩訓醒打呵欠個樣, 搞笑呀。

一入碧江金樓就會叫到右上果個水盆, 有個團友只要用 D 水濕濕對手, 再係盆耳度不停 "卒" 就會噴水上黎。 咁就有個團友話咁神奇, 即刻試下先喇, 點知佢卒左好耐都無水噴上黎喎。 但係我就聽到好似有 D 音樂聲喎。

我就問, 真係會噴水咩? 我好似聽到有音樂聲喎。

跟住個團友就話 : 係咩?  (然後佢再用力 D 卒) 係喎, 係喎, 真係有音樂聲呀。

呢個咁神奇個盆, 河馬大師梗係想試下玩架。所以就係我地亂亂行既時候, 河馬大師即刻試玩喇, 我仲有拍埋片架, 不過太細聲, 根本聽唔清楚。。。

行完碧江金樓, 再帶我地去一個大型的商場 -- 南海廣場。

呢個廣場其實無咩特色, 咪同香港既大型商場差不多囉, 但呢個商場樓下有間百佳, 我同河馬大師就去百佳 shopping 一下, 因為我知道我地今晚住既酒店好靜, 附近係無野行既, 所以我地要買定今晚既宵夜先得。

D 團友見到我地買咁多飲品有少少訝異, 問點解要買咁多? 我話因為河馬大師打算返到酒店後晒太陽, 所以要飲返好多水補充架。

終於可以返酒店喇, 我地報團果時就講明要大床訓。我地習慣左要一齊訓呀, 如果兩張床既房, 有一張床都只會吉左用黎放雜物, 咁就梗係要一張大床, 可以訓到舒舒服服喇, 係咪?!

呢間酒店, 係大堂同房都一樣有 WIFI 架, 正!!! 我可以同屋企人 whatsapp 報平安, 又可以同友人吹下水, 仲有就係, 我可以上 BK 呀, 可以因為太想有 BB 既關係, 所以慣左每日上 BK 睇下 :p

因為比原定時間遲左返到酒店, 本來話四點就返到酒店, 我地依家成5點15先返到酒店, 然後6點半就要集合去食晚飯, 咁就晒唔到太陽亦都游唔到水, 所以河馬大師選擇係酒店房抖一抖再落去 gym room 玩一玩, 係酒店周圍行下, 同埋視察下佢個游泳池係點既樣。
呢度個泳池係一定要帶泳帽架, 如果唔係佢唔會比你落池。
如果你無帶泳帽咩? 唔緊要, 你可以同佢地買。
如果連泳衣都無帶, 佢地都一樣有得買架, 哈哈。。
唔好諗住可以側側膊唔帶泳帽喎, 因為佢有兩個員工 (可能係救生員) 會用佢既金精火眼睇實, 因為佢見我地無著泳衣過去, 就即刻過黎問我地咩事喇.......

完成....辛苦的搬家

我終於搬家完成了。
或者可以話大概完成。

我上網搵左好耐, 都搵唔到可以 "選擇性" 的私友化,
所以我只好開多一個新既,
這個新網誌就將我舊的完完整整的搬過來。

而這個呢, 我都一樣有將舊文搬過來,
但有相片的舊文, 就通通刪除了,
原因梗係.......我怕醜囉。
你地都知架, 嘻嘻 :p

都順便將呢個網誌改一改名,
諗左好耐, 我決定改為

獅子大王的...........森林

歡迎得閒黎坐下, 雖然我會繼續好懶好懶咁, 未必會 post 文,
就算 post 都係自己發下翕風架唧, 好無聊既野。

其實, 繼續都只係因為唔捨得你地唧, 嗚嗚~~~~~

終於搬家了

我今日終於將yahoo blog既野back up了，而且都搬家來了這個blogger。
本來已將舊blog發表。
但，我突然發現，blogger好似唔可以私友化既？！？！
所以立即將舊post收回在草稿箱。
因為太多相唔想公開喇。
所以我要再慢慢研究，睇下係咪無私友化post先得。
如果真係無，我要再搵個地方儲存返我結婚既回憶。
然後係呢度再重新起步吧，唉…

名字的麻煩

妖~~
佢唔比我個名用獅子大王,
話我違規。

要我改名, 改左就已經唔係獅子大王喇, 黑人憎。